រន្ទះបាញ់ ស្លាប់ពីរនាក់ ខណៈខ្យល់កន្ត្រាក់របើកដំបូលលំនៅដ្ឋានពលរដ្ឋ១៥៦ខ្នង

Cambodia News April 22, 2019

បន្ទាយមានជ័យ ៖ បុរសពីរនាក់ បានស្លាប់ភ្លាមៗ ដោយសាររន្ទះបាញ់ចំពេលជិះម៉ូតូត្រឡប់មកផ្ទះស្របពេលលំនៅដ្ឋានពលរដ្ឋ១៥៦ខ្នង ត្រូវបានខ្យល់កន្ត្រាក់បក់បោកប៉ើងដំបូល។

ហេតុការណ៍គ្រោះធម្មជាតិនេះ បានកើតឡើងកាលពីនៅល្ងាចថ្ងៃទី២១ ខែមេសា ២០១៩ ហើយខ្យល់កន្ត្រាក់បានបន្តបំផ្លាញលំនៅឋានរបស់ប្រជាពលរដ្ឋនៅខេត្តបន្ទាយមានជ័យ បង្កឲ្យខូចខាតរបើកដំបូល ជញ្ជាំង និង រលំលើ៦ស្រុក-ក្រុង សរុប១៥៦ខ្នង ក្នុងនោះមាន ៖ ក្រុងប៉ោយប៉ែត ស្រុក ភ្នំស្រុក ស្រុកមង្គលបូរី ស្រុកស្វាយចេក ស្រុកព្រះនេត្រព្រះ និង ស្រុកថ្មពួក។

ចំណែកមនុស្សដែលត្រូវរន្ទះបាញ់ស្លាប់ពីរនាក់ គឺស្ថិតនៅភូមិឈូកឃុំចង្ហា ស្រុកអូរជ្រៅ ខេត្តបន្ទាយមានជ័យ ដោយជនរងគ្រោះជាអ្នកបើកបរមានឈ្មោះ កែវ មុនី អាយុ៤០ឆ្នាំ ទីលំនៅភូមិកើតហេតុ។

ជុំវិញហេតុការណ៍ខាងលើនេះ ថ្លែងក្នុងពិធីបើកការដ្ឋានសាងសង់ច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ កាលពីព្រឹកថ្ងៃទី២២ ខែមេសា ឆ្នាំ២០១៩ សម្ដេចតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងសារចូលរួមមរណទុក្ខជាមួយក្រុមគ្រួសារ នៃជនរងគ្រោះទាំងពីរ និងចូលរួមសោកស្តាយចំពោះការខូចខាតផ្ទះសំបែងដោយខ្យល់កន្ត្រាក់ ព្រមទាំងទ្រព្យសម្បត្តិ។

សូមបញ្ជក់ថា ហេតុការណ៍គ្រោះធម្មជាតិនេះ ជាញឹកញាប់ បានបង្កឲ្យខូចខាតលំនៅដ្ឋានរបស់ប្រជាពលរដ្ឋខេត្តបន្ទាយមានជ