ភ្នំពេញ ៖ មន្ដ្រីយោធាមួយរូប ដែលមានឋានៈឧត្តមសេនីយ៍ត្រី និងភរិយា ជាមន្ត្រីជាន់ខ្ពស់នៅក្រសួងមហាផ្ទៃ ហើយដែលត្រូវចាប់ខ្លួនពាក់ព័ន្ធករណីឆបោកលុយរាប់ម៉ឺនដុល្លារ ដើម្បីរត់ការឲ្យកូនចៅរបស់ប្រជាពលរដ្ឋបានចូលបម្រើការងារជាទាហាន ប៉ូលិស និងគ្រូបង្រៀនជាដើមនោះ ត្រូវបានសមត្ថកិច្ចបញ្ជូនទៅអយ្យការយោធាហើយ នេះបើតាមការបញ្ជាក់ពីមន្ត្រីជាន់ខ្ពស់កងរាជអាវុធហត្ថលើផ្ទៃប្រទេស។
លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានថ្លែងប្រាប់កម្ពុជាថ្មី កាលពីរសៀលថ្ងៃទី២៤ ខែមេសា ឆ្នាំ២០១៩នេះថា កងរាជអាវុធហត្ថលើផ្ទៃប្រទេសបានសម្រេចបញ្ជូនឧត្តមសេនីយ៍យោធានោះ ទៅអយ្យការយោធាហើយនៅថ្ងៃទី២៤ ខែមេសា ឆ្នាំ២០១៩នេះ។
ចំណែកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបានថ្លែងប្រាប់កម្ពុជាថ្មីដែរថា ករណីនេះសមត្ថកិច្ចបានចាត់វិធានការតាមច្បាប់ហើយ។ នាយឧត្តមសេនីយ៍បញ្ជាក់យ៉ាងនេះថា “ព្រឹកមិញគេរាយការមកថា អនុវត្តតាមនីតិវិធីហើយ”។
ទាក់ទងបញ្ហានេះ កម្ពុជាថ្មីមិនអាចស្វែងរកការបញ្ជាក់ពីអយ្យការយោធា អំពីចំណាត់ការផ្លូវច្បាប់លើឧត្តមសេនីយ៍យោធា និងភរិយានោះ បាននៅឡើយទេ រហូតមកដល់រសៀលថ្ងៃទី២៤ ខែមេសា ឆ្នាំ២០១៩។
សូមបញ្ជាក់ថា លោកឧត្តមសេនីយ៍ត្រី ឃួន សុវណ្ណ នាយករងអធិការកិច្ច អគ្គបញ្ជាការ និងភរិយា គឺអ្នកស្រី ប៉ុន ស៊ីណាត ហៅ ទ្រី ណាត ដែលជាមន្ត្រីជាន់ខ្ពស់មួយរូបនៅក្រសួងមហាផ្ទៃ ត្រូវបានកម្លាំងសមត្ថកិច្ចកងរាជអាវុធហត្ថលើផ្ទៃប្រទេស សហការតាមចាប់ខ្លួនបានកាលពីយប់ថ្ងៃទី២៣ ខែមេសា ឆ្នាំ២០១៩ ក្រោយពីមានពាក្យបណ្ដឹងរបស់ប្រជាពលរដ្ឋ ជាច្រើននាក់ នៅក្នុងស្រុកបារាយណ៍ ខេត្តកំពង់ធំ ដោយប្ដឹងចោទប្រកាន់ករណីបោកប្រាស់លុយរាប់ម៉ឺនដុល្លារ ជាថ្លៃរត់ការឲ្យកូនចៅរបស់ពួកគេ អាចចូលបម្រើការងាររដ្ឋបានជាដូចជា ទាហាន ប៉ូលិស និងគ្រូបង្រៀនជាដើម។
