ភ្នំពេញ ៖ លោក សេង សុភគ៌ ដែលជានាយកក្រុមហ៊ុនលក់ឡានបង់រំលស់តាមរបៀបបោកប្រាស់ប្រជាពលរដ្ឋ ប្រើល្បិចឡានមួយគ្រឿងបង្វិលបានពី៥ ទៅ៦ម្ចាស់ ទីបំផុតបែកការ ប្រជាពលរដ្ឋនាំគ្នាចោមរោមប្ដឹងទៅគ្រប់ស្ថាប័ន និងជំនាញពាក់ព័ន្ធ រហូតឈានដល់ការចាប់ខ្លួននៅរសៀលថ្ងៃទី២១ ខែមេសា ឆ្នាំ២០១៩នេះ ខណៈរត់ចូលក្នុងហាងស៊ុបមួយកន្លែង តាមផ្លូវ២៨៩ សង្កាត់បឹងកក់១ ខណ្ឌទួលគោក។
ពលរដ្ឋជនរងគ្រោះបានឲ្យដឹងថា ក្រុមហ៊ុន សេង ហួត មានលោកសេង សុភគ៌ ជាអគ្គនាយក ឯក្រុមហ៊ុនNH Cars មានលោក ណំ ហម ជាប្រធាន។ ក្រុមហ៊ុនទាំងពីរនេះ បានសហការគ្នាបោកប្រាស់ប្រជាពលរដ្ឋតាមរូបភាពទិញឡានបង់រំលស់ ដោយឲ្យបង់មុនចាប់ពី៥ ឬ៦ពាន់ដុល្លារ និងច្រើនជាងនេះទៅតាមប្រភេទឡាន សេង ពីក្រុមហ៊ុន សេង ហួត ប៉ុន្តែក្រោយពីពលរដ្ឋជាអតិថិជនយកឡានទៅជិះបានមួយរយៈពេលខ្លី ស្រាប់តែលេចមុខអ្នកផ្សេង ដែលគេដឹងថាជាមនុស្សរបស់ក្រុមហ៊ុន NH Cars របស់ លោក ណំ ហម បានសហការប្រើល្បិច ថាត្រូវយករថយន្ដដែលអតិថិជនកំពុងជិះនោះ ទៅបំពាក់ ជីភីអេស GPS ជាដើម ខ្លះទៀតចោទត្រង់ៗថា ក្រុមហ៊ុន សេង ហួតនោះ បោកយកឡានរបស់ គេ (ណំ ហម) ឥឡូវគេតាមរកឃើញសុំដកយកវិញជាដើម ធ្វើឲ្យពលរដ្ឋដែលជាអ្នកបង់រំលស់នោះស្រឡាំងកាំង រកនិយាយអីមិនចេញសោះ។ ដល់ពេល ងាកមករកក្រុមហ៊ុនដើម គឺ ក្រុមហ៊ុន សេង ហួត បែរជា លោកអគ្គនាយក សេង សុភ៌ រត់គេចខ្លួនបាត់ មិនព្រមទទួលខុសត្រូវទៀត ចឹងមានតែប្ដឹងសមត្ថកិច្ច។
ប្រជាពលរដ្ឋនិយាយថា ក្រុមហ៊ុននេះប្រើល្បិច ក្នុងឡានមួយគ្រឿង យកទៅលក់ អាចរហូតដល់ទៅ៥ ទៅ ៦នាក់ឯណោះ បង្វិលចុះឡើងៗរកម្ចាស់ពិតមិនឃើញឡើយ ទីបំផុត ក៏បែកធ្លាយរឿងតែម្ដង ។
