ភ្នំពេញ ៖ លោក Chen Qiuta អគ្គលេខាធិការបក្សប្រចាំខេត្តលាវនីញ ប្រទេសចិន បានសម្តែងពីចំណាប់អារម្មណ៍មានបំណងរួមជាមួយកម្ពុជា ផ្សារភ្ជាប់យុទ្ធសាស្ត្រអភិវឌ្ឍន៍ដោយយកគំនិតផ្តួចផ្តើមខ្សែក្រវាត់ និងផ្លូវ ជាឱកាសក្តាប់យកគម្រោងសំខាន់ៗ នៃកិច្ចសហប្រតិបត្តិការ និងការវិនិយោគ។
លោក Chen Qiuta មានចំណាប់អារម្មណ៍យ៉ាងដូច្នេះ នៅក្នុងវេទិកាជំរុញធុរកិច្ច រវាងខេត្តលាវនីញ ប្រទេសចិន និងប្រទេសកម្ពុជា ដែលសហការរៀបចំដោយក្រសួងពាណិជ្ជកម្ម នៃព្រះរាជាណាចក្រកម្ពុជា មន្ទីរពាណិជ្ជកម្មខេត្តលាវនីញ សភាពាណិជ្ជកម្មខេត្តលាវនីញនៅកម្ពុជា ធនាគារចិនសាខានៅភ្នំពេញ នាព្រឹកថ្ងៃទី២៦ ខែមេសានេះ នៅសណ្ឋាគារសូហ្វីតែលភូគីត្រាភ្នំពេញ។
លោកអគ្គលេខាធិការបក្សប្រចាំខេត្តលាវនីញបានបញ្ជាក់ថា ប្រទេសចិនគឺជាដៃគូពាណិជ្ជកម្មធំបំផុតរបស់កម្ពុជា និងជាទីផ្សារនាំចេញធំទី៥របស់កម្ពុជា កិច្ចសហប្រតិបត្តិការធុរកិច្ចរវាងខេត្តលាវនីញ និងប្រទេសកម្ពុជា ឈរនៅចំណាត់ថ្នាក់នាំមុខក្នុងប្រទេសចិន ដែលជាតថភាពបញ្ជាក់យ៉ាងច្បាស់ថា កិច្ចសហប្រតិបត្តិការពាណិជ្ជកម្មរវាងលាវនីញ និងកម្ពុជា ចាក់ឬសនៅក្នុងមិត្តភាពជាប្រពៃណីនៃផលប្រយោជន៍រួម សម្របតាមបម្រែបម្រួលសម័យកាល ដែលនាំជាកម្លាំងជំនួយដល់គំនិតផ្តួចផ្តើម ខ្សែក្រវាត់ និងផ្លូវ ដើរបានកាន់តែជ្រៅ និងពិតប្រាកដ ថែមទាំងអាចបង្កជាការផ្លាស់ប្តូរទៅវិញទៅមកយ៉ាងប្រសើរក្នុងក្របខ័ណ្ឌ នៃកិច្ចសហប្រតិបត្តិការរវាងចិន និងអាស៊ាន។
លោកបញ្ជាក់បន្ថែមថា យើងទាំងអស់គ្នាគួរតែក្តាប់ឱកាសប្រមូលផ្តុំកម្លាំងសាមគ្គី ដើម្បីបោះជំហានទៅមុខ ដោយភាពតាំងចិត្តកាន់តែម៉ឺងម៉ាត់ ជំហានកាន់តែស៊ីសង្វាក់គ្នា និងយន្តការកាន់តែមានប្រសិទ្ធភាព ដើម្បីបង្ហាញពីគុណសម្បត្តិធំធេង និងមូលដ្ឋានជ្រាលជ្រៅនៃការបំពេញចន្លោះខ្វះខាតរវាងទ្វេភាគីក្នុងកិច្ចសហប្រតិបត្តិការនេះ។ សង្ឃឹមថា រដ្ឋាភិបាលទាំងពីរភាគីនឹងអនុវត្តយ៉ាងម៉ឺងម៉ាត់រាល់វិធានការនានា ដែលបានដាក់ចុះ លើកកម្ពស់សមត្ថភាពប្រកួតប្រជែងថ្នាក់អន្តរជាតិផ្នែកឧស្សាហកម្មរបស់ភាគីទាំងពីរ។ ឧទាហរណ៍ដូចជា ការកាត់បន្ថយចំណាយដឹកជញ្ជូន និងភស្តុភារ ជំរុញការផ្សារភ្ជាប់ការដឹកជញ្ជូន ថាមពល និងព័ត៌មានវិទ្យា បន្តជំរុញឲ្យដំណើរការគយជាដើមកាន់តែមានភាពងាយស្រួល និងកាន់តែមានភាពវៃឆ្លាត លើកកម្ពស់កម្រិតនៃភាពងាយស្រួលក្នុងវិស័យពាណិជ្ជកម្មភាគីទាំងពីរ ពង្រឹងកិច្ចសហប្រតិបត្តិការតំបន់សេដ្ឋកិច្ចពិសេស ការកសាងហេដ្ឋារចនាសម្ព័ន្ធ កសិកម្ម និងការកែច្នៃផលិតផលកសិកម្ម ទេសចរណ៍ បន្ថែមមួយកម្រិតធ្វើឲ្យមូលដ្ឋានឆន្ទៈមិត្តភាពចិន និងកម្ពុជាកាន់តែរឹងមាំ។
