ភ្នំពេញ ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជារដ្ឋមន្ត្រីសេដ្ឋកិច្ចអាស៊ានសម្រាប់ កម្ពុជា បាន ស្នើសុំឲ្យមានសេចក្តីប្រកាសរួមអាស៊ានស្តីពី ការដាក់វិធានការការពាររបស់សហភាពអឺរ៉ុបមកលើអង្ករ Indica កម្ពុជា ដែលធ្វើឲ្យប៉ះពាល់ដល់ការនាំចេញអង្កររបស់កម្ពុជា។
ការស្នើសុំនេះធ្វើឡើងកាលពីថ្ងៃទី២២ ខែមេសា ឆ្នាំ២០១៩ ក្នុងកិច្ចពិគ្រោះយោបល់ រដ្ឋមន្ត្រីសេដ្ឋកិច្ចអាស៊ាន និងក្រុមប្រឹក្សាធុរកិច្ចអាស៊ាន (ASEAN BAC) និង កិច្ចប្រជុំចង្អៀតរដ្ឋមន្ត្រីសេដ្ឋកិច្ចអាស៊ាន លើកទី២៥ ដែលរៀបចំឡើងនៅសណ្ឋាគារ Angsana Laguna Phuket នៅកោះភូកេត ប្រទេសថៃ។ ក្រសួងបានឲ្យដឹងថា កិច្ចពិគ្រោះយោបល់ រដ្ឋមន្ត្រីសេដ្ឋកិច្ចអាស៊ាន និងក្រុមប្រឹក្សាធុរកិច្ចអាស៊ាន មានការអញ្ជើញចូលរួមពីរដ្ឋមន្ត្រីសេដ្ឋកិច្ចអាស៊ានទាំង១០ អគ្គលេខាធិការអាស៊ាន គណៈប្រតិភូនៃប្រទេសសមាជិកអាស៊ាន លេខាធិការដ្ឋានអាស៊ាន និងតំណាង ASEAN BAC ដោយផ្តោតសំខាន់លើការពង្រឹងអាស៊ាន ៤.០ ជាពិសេសសេដ្ឋកិច្ចឌីជីថលសម្រាប់សហគ្រាសមីក្រូ តូច និងមធ្យម គោលនយោបាយ និងធនធានមនុស្ស, កិច្ចសម្រួលពាណិជ្ជកម្ម និងការតភ្ជាប់ពាណិជ្ជកម្មក្នុងតំបន់។
ក្នុងកិច្ចប្រជុំនោះផងដែរ លោករដ្ឋមន្ត្រីក៏បានជម្រាបអំពីសំណើរបស់កម្ពុជា ក្នុងស្នើសុំឲ្យមានសេចក្តីប្រកាសរួមអាស៊ានស្តីពី ការដាក់វិធានការការពាររបស់សហភាពអឺរ៉ុបមកលើអង្ករ Indica កម្ពុជា ដែលធ្វើឲ្យប៉ះពាល់ដល់ការនាំចេញអង្កររបស់កម្ពុជា និងស្នើឲ្យប្រទេសជាសមាជិកអាស៊ាន ណែនាំស្ថានបេសកកម្មរបស់ខ្លួន ប្រចាំអង្គការពាណិជ្ជកម្មពិភពលោក នៅទីក្រុងហ្សឺណែវ ប្រទេសស្វីស ដើម្បីចេញសេចក្តីប្រកាសគាំទ្រកម្ពុជា។ រដ្ឋមន្ត្រីសេដ្ឋកិច្ចអាស៊ានបានឯកភាព និងគាំទ្រសំណើរបស់របស់កម្ពុជានេះ។
ក្រសួងបន្តថា កិច្ចប្រជុំក៏បានពិនិត្យ និងឯកភាពលើការទទួលស្គាល់ទៅវិញទៅមក ស្តីពីយានយន្ត និងយន្តការដោះស្រាយជម្លោះដែលត្រូវបានកែសម្រួល។ កិច្ចប្រជុំក៏បានពិភាក្សាលើសំណើបង្កើតសហគមន៍អាស៊ីខាងកើត ក៏ដូចជាការចូលរួមវិភាគទានដល់វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីខាងកើត (ERIA) ផងដែរ៕
Source: Kampuchea Thmey Daily
0 Comments