តាមព័ត៌មានពីកងរាជអាវុធហត្ថលើផ្ទៃប្រទេសបានបញ្ជាក់ថា នៅថ្ងៃទី២១ និងថ្ងៃទី២៣ ខែមេសា ឆ្នាំ២០១៩ កម្លាំងស្នងការដ្ឋានស្រាវជ្រាវព័ត៌មានសន្តិសុខ ដោយមានការសហការពីស្នងការដ្ឋានស្រាវជ្រាវបង្ក្រាបបទល្មើស និងកម្លាំងកងរាជអាវុធហត្ថខេត្តបន្ទាយមានជ័យ, កណ្តាល, កំពង់ចាម, កំពង់ឆ្នាំង បានឃាត់ខ្លួនឈ្មោះ ឃួន សុវណ្ណ ជាឧត្តមសេនីយ៍ត្រី នាយករងអធិការកិច្ច អគ្គបញ្ជាការ និងអ្នកស្រី ប៉ុន ស៊ីណាត ហៅទ្រី ណាត ដែលជាមេក្លោងក្នុងការឆរបោក និងជ្រើសរើសកម្លាំងប្រដាប់អាវុធខុសច្បាប់ ប្រព្រឹត្តិនៅខេត្តកំពង់ធំ។ តាមព័ត៌មាននោះអះអាងថា ពួកគេ គឺជាមុខសញ្ញាចាស់ មានបទពិសោធន៍ក្នុងការឆបោកប្រជាពលរដ្ឋ។ ពួកគេធ្វើសកម្មភាពអស់រយៈពេល៨ខែមកហើយ មានជនរងគ្រោះដែលជាប្រជាពលរដ្ឋប្រហែល៣០នាក់ និងបាត់បង់ថវិការាប់សិបម៉ឺនដុល្លារ ហើយមានប្រជាពលរដ្ឋចំនួន២១នាក់ បានមកប្តឹងដល់បញ្ជាការដ្ឋានកងរាជអាវុធហត្ថលើផ្ទៃប្រទេស ក្រោយទទួលបានបទបញ្ជាភ្លាម កម្លាំងស្នងការដ្ឋានស្រាវជ្រាវព័ត៌មានសន្តិសុខ បានចុះបង្ក្រាបទាន់ពេលវេលា។
តាមរបាយការណ៍បានឲ្យដឹងដែរថា ករណីនោះ មានប្រជាពលរដ្ឋច្រើននាក់ បានចាញ់បោក ហើយអ្នកខ្លះចាញ់បោកចាប់ពី១៥០០ដុល្លារ រហូតដល់ជាង៦០០០ដុល្លារ ទៅលើបុគ្គលទាំងពីរនាក់ប្ដីប្រពន្ធនេះ ដើម្បីឲ្យពួកគេរត់ការនាំកូនចៅរបស់ខ្លួនឲ្យចូលធ្វើជានគរបាល ជាទាហាន ជាអាវុធហត្ថ និងគ្រូបង្រៀនជាដើម ហើយបើទោះបីជាទំហំទឹកប្រាក់មិនទាន់អាចបញ្ជាក់ពិតប្រាកដ ប៉ុន្ដែអាចសន្និដ្ឋានបានថា ចន្លោះពី១០ ទៅ២០ម៉ឺនដុល្លារ ដែលពួកគេបានបោកប្រាស់ពីប្រជាពលរដ្ឋ ហើយមូលហេតុដែលនាំឲ្យប្រជាពលរដ្ឋជាច្រើននាក់ ធ្លាក់ខ្លួនក្នុងអំពើឆបោកនេះ ដោយសារពីរនាក់ប្ដីប្រពន្ធនេះ ក៏ព្រោះតែប្រជាពលរដ្ឋបានស្គាល់ពួកគេ ធ្លាប់បានចុះចែកអំណោយជូនប្រជាជននៅតំបន់ដាច់ស្រយាលជាច្រើនលើក រហូតធ្វើឲ្យពួកគាត់ជឿទុកចិត្ត ទើបមកពឹងពាក់យ៉ាងដូច្នេះ៕
Source: Kampuchea Thmey Daily
0 Comments