កាលពីថ្ងៃចន្ទ ក្រុមប្រឹក្សាសន្តិសុខអង្គការសហប្រជាជាតិបានជំរុញឲ្យមីយ៉ាន់ម៉ាបង្កើនកិច្ចខិតខំប្រឹងប្រែងដើម្បីឲ្យជនភៀសខ្លួនរ៉ូហ៊ីងយ៉ាវិលត្រឡប់មកកាន់ប្រទេសវិញដោយសុវត្ថិភាពនិងដោយស្ម័គ្រចិត្ត។
ក្នុងអំឡុងពេលនៃកិច្ចប្រជុំបិទទ្វារមួយ, សមាជិកក្រុមប្រឹក្សាទាំង១៥ប្រទេសបានអំពាវនាវឲ្យមានជំនួយអភិវឌ្ឍន៍សង្គមនិងសេដ្ឋកិច្ចកាន់តែច្រើនហើយជួយសម្រួលដល់ការវិលត្រឡប់របស់ជនភៀសខ្លួនរ៉ូហ៊ីងយ៉ានិងអ្នកផ្លាស់ទីលំនៅក្នុងរដ្ឋរ៉ាក់ឃីន។
សេចក្តីថ្លែងការណ៍មួយបានឲ្យដឹងថា “សមាជិកក្រុមប្រឹក្សាសន្តិសុខត្រូវតែបន្តសង្កត់ធ្ងន់លើសារៈសំខាន់នៃការស៊ើបអង្កេតដោយឯករាជ្យនិងមានតម្លាភាពចំពោះការចោទប្រកាន់អំពីការរំលោភនិងបំពានសិទ្ធិមនុស្ស”។
បេសកជនអង្គការសហប្រជាជាតិប្រចាំប្រទេសមីយ៉ាន់ម៉ាលោកស្រី Christine Schraner Burgener បាននិយាយថា រដ្ឋាភិបាលបានអនុគ្រោះចំពោះការវិលត្រឡប់មកកាន់រដ្ឋរ៉ាក់ឃីនវិញសម្រាប់ជនជាតិរ៉ូហ៊ីងយ៉ារាប់សែននាក់ដែលបានភៀសខ្លួនចេញពីតំបន់នេះ។
លោកស្រី Burgener បាននិយាយទៀតថា “អាជ្ញាធរបានប្រកាសដោយបើកចំហថា ពួកគេចង់នាំអ្នកទាំងនោះត្រឡប់មកវិញ”។ ប៉ុន្តែលោកស្រីបានកត់សម្គាល់ថា ភាពតានតឹងនៅតែមាននៅក្នុងរដ្ឋរ៉ាក់ឃីនរវាងពួករ៉ូហ៊ីងយ៉ាដែលជាជនជាតិភាគតិចមូស្លីមនិងពុទ្ធសាសនិក។
លោកស្រីបានបន្តថា “ដូច្នេះពួកគេចង់នាំអ្នកទាំងនោះត្រឡប់មកវិញប៉ុន្តែពួកគេត្រូវត្រឡប់មកវិញដោយស្ម័គ្រចិត្ត មានសុវត្ថិភាព ប្រកបដោយសេចក្តីថ្លៃថ្នូរនិងជានិរន្តរភាព”។
បេសកជនរូបនេះបានធ្វើដំណើរទៅកាន់ប្រទេសមីយ៉ាន់ម៉ាពីរដងរួចមកហើយចាប់តាំងពីចូលកាន់តំណែងកាលពីពីរខែមុនមកហើយនឹងធ្វើដំណើរទៅកាន់ប្រទេសនេះម្តងទៀតនៅខែកញ្ញាដោយគ្រោងនឹងធ្វើដំណើរទៅកាន់រដ្ឋផ្សេងទៀតនៅក្នុងប្រទេសមីយ៉ាន់ម៉ា។
គួររម្លឹកឡើងវិញថា នៅចុងខែសីហាឆ្នាំ២០១៧ ពួកឧទ្ទាមមកពីសហគមន៍ឥស្លាមរ៉ូហ៊ីងយ៉ាបានងើបបះបោរដោយស្តីបន្ទោសការធ្វើទុក្ខបុកម្នេញចំពោះជនជាតិភាគតិចគ្មានរដ្ឋមួយនេះនៅក្នុងប្រទេសមីយ៉ាន់ម៉ា។
ជនជាតិរ៉ូហ៊ីងយ៉ាជាង៧០០,០០០នាក់បានភៀសខ្លួនពីការវាយលុកមួយដោយកងទ័ពមីយ៉ាន់ម៉ាដែលបានចាប់ផ្តើមកាលពីមួយឆ្នាំមុនដើម្បីជាការសងសឹកចំពោះការវាយប្រហារលើប៉ុស្តិ៍ព្រំដែនដោយពួកឧទ្ទាមរ៉ូហ៊ីងយ៉ា៕ AFP
Source: Kampuchea Thmey Daily
0 Comments