ភ្នំពេញ ៖ រាជរដ្ឋាភិបាល នឹងចាប់ផ្ដើមអនុវត្តផ្តល់ប្រាក់ឧបត្ថម្ភជាង៧០ម៉ឺនរៀល ដល់ស្ត្រីមានផ្ទៃពោះក្រីក្រ និងកុមារអាយុក្រោម២ឆ្នាំ នៅខែមិថុនា ឆ្នាំ២០១៩ខាងមុខនេះ ដើម្បីលើកកម្ពស់ អាហារូបត្ថម្ភរបស់ កុមារ និង ជំរុញ ការលូតលាស់ ទាំងកាយសម្បទា និង បញ្ញាស្មារតី។
យោងតាមសេចក្ដីប្រកាស ព័ត៌មានរបស់ក្រសួងសេដ្ឋកិច្ច និង ហិរញ្ញវត្ថុ ចុះថ្ងៃទី២៣ ខែមេសា ឆ្នាំ ២០១៩ បានឲ្យដឹងថា ស្រី្ត មានផ្ទៃពោះ និង កុមារ អាយុក្រោម២ឆ្នាំ ដែលមានប័ណ្ណសមធម៌ និង មានកាន់ ប័ណ្ណ Post-ID របស់ក្រសួងសុខាភិបាល នឹងទទួលបានប្រាក់ឧបត្ថម្ភ ជាង៧០ម៉ឺនរៀល ទោះបី ស្រី្តនោះជាកម្មករនិយោជិតក្តី។ ទឹកប្រាក់នេះ នឹងផ្ដល់ជូនជាដំណាក់កាល ដោយចាប់ផ្ដើម អនុវត្តនៅខែមិថុនាខាងមុខ។
កម្មវិធី ឧបត្ថម្ភថវិកា ដល់ស្ត្រីមានផ្ទៃពោះ និង កុមារ ក្រោម២ឆ្នាំនេះ គឺ ផ្ដោតលើ ការយកចិត្តទុកដាក់ ចំពោះស្រី្តមានផ្ទៃពោះ នៃគ្រួសារក្រីក្រដែលគម្រោង នេះ ភ្ជាប់ជាមួយនឹងលក្ខខណ្ឌ នៃ ការទទួលសេវាសុខភាព នៅតាមមូលដ្ឋានសុខាភិបាល។
គម្រោង ផ្ដល់ប្រាក់ ឧបត្ថម្ភនេះបែងចែកជា៣ដំណាក់កាលរួមមាន ៖ ដំណាក់កាល ទី១.ស្ត្រីដែល ទទួលសេវាពិនិត្យផ្ទៃពោះ៤ដង មុនពេលសម្រាលកូន ពួកគេនឹងទទួលបានប្រាក់ឧបត្ថម្ភ ចំនួន៤ ម៉ឺនរៀល ក្នុង១ដង។ ដំណាក់កាល ទី២.ពោលគឺនៅពេលសម្រាលកូនរួច ស្ត្រីទាំងនោះ នឹង ទទួលបានប្រាក់ឧបត្ថម្ភ២០ម៉ឺនរៀល និង ដំណាក់កាលទី៣ នោះ ស្ត្រី ដែលសម្រាលកូនហើយ នឹង ទទួលបានប្រាក់ឧបត្ថម្ភ៤ម៉ឺនរៀល ក្នុង១ម្ដង នៅពេលទៅពិនិត្យសុខភាពក្រោយពេលសម្រាល ដែលមាន អាទិភាព ចំនួន៤ដង និង សម្រាប់ការនាំកូនមកចាក់ថ្នាំបង្ការ ចំនួន៦ដង រហូតដល់ អាយុ២ឆ្នាំ។
កន្លងមក សម្ដេចតេជោ ហ៊ុន សែន ធ្លាប់បានលើកឡើងថា សម្រាប់ការចំណាយថវិកាឧបត្ថម្ភ នេះ រដ្ឋាភិបាល ត្រូវការចំណាយថវិកាជាតិ សរុបជាង៤លានដុល្លារ សម្រាប់ការអនុវត្ត នៅឆ្នាំ ទី១ ពោលគឺ ឆ្នាំ២០១៩។ ទឹកប្រាក់ចំណាយនេះ នឹងកើនឡើង៧,៧លានដុល្លារ នៅក្នុងឆ្នាំ២០២០ ហើយបន្ត កើនរហូតជាង១០លានដុល្លារ នៅក្នុងឆ្នាំ២០២១ សម្រាប់ជួយទ្រទ្រង់ ផ្នែកសុខភាព របស់ស្ត្រី មាន ផ្ទៃពោះនេះ។
រដ្ឋាភិបាល ក៏បានដាក់ចេញគោលនយោបាយ ផ្ដល់ថវិកាជួយដល់កម្មករ រោងចក្រ និង មន្ត្រីរាជការ ជាស្ត្រី ដែលមានផ្ទៃពោះផងដែរ។ សម្រាប់ស្ត្រីបម្រើការងារ ក្នុងក្របខណ្ឌ កងកម្លាំងប្រដាប់អាវុធ និង មន្ត្រីរាជការ ស៊ីវិល ទទួលបានថវិកា៨០ម៉ឺនរៀល នៅពេល សម្រាលកូន។ ចំណែក កម្មការិនី រោងចក្រ ដែលសម្រាលកូន១នាក់ ទទួលបាន ថវិកា៤០ម៉ឺនរៀល , កូនភ្លោះ ទទួលបាន ថវិកា៨០ ម៉ឺនរៀល និង កូនភ្លោះបី ទទួលបាន១លាន២សែនរៀល។ បើតាម សម្ដេច ហ៊ុន សែន ថវិកា សម្រាប់ទ្រទ្រង់កម្មការិនីមានផ្ទៃពោះនេះ នឹងចំណាយ១០លានដុល្លារ ក្នុងមួយឆ្នាំ។
យោងតាមរបាយការណ៍របស់បេឡាជាតិរបបសន្តិសុខសង្គមបានឲ្យដឹងថា ក្នុងត្រីមាស ទី១ នៃ ដើមឆ្នាំ២០១៩បេឡា ជាតិរបស់សនិ្តសុខ សង្គម (ប ,ស , ស )បានឧបត្ថម្ភសម្រាប់កម្មការិនី សម្រាលកូន បានជិត២ម៉ឺននាក់ ខណៈឆ្នាំ២០១៨ បានផ្ដល់ប្រាក់ឧបត្ថម្ភជាង៦៥ពាន់នាក់៕
Source: Kampuchea Thmey Daily
0 Comments