ខ្សែបម្រើ-ប្រយុទ្ធ សារី ម៉ាត់ណូរូទីន របស់ក្លិបវិសាខា សមាជិកពានរង្វាន់លីគកំពូលកម្ពុជា (Metfone Cambodian League) បានត្រឡប់ចូលទីលានវិញហើយ បន្ទាប់ពីជាសះស្បើយពីរបួសជង្គង់ ១០០% ហើយគេក៏បានសម្ដែងការសប្បាយចិត្ត ចំពោះការត្រឡប់មកជួយមិត្តរួមក្រុមសាជាថ្មី នឹងប្ដេជ្ញាខិតខំហ្វឹកហាត់ទ្វេដង ដើម្បីជួយក្លិបរបស់ខ្លួនទទួលបានលទ្ធផលល្អប្រសើរជាបន្ដបន្ទាប់ទៀត។
កីឡាករខ្មែរ-អ៊ីស្លាម រូបនេះត្រូវបានលោក ហុក សុជីវ័ន្ត ដែលជាគ្រូបង្វឹកដាក់ឲ្យបង្ហាញខ្លួនរយៈពេល១៥នាទី ចុងក្រោយក្នុងជំនួបសប្ដាហ៍ទី៤ លីគកំពូលកម្ពុជាពេលក្រុមវិសាខា យកឈ្នះលើក្លិបអគ្គិសនីកម្ពុជា ៤ទល់០ កាលពីចុងសប្ដាហ៍កន្លងទៅ។ ជុំវិញឱកាសចូលទីលានប្រកួតបានវិញកីឡាករ ម៉ាត់ណូរូទីន បាននិយាយថា «ខ្ញុំសប្បាយចិត្តមែនទែន សម្រាប់ការត្រឡប់មកបង្ហាញខ្លួនលើទីលានសាជាថ្មី បន្ទាប់ពីខ្ញុំបានជាពីរបួស ហើយខ្ញុំក៏សប្បាយចិត្ត ដែលឃើញការប្រកួតមួយដ៏ល្អ សម្រាប់ការដណ្ដើមបាន ៣ពិន្ទុនេះដែរ»។
កីឡាករដែលធ្លាប់បង្ហាញខ្លួនក្នុងក្រុមជម្រើសជាតិកម្ពុជា រូបនេះបានបន្ដថា «ប្រកួតនេះ លោកគ្រូដាក់ខ្ញុំឲ្យលេង ដើម្បីបន្សាំការប្រកួតក្រោយទៀត អញ្ចឹងខ្ញុំនឹងព្យាយាមធ្វើឲ្យបានល្អជាមួយការខិតខំ ដើម្បីរកឱកាសជួយក្រុម។ ខ្ញុំមានការសោកស្ដាយ សម្រាប់របួសរបស់ខ្ញុំ ដែលធ្វើឲ្យខកខានជួយក្រុមប៉ុន្មានប្រកួតកន្លងមក តែខ្ញុំវិលត្រឡប់មកវិញ ខ្ញុំនឹងខិតខំប្រឹងឲ្យលើសពីសមត្ថភាពរបស់ខ្ញុំ ដើម្បីរួមចំណែកជួយក្រុម និងដណ្ដើមលទ្ធផលល្អៗសម្រាប់ក្រុមថែមទៀត»។
គេចាំបានថា កីឡាករ សារី ម៉ាត់ណូរ៉ូទីណ បានផ្ដើមអាជីពបាល់ទាត់ជាមួយក្លិបអាស៊ីអឺរ៉ុប ចាប់ពីឆ្នាំ២០១៣-២០១៥ បន្ទាប់មកបានផ្លាស់ទៅក្លិបភ្នំពេញក្រោន តែលេងបានពាក់កណ្ដាលរដូវកាល ក៏ផ្ទេរទៅលេងឲ្យក្លិបណាហ្គាវើល ចាប់ពីឆ្នាំ២០១៥-២០១៨ មុនផ្ទេរមកកាន់ក្លិបបាល់ទាត់វិសាខា ត្រៀមរដូវកាលឆ្នាំ២០១៩ ។ យ៉ាងណាក្តីថ្នាក់ដឹកនាំក្លិបវិសាខា រំពឹងថា ម៉ាត់ណូរ៉ូទីន នឹងក្លាយជាផ្នែកមួយជួយឲ្យក្លិបសម្រេចគោលដៅនារដូវកាលនេះ៕
Source: Kampuchea Thmey Daily
0 Comments