តារាកំប្លែងដែលមិនមានបទពិសោធន៍ផ្នែកនយោបាយបានទទួលជ័យជម្នះយ៉ាងភ្ល្លូកទឹកភ្លូកដីនៅក្នុងការបោះឆ្នោតប្រធានាធិបតីរបស់ប្រទេសអ៊ុយក្រែនកាលពីថ្ងៃអាទិត្យហើយលោកទទួលបានការអបអរសាទរពីសំណាក់មេដឹកនាំពិភពលោក។ យោងតាមលទ្ធផលជាផ្លូវការបានបង្ហាញថា លោក Volodymyr Zelensky បានផ្ដួលលោក Petro Poroshenko ដោយទទួលសំឡេងឆ្នោតបាន៧៣ភាគរយ។
លោក Poroshenko ទទួលបានត្រឹមតែ២៤ភាគរយប៉ុណ្ណោះដោយចាញ់តារាកំប្លែងនិងតារាសម្ដែងវ័យ៤១ឆ្នាំនៅទូទាំងប្រទេសរូបនេះខណៈសន្លឹកឆ្នោត៤២ភាគរយត្រូវបានរាប់។វាជាលទ្ធផលមិនធម្មតាចំពោះយុទ្ធនាការមួយដែលបានចាប់ផ្តើមឡើងត្រឹមតែជារឿងកំប្លែងមួយប៉ុណ្ណោះប៉ុន្តែបានឆក់យកដួងចិត្តអ្នកបោះឆ្នោតដែលមានការអាក់អន់ចិត្តដោយសារតែភាពអយុត្តិធម៌សង្គមអំពើពុករលួយនិងសង្គ្រាមជាមួយក្រុមបំបែកខ្លួនដែលគាំទ្រដោយរុស្ស៊ីនៅភាគខាងកើតប្រទេសអ៊ុយក្រែនដែលបានសម្លាប់មនុស្សប្រមាណ១៣,០០០នាក់។
ឥឡូវនេះតារាភាពយន្តទូរទស្សន៍ “Servant of the People” រូបនេះនឹងក្លាយជាអ្នកដឹកនាំនៃប្រទេសដែលមានប្រជាជន៤៥លាននាក់មួយនេះខណៈប្រទេសកំពុងប្រឈមនឹងការប្រកួតប្រជែង។ លោក Zelensky បានប្រាប់អ្នកគាំទ្រនៅឯទីស្នាក់ការកណ្ដាលនៃយុទ្ធនាការរបស់គាត់ថា “ខ្ញុំនឹងមិនចុះចាញ់ទេ។ ខ្ញុំអាចប្រាប់ទៅគ្រប់ប្រទេសក្រោយសូវៀតទាំងអស់ថាយើងអាចធ្វើបានគ្រប់យ៉ាង!”។
ការលើកឡើងបែបនេះហាក់ដូចជាសំដៅទៅប្រទេសជិតខាងរុស្ស៊ីដែលលោក Vladimir Putin បានកាន់អំណាចអស់រយៈពេល២០ឆ្នាំមកហើយ។ មានការអបអរសារទរពីអឺរ៉ុបនិងក្រៅពី នេះដោយក្នុងនោះប្រធានាធិបតីបារាំងលោក Emmanuel Macron និងលោក Andrzej Duda នៃប្រទេសប៉ូឡូញបានអបអរសាទរប្រធានាធិបតីជាប់ឆ្នោតអ៊ុយក្រែនតាមទូរស័ព្ទ។
ចំណែករដ្ឋមន្ត្រីការបរទេសអង់គ្លេសលោក Jeremy Hunt បាននិយាយនៅលើ Twitter ថា “ឥឡូវនេះអ្នកពិតជាអ្នកបំរើរបស់ប្រជាជន”។ ស្របពេលជាមួយគ្នានោះដែរ អគ្គលេខាធិការអង្គការណាតូលោក Jens Stoltenberg និងប្រធានក្រុមប្រឹក្សាអឺរ៉ុបលោក Donald Tusk បានថ្លែងថាពួកគេសម្លឹងទៅរកការបន្តការគាំទ្រនិងកិច្ចសហប្រតិបត្តិការ៕ AFP
Source: Kampuchea Thmey Daily
0 Comments