បាត់ដំបង ៖ ជនសង្ស័យចំនួន២នាក់ ដែលជាមុខសញ្ញាចែកចាយថ្នាំញៀនខុសច្បាប់ ត្រូវបានសមត្ថកិច្ចឃាត់ខ្លួនបានជាបន្តបន្ទាប់ រួមនឹងថ្នាំញៀនមួយចំនួនផងដែរ។
កិច្ចប្រតិបត្តិការនេះបានធ្វើឡើងនៅថ្ងៃទី២១ ខែមេសា ឆ្នាំ២០១៩ វេលាម៉ោង៣និង១០នាទីរសៀល នៅចំណុចភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង ដោយកម្លាំងអធិការដ្ឋាននគរបាលស្រុកសំពៅលូន ដឹកនាំដោយលោកវរសេនីយ៍ឯក ពេជ្រសារ៉ែន។
ការចុះបង្ក្រាបករណីជួញដូរចែកចាយគ្រឿងញៀនខុសច្បាប់ នេះគឺបានធ្វើការឃាត់ខ្លួនជនសង្ស័យចំនួន ០១នាក់ ឈ្មោះ ឌុំ វ៉ាន់នី ភេទប្រុស អាយុ ២៤ឆ្នាំ មានទីលំនៅ ភូមិឈើទាល ឃុំសិរីមានជ័យ ស្រុកសំពៅលូន ខេត្តបាត់ដំបង ដោយកម្លាំងសមត្ថកិច្ចបានដកហូតវត្ថុតាងរួមមាន ថ្នាំញៀនប្រភេទ យ៉ាម៉ាចំនួន ៨០គ្រាប់ និង ថ្នាំញៀនប្រភេទម៉ាទឹកកកចំនួន០២ថង់ រួមជាមួយនឹងទូរស័ព្ទដៃចំនួន ០១គ្រឿងផងដែរ។
យោងតាមចម្លើយសារភាពរបស់ ឈ្មោះ ឌុំ វ៉ាន់នី និងមានការអនុញ្ញាតពី លោក នួន សាន ព្រះរាជអាជ្ញា នៃសាលាដំបូងខេត្តបាត់ដំបងផងនោះ នៅថ្ងៃដដែល វេលាម៉ោង៤និង៣៥នាទី កម្លាំងសមត្ថកិច្ចបន្តបង្ក្រាបបានចំនួន០១ករណីបន្ថែមទៀត នៅចំណុច ភូមិ ស្ពានយោល ឃុំជ្រៃសីម៉ា ស្រុកសំពៅលូន ខេត្តបាត់ដំបង និង ឃាត់ខ្លួនជនសង្ស័យចំនួន០១នាក់ទៀត ឈ្មោះ ឡឹប ញ៉ក់ ភេទប្រុស អាយុ៣៩ឆ្នាំ មានទីលំនៅភូមិស្ពានយោល ឃុំជ្រៃសីមា ស្រុកសំពៅលូន ព្រមទាំងបាន ដកហូតវត្ថុតាង ថ្នាំញៀនប្រភេទយ៉ាម៉ា ចំនួន៣០គ្រាប់ និងទូរស័ព្ទដៃ ចំនួន០១គ្រឿង។
បច្ចុប្បន្ន ជនសង្ស័យ និង វត្ថុតាង សមត្ថកិច្ចកំពុងកសាងសំណុំរឿងបញ្ជូនទៅសាលាដំបូងខេត្តបាត់ដំបងចាត់ការតាមនីតិវិធីច្បាប់៕
Source: Kampuchea Thmey Daily
0 Comments