ឧត្តរមានជ័យ ៖ មានករណីវាយបំផ្លិចបំផ្លាញទ្រព្យសម្បត្តិអ្នកដទៃ០១ករណី បង្កឡើងដោយឈ្មោះ ខាត់ ប៊ុនថង ភេទ ប្រុស អាយុ ២៣ឆ្នាំ ហើយរូបគេត្រូវបានធ្វើឃាត់ខ្លួន កាលពីវេលាម៉ោង៧និង៣០នាទី ថ្ងៃទី២២ ខែមេសា ឆ្នាំ២០១៩ ភូមិដូនកែនសែនជ័យ សង្កាត់សំរោង ក្រុងសំរោង ខេត្តឧត្តរមានជ័យ។
លោកឧត្ដមសេនីយ៍ត្រី ឡឹក សុខា ស្នងការរងផ្នែកព្រហ្មទណ្ឌបានឲ្យដឹងថា នៅវេលាម៉ោង៧និង០០នាទីព្រឹក ថ្ងៃ២២ ខែមេសា ឆ្នាំ២០១៩ ការិយាល័យព្រហ្មទណ្ឌកម្រិតស្រាល បានទទួលបណ្តឹងតាមទូរស័ព្ទពីជនរងគ្រោះ ឈ្មោះ គង់ លាន ភេទប្រុស អាយុ២៦ឆ្នាំ រស់នៅភូមិកំណប់ សង្កាត់បន្សាយរាក់ ក្រុងសំរោង ថា មានករណីវាយបំផ្លាញទ្រព្យសម្បត្តិរបស់គាត់។ ភ្លាមៗកម្លាំងសមត្ថកិច្ចនគរបាល បានចុះដល់កន្លែងកើតហេតុ និងឃាត់ជនសង្ស័យខាងលើ។
បើតាមចម្លើយសារភាព ជនសង្ស័យថា ខ្លួនពិតជាបានវាយពាងទឹករបស់ ឈ្មោះ គង់ លាន បែក០១ ពិតប្រាកដមែន។ ដោយមូលហេតុ ខឹងនឹងជនរងគ្រោះឌុបខ្លួនទៅលេងផ្ទះទុកវាចោល ហើយជនរងគ្រោះទៅជួបស្រីស្នេហ៍បាត់ ធ្វើឲ្យជនសង្ស័យខឹងយ៉ាងខ្លាំងទើបវាយបំបែកពាងទឹករបស់ជនរងគ្រោះតែម្តងទៅហើយករណីនេះ សមត្ថកិច្ច កំពុងចាត់ការតាមនីតិវិធី៕
Source: Kampuchea Thmey Daily
0 Comments