នៅក្នុងជំនួបដ៏រំជើបរំជួលមួយជាមួយអ្នកនៅរស់រានមានជីវិតពីការសម្លាប់រង្គាលក្នុងវិហារឥស្លាមនូវែលហ្សេឡង់ ព្រះអង្គម្ចាស់ William របស់ចក្រភពអង់គ្លេស បានអំពាវនាវនៅថ្ងៃសុក្រឲ្យកម្ចាត់អំពើជ្រុលនិយមគ្រប់ទម្រង់ទាំងអស់។
មនុស្សប្រហែល១៦០នាក់បានប្រមូលផ្តុំគ្នានៅឯវិហារឥស្លាម Al Noor ក្នុងទីក្រុង Christchurch ដើម្បីជួបជាមួយព្រះអង្គម្ចាស់។ ទ្រង់បានថ្លែងអំណរគុណដល់អ្នកឆ្លើយតបដំបូងចំពោះការសម្លាប់រង្គាលកាលពីថ្ងៃទី១៥ខែមីនា។
រយៈពេល៦សប្តាហ៍បន្ទាប់ពីជនជ្រុលនិយមស្បែកសម្នាក់បានសម្លាប់មនុស្សចំនួន៥០នាក់និងរងរបួសជាច្រើននាក់នៅក្នុងវិហារគ្រិស្តសាសនាពីរកន្លែងក្នុងទីក្រុង Christchurch, ព្រះអង្គម្ចាស់មានបន្ទូលថា ទ្រង់គាំទ្រប្រជាជននូវែលហ្សេឡង់ ប្រជាជននៃទីក្រុង Christchurch និងសហគមន៍មូស្លីម។
ព្រះអង្គម្ចាស់មានបន្ទូលបន្ទាប់ពីមកដល់វិហារឥស្លាមពីជំនួបមួយជាមួយបុគ្គលិកមន្ទីរពេទ្យដែលថែទាំអ្នករងរបួសថា “អំពើហឹង្សាត្រូវបានរៀបចំឡើងដើម្បីផ្លាស់ប្តូរប្រទេសនូវែលហ្សេឡង់ប៉ុន្តែផ្ទុយទៅវិញការឈឺចាប់របស់ប្រជាជាតិមួយនេះបានបង្ហាញឲ្យឃើញថាតើការអាណិតអាសូរ ស្នេហាជាតិ ភាពកក់ក្តៅនិងក្តីស្រឡាញ់ពិតប្រាកដនឹងកើតឡើងដោយរបៀបណា”។
ព្រះអង្គមានបន្ទូលថា “ខ្ញុំឈរជាមួយអ្នកក្នុងការដឹងគុណចំពោះអ្វីដែលអ្នកបានបង្រៀននៅលើពិភពលោកក្នុងរយៈពេលប៉ុន្មានសប្តាហ៍ចុងក្រោយនេះ។ ខ្ញុំឈរជាមួយអ្នកដោយសុទិដ្ឋិនិយម។ ខ្ញុំឈរជាមួយអ្នកនៅក្នុងទុក្ខព្រួយ។ ខ្ញុំនឹងគាំទ្រអ្នកដែលនៅរស់។ សូមឲ្យកម្លាំងនៃក្តីស្រឡាញ់តែងតែយកឈ្នះលើកម្លាំងនៃការស្អប់ខ្ពើម។ អំពើជ្រុលនិយមគ្រប់ទម្រង់ទាំងអស់ត្រូវតែកម្ចាត់”។
ខណៈពេលដែលប៉ូលិសប្រដាប់អាវុធឈរនៅខាងក្រៅវិហារឥស្លាមហើយឧទ្ធម្ភាគចក្រប៉ូលិសមួយគ្រឿងហោះឆ្វែលនៅខាងលើ, ព្រះអង្គម្ចាស់ត្រូវបានស្វាគមន៍មកកាន់វិហារឥស្លាមដោយបព្វជិត Gamel Fouda, នាយករដ្ឋមន្ត្រីលោកស្រី Jacinda Ardern និងជនរងគ្រោះពីការវាយប្រហារឈ្មោះ Fahid Ahmed ដែលប្រពន្ធរបស់គាត់ស្ថិតក្នុងចំណោមអ្នកដែលត្រូវបានសម្លាប់។
គួរបញ្ជាក់ថា នៅពេលព្រះអង្គ William មកដល់ប្រទេសនេះកាលពីថ្ងៃព្រហស្បតិ៍ ទ្រង់បានយាងទៅកាន់មន្ទីរពេទ្យ Starship Children ក្នុងទីក្រុង Auckland ទាំងមិនបានប្រកាសឲ្យដឹងជាមុន៕ AFP
Source: Kampuchea Thmey Daily
0 Comments