សមត្ថកិច្ចបានឲ្យដឹងថា ក្រុមហ៊ុន សេង ហួត ទិញ លក់ ជួល បង់រំលស់រថយន្តគ្រប់ប្រភេទ ដែលមានទីតាំងផ្ទះលេខ៦២៧ ផ្លូវលំ ភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានអគ្គនាយក ឈ្មោះ សេង សុភគ៌ ភេទប្រុស កាន់អត្តសញ្ញាណប័ណ្ណលេខ ០១០៩១៨៦០៨ មានទីលំនៅ ផ្ទះតាមផ្លូវលំ ភូមិគោកឃ្លាង សង្កាត់គោកឃ្លាង ខណ្ឌសែនសុខ។ ចំណែកក្រុមហ៊ុន ជាដៃគូរួមគ្នាឆបោកលុយប្រជាពលរដ្ឋមួយទៀត ឈ្មោះ NH Cars (ណំ ហម) ដែលមានទីតាំងស្ថិតនៅ ផ្ទះលេខ៤៣ ផ្លូវ១៩៧៤ ភូមិពោងពាយ សង្កាត់ភ្នំពេញថ្មី ខណ្ឌសែនសុខ។
ប្រភពបន្តទៀតថា កន្លងមក ជនរងគ្រោះ បានប្តឹងទៅអាជ្ញាធរ សមត្ថកិច្ច ក្នុងខណ្ឌពោធិ៍សែនជ័យ ខ្លះប្តឹងទៅអាវុធហត្ថ ខ្លះប្តឹងទៅក្រសួងមហាផ្ទៃ ហើយមានអ្នកខ្លះប្តឹងស្ថាប័នតុលាការ ផ្ទាល់តែម្តង ខណៈដែល លោក សេង សុភគ៌ ពុំមានដំណោះស្រាយ ទោះជួលមេធាវី មកដោះស្រាយ ក៏នៅតែមិនចេញ ព្រោះ លោក សេង សុភគ៌ វេចលុយរត់គេចខ្លួន ដោះសា ភូតកុហកវិលក្បុង។ ប៉ុន្តែនៅរសៀល ថ្ងៃទី២០ ខែមេសា ឆ្នាំ២០១៩ បែកធ្លាយ ថា រថយន្តដែលអតិថិជនទិញបង់រំលស់ចេញពី ក្រុមហ៊ុន ណំ ហម ដែលមានទីតាំងនៅក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ ពេលសមត្ថកិច្ចសាកសួរ ពិនិត្យផ្ទៀងផ្ទាត់ឯកសារ ឡានចេញពីក្រុមហ៊ុន សេង ហួតទៅវិញ ហើយរកឃើញរថយន្តដល់ទៅ៧គ្រឿង មានភាពមិនប្រក្រតី ដែលម្នាក់ៗអស់រាប់ពាន់ម៉ឺនដុល្លារ ហើយជនរងគ្រោះក៏បានប្តឹសមត្ថកិច្ច ដោយសារ ក្រុមហ៊ុន សេង ហួត និង ក្រុមហ៊ុន ណំ ហម សហការគ្នាបោកយកលុយប្រជាពលរដ្ឋ។
លុះមកដល់វេលាម៉ោង១រសៀល ថ្ងៃទី២១ ខែមេសា ឆ្នាំ២០១៩ ពលរដ្ឋជាជនរងគ្រោះ គ្រាន់តែក្រឡេកឃើញ លោកអគ្គនាយក សេង សុភគ៌ បើករថយន្តតាមផ្លូវ ដេញតាមរត់ចូលទៅក្នុងហាង ម៉ាស្ទ័រ ស៊ូគីស៊ុប ផ្លូវ២៨៩ សង្កាត់បឹងកក់១ ខណ្ឌទួលគោក ឡោមព័ទ្ធ ប្តឹងប៉ូលិសចុះទៅអន្តរាគមន៍ ចាប់ខ្លួន លោកអគ្គនាយក មេខ្លោងបោកប្រាស់បានតែម្តង រួចនាំទៅកាន់ក្រសួងមហាផ្ទៃភ្លាមៗ ដើម្បីសាកសួរពីល្បិចឆបោកយ៉ាងល្បីកក្រើកស្រុកខ្មែរ រឿងទិញឡានបង់រំលស់៕
Source: Kampuchea Thmey Daily
0 Comments