ឧត្តរមានជ័យ ៖ ដោយមានការណែនាំពីលោកឧត្ដមសេនីយ៍ទោ ម៉ែន លី ស្នងការនគរបាល ខេត្តឧត្ដរមានជ័យ និងមានការចង្អុលបង្ហាញពី លោក ហាំង ម៉េង អភិបាលស្រុកបន្ទាយអំពិល និង លោកវរសេនីយ៍ទោ ឃុល ភិន អធិការនគរបាលស្រុក នៅព្រឹកថ្ងៃទី២៦ ខែមេសា ឆ្នាំ២០១៩ កម្លាំងនគរបាលចរាចរណ៍ ស្រុកបន្ទាយអំពិល ចំនួន០៨នាក់ ដឹកនាំដោយ លោកវរសេនីយ៍ត្រី សំ សាត អធិការរងផ្នែកសណ្ដាប់ធ្នាប់ បានចុះធ្វើការអប់រំណែនាំដល់ប្រជាពលរដ្ឋ ដែលបើកបរយានយន្តគ្រប់ប្រភេទ( ដោយមិនផាកពិន័យ)។
ក្នុងឱកាសនោះដែរ លោកវរសេនីយ៍ត្រី សំ សាត អធិការរងស្រុក បានធ្វើការណែនាំដល់ប្រជាពលរដ្ឋ នៅចំណុចផ្លូវឡើងលើភ្នំជប់គគីរ ភូមិចាន់ក្រហមសែនជ័យ ឃុំអំពិល ស្រុកបន្ទាយអំពិល ខេត្តឧត្តរមានជ័យ និងបានត្រួតពិនិត្យលក្ខណៈបច្ចេកទេសគោយន្តកន្ត្រៃ ហើយបានណែនាំដល់ពួកគាត់ឲ្យប្រុងប្រយ័ត្នដែលបើកគោយន្តកន្ត្រៃ ឡើងលើភ្នំជប់គគីរ ដែលពាក់ខ្សែពានមួយតម្រូវឲ្យគាត់ ពាក់ខ្សែពានពីរឡើងវិញ និងបានបិទចំណាំងប្លាតជូនគាត់ផង។
ជាមួយគ្នានោះ លោកអធិការរងផ្នែកសណ្ដាប់ធ្នាប់ ក៏បានធ្វើការអប់រំដល់ប្រជាពលរដ្ឋ ដែលបើកបរម៉ូតូមិនពាក់មួកសុវត្ថិភាព និងមិនពាក់កញ្ចក់ មើលក្រោយ ព្រមទាំងបានចែកសៀវភៅច្បាប់ចរាចរណ៍ជូនពួកគាត់ផងដែរ៕
Source: Kampuchea Thmey Daily
0 Comments