ត្បូងឃ្មុំ ៖ បន្ទាប់ពីមានភ្លៀងធ្លាក់កក់ខែស្រោចស្រព ទាំង៧ ស្រុក/ក្រុង រួចមក នៅក្នុងខេត្តត្បូងឃ្មុំ កាលពីខែមីនា កន្លងទៅ ឃើញថា កសិករចាប់ផ្ដើមបង្កបង្កើនផលស្រូវវស្សាជាបណ្ដើរៗហើយ ដោយឡែកកសិករខ្លះកំពុងតែភ្ជួររាស់ដាស់ដីស្រែចម្ការ យ៉ាងញាប់ដៃជើង ការដាំដុះស្រូវរដូវ សម្រេចបាន៦០០០ហិកតាហើយ គិតត្រឹមថ្ងៃទី២៦ ខែមេសា ឆ្នាំ២០១៩នេះ។
លោកជា សុង ជាកសិកររស់នៅក្នុងភូមិត្រពាំងក្រពើ ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ បានឲ្យដឹងថា ជារៀងរាល់ឆ្នាំ ក្នុងកំឡុងខែមីនា និងខែមេសា ឲ្យតែមានភ្លៀងកក់ខែរួចមក គាត់និងកសិករនៅក្នុងភូមិ/ឃុំរបស់គាត់ តែងតែនាំគ្នាចាប់ផ្ដើមភ្ជួរដាស់ដី ស្រែចម្ការ រួចយកគ្រាប់ពូជស្រូវវស្សា មកបាចស្ដើងៗ ហើយរាស់លុបយកតែម្ដង មិនចាំបាច់ដកស្ទូងនោះទេ គឺគ្រាន់តែថែទាំដកស្មៅរហូតដល់ប្រមូលផលតែម្ដង។
ចំពោះការប្រមូលផល គឺកសិករប្រមូលផល ក្នុងអំឡុងខែវិច្ឆិកា និងខែធ្នូ ដូច្នេះកសិករទំនេរពីការបង្កបង្កើនផលតែរយៈពេល ២ ខែឬ ៣ ខែតែប៉ុណ្ណោះ។
លោក ជា សុង បន្តថា កសិករនៅក្នុងភូមិរបស់គាត់គឺធ្វើស្រែជារៀងរាល់ឆ្នាំ ដោយមិនមានប្រភពទឹកពិតប្រាកដនោះទេ គឺធ្វើស្រែប្រវាស់ជាមួយនឹងមេឃសុទ្ធហ្មង បានន័យថា ធ្វើស្រែពឹងផ្អែកទៅលើទឹកភ្លៀងទាំងស្រុង និងតាមលក្ខណៈបុរាណតែម្តង។
លោក ជា សុង ជារៀងរាល់ឆ្នាំគាត់ធ្វើស្រែលើផ្ទៃដីទំហំ ប្រហែលជា៣ហិកតា ចំពោះផលស្រូវដែលគាត់ទទួលបាន គឺមិនទៀងទាត់ទេ ឆ្នាំខ្លះទទួលផលបានច្រើន និងឆ្នាំខ្លះបានតិច។ ចំពោះប្រភេទស្រូវដែលគាត់ធ្វើមានច្រើនប្រភេទ អាស្រ័យទៅតាមសណ្ឋានដីស្រែ គឺស្រែទឹកជ្រៅ គាត់ធ្វើស្រូវធ្ងន់ រីឯស្រែណាទឹករាក់ គឺគាត់ធ្វើស្រូវស្រាលវាឆាប់ឲ្យផល។ ហើយគាត់មិនដែលបានទទួលការណែនាំធ្វើស្រែពីមន្ទីរកសិកម្មនោះទេ គឺគ្រាន់តែទម្លាប់ធ្វើស្រែតាមទម្លាប់តៗគ្នាមកនោះទេ។
លោក យូ តាំហ៊ី អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំបានបញ្ជាក់ឲ្យដឹងថា ដោយគិតត្រឹមថ្ងៃទី២៦ ខែមេសា ឆ្នាំ២០១៩នេះ ឃើញថា ការបង្កបង្កើនផលដំណាំរដូវវស្សា កសិករភ្ជួររាស់បាន ៥ ៥២០ហិកតា ស្មើនឹង ៧,០៤% នៃផែនការដាំដុះសម្រេចបាន៦០០០ហិកតា ស្មើនឹង ០,៧៦% នៃផែនការដាំដុះ ស្មើនឹង ១០,៨៧% នៃផ្ទៃដីបានភ្ជួររាស់ ហើយក្នុងចំណោមទាំង៧ស្រុក/ក្រុង ស្រុកដែលដាំដុះស្រូវរដូវវស្សាច្រើនជាងគេ មាន២ស្រុក ៖ គឺស្រុកត្បូងឃ្មុំ និងស្រុកតំបែរ៕
Source: Kampuchea Thmey Daily
0 Comments