ភ្នំពេញ ៖ តំណាងអង្គការយូណេស្កូប្រចាំនៅកម្ពុជាបានសន្យាថា នឹងជួយពន្លឿន ការចុះបញ្ជីទីក្រុងរបស់កម្ពុជាចំនួន៣ឲ្យក្លាយជាទីក្រុងបេតិកភណ្ឌរបស់អង្គការយូណេស្កូនៅពេលឆាប់ៗខាងមុខនេះដើម្បីចូលរួមថែរក្សាសម្បត្តិវប្បធម៌កម្ពុជានិងទាក់ទាញភ្ញៀវទេសចរកាន់តែច្រើន។
នៅក្នុងជំនួបជាមួយលោកបណ្ឌិតថោង ខុន រដ្ឋមន្ត្រីក្រសួងទេសចរណ៍កាលពីរសៀលថ្ងៃទី១៩ ខែមេសា ឆ្នាំ ២០១៩នៅទីស្តីការក្រសួងទេសចរណ៍ លោក សាដា អ៊ូម៉ា តំណាងអង្គការយូណេស្កូប្រចាំកម្ពុជាបានប្តេជ្ញាថានឹងខិតខំធ្វើការជាមួយក្រសួងវប្បធម៌ និងវិចិត្រសិល្បៈកម្ពុជាដើម្បីពន្លឿនការងារចុះបញ្ជីទីក្រុងបាត់ដំបង ក្រុងកំពត និងក្រុងក្រចេះរបស់កម្ពុជាទៅក្នុងបញ្ជីទីក្រុងបេតិកភណ្ឌរបស់អង្គការយូណេស្កូឲ្យបានលឿន។
ថ្លែងប្រាប់អ្នកសារព័ត៌មានក្រោយជំនួបរវាងលោកបណ្ឌិតថោង ខុន និងលោក សាដា អ៊ូម៉ា លោកជក់ ជំនោ ប្រធាននាយកដ្ឋានអភិវឌ្ឍន៍ទេសចរណ៍ នៃក្រសួងទេសចរណ៍ បានមានប្រសាសន៍ថា ការចុះបញ្ជីទីក្រុងរបស់កម្ពុជាចំនួន៣ឲ្យក្លាយជាទីក្រុងបេតិកភណ្ឌរបស់អង្គការយូណេស្កូនេះ នឹងបង្ហាញពិភពលោកឲ្យស្គាល់កម្ពុជាកាន់តែច្បាស់ថែមទៀត។
ក្នុងជំនួបនោះដែរ តំណាងអង្គការយូណេស្កូ ក៏បានសន្យាជួយផ្សព្វផ្សាយ និងជំរុញភ្ញៀវទេសចរអន្តរជាតិឲ្យធ្វើដំណើរ មកកាន់តំបន់បេតិកភណ្ឌពិភពលោក ដូចជាប្រាសាទអង្គវត្ត ប្រាសាទព្រះវិហារ និងប្រាសាទសំបូរព្រៃគុកជាដើមឲ្យបានច្រើនបន្ថែមទៀតផងដែរ។
លោកបណ្ឌិតថោង ខុនរដ្ឋមន្ត្រីក្រសួងទេសចរណ៍បានគាំទ្រ នឹងអគុណចំពោះការប្តេជ្ញារបស់តំណាងអង្គការយូណេស្កូ ដែលជួយក្នុងការចុះបញ្ជីទីក្រុងបាត់ដំបង ក្រចេះ និងទីក្រុងកំពតទៅជាទីក្រុងបេតិកភណ្ឌអង្គការយូណេស្កូនេះ ព្រោះថា ការអភិវឌ្ឍវិស័យទេសចរឲ្យរីកចម្រើនត្រូវតែមានការផ្សារភ្ជាប់ជាមួយផ្នែកវប្បធម៌បេតិកភណ្ឌ។
ជាមួយគ្នានោះ ដែរលោក រដ្ឋមន្ត្រីក្រសួងទេសចរណ៍ក៏បានស្នើដល់តំណាងអង្គការយូណេស្កូធ្វើយ៉ាងណាជួយបន្តកិច្ចសហការជាមួយកម្ពុជាឲ្យកាន់តែល្អបន្ថែមទៀត លើការងារអភិវឌ្ឍន៍វិស័យទេសចរណ៍នៅខេត្តសៀមរាប និងជំរុញឲ្យការផ្សារភ្ជាប់ពីតំបន់ទេសចរណ៍វប្បធម៌ ទៅនឹងតំបន់ទេសចរណ៍ធម្មជាតិនានាផងដែរ។
តំណាងអង្គការយូណេស្កូបានទទួលយកសំណើនេះ ហើយនឹងបន្តសហការរៀបចំ វគ្គបណ្តុះបណ្តាលដល់មន្ត្រីទេសចរកម្ពុជាលើការងារ អភិវឌ្ឍន៍ និងការអភិរក្សវប្បធម៌ ដើម្បី ថែរក្សាសម្បត្តិវប្បធម៌ឲ្យបានគង់វង្ស និងអាចទាក់ទាញភ្ញៀវទេសចរណ៍មកកម្ពុជាកាន់តែច្រើនថែមទៀត៕
Source: Kampuchea Thmey Daily
0 Comments