លោក សំ សិរីរតន៍ រដ្ឋលេខាធិការក្រសួងពាណិជ្ជកម្ម នៃប្រទេសកម្ពុជា បានបញ្ជាក់ដែរថា ផ្តើមចេញពីការគាំទ្រយុទ្ធសាស្ត្រខ្សែក្រវាត់ និងផ្លូវ សម្រាប់កិច្ចសហប្រតិបត្តិការអន្តរជាតិ រាជរដ្ឋាភិបាលកម្ពុជា ក៏បានដាក់ចេញជាបន្តនូវការអនុវត្តយុទ្ធសាស្ត្រចតុកោណដំណាក់កាលទី៤ ដែលជាការតភ្ជាប់ទំនាក់ទំនងយ៉ាងជិតស្និទ្ធ និងគ្រប់ជ្រុងជ្រោយជាមួយរដ្ឋាភិបាលចិន ដើម្បីពង្រឹង និងជំរុញកំណើនសេដ្ឋកិច្ចរវាងប្រទេសទាំងពីរឲ្យមានប្រៀបលើការប្រកួតប្រជែងក្នុងរបត់ទីផ្សារពិភពលោក ដែលកំពុងធ្វើបដិវត្តន៍ឌីជីថល ៤.០។ លោក រដ្ឋលេខាធិការបានជម្រាបជូនថា នៅក្នុងយុគសម័យឌីជីថលនេះ ដើម្បីឲ្យកិច្ចសហប្រតិបត្តិការរបស់យើងដំណើរការដោយរលូន ជាពិសេសសម្រេចបាននូវគោលដៅរួម ក្រោមប្រធានបទ «រួមគ្នាកសាងវិថីសូត្រ សមុទ្រសតវត្សរ៍ទី២១៖ បង្កើតសហគមន៍ចិន-អាស៊ានប្រកបដោយនវានុវត្តន៍»បន្ថែមពីលើសារៈសំខាន់នៃការតភ្ជាប់ហេដ្ឋារចនាសម្ព័ន្ធរូបវន្ត ខ្ញុំយល់ថា ការតភ្ជាប់ផ្នែកឌីជីថល គឺជាកក្តាចាំបាច់មិនអាចខ្វះបាន។ ទន្ទឹមនេះដែរយើងត្រូវផ្តល់អាទិភាពខ្ពស់ដល់ការស្រាវជ្រាវវិទ្យាសាស្ត្រ បច្ចេកវិទ្យា និងនវានុវត្តន៍ ដែលជាមូលដ្ឋានដ៏សំខាន់សម្រាប់ទ្រទ្រង់ឲ្យមានកំណើនសេដ្ឋកិច្ចប្រកបដោយចីរភាព បង្កើតការងារធ្វើ និងជួយពង្រឹងដល់ប្រព័ន្ធសុខុមាលភាពសង្គម។ លើសពីនេះទៀត វិទ្យាសាស្ត្របច្ចេកវិទ្យា និងនវានុវត្តន៍ គឺជាចលករដ៏សំខាន់ក្នុងការពន្លឿនសមាហរណកម្មតំបន់ ជំរុញទំនាក់ទំនងរវាងប្រជាជន និងប្រជាជន និងបង្កើនប្រសិទ្ធភាពសម្រាប់ការធ្វើប្រតិបត្តិការលើវិស័យនានាដូចជា ប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក(E-Commerce) ប្រតិបត្តិការធនាគារ ការទូទាត់ហិរញ្ញវត្ថុ ។ល។ ក្នុងនាមលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោកសូមអរគុណចំពោះវិនិយោគិនចិន ជាពិសេសខេត្តលាវនីញទាំងអស់ ដែលបាននឹងកំពុងធ្វើការវិនិយោគនៅកម្ពុជា និសូមអំពាវនាវដល់វិនិយោគិនចិន ដែលមិនទាន់បានមកកម្ពុជា អញ្ជើញមកសិក្សាស្វែងយល់ពីសក្តានុពល និងឱកាសវិនិយោគនៅកម្ពុជាបន្ថែមទៀត ព្រមទាំងសម្រេចបណ្តាក់ទុនវិនិយោគឲ្យបានទាន់ពេលវេលា ដែលជាឱកាសទាញយកផលប្រយោជន៍ជាអតិបរមាក្នុងការវិនិយោគនៅកម្ពុជា។
លោក ឯក សំអុល ប្រធានសមាគមមិត្តភាពកម្ពុជា-ចិន ក៏សង្ឃឹមជឿជាក់ដែរថា វេទិកាជំរុញធុរកិច្ច រវាងខេត្តលាវនីញ ប្រទេសចិន និងប្រទេសកម្ពុជាថ្ងៃនេះនឹងរួមចំណែកធ្វើឲ្យប្រសើរឡើងបន្ថែមទៀត ការតភ្ជាប់គ្នា និងការបោះជំហានទៅមុខនូវសហប្រតិបត្តិការរវាងកម្ពុជា និងខេត្តលាវនីញ ជាពិសេសជាមួយនឹងការកើនឡើងគ្រប់ជ្រុងជ្រោយរវាងយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលកម្ពុជា និង«ខ្សែក្រវាត់មួយ ផ្លូវមួយ»របស់ចិន៕
Source: Kampuchea Thmey Daily
0 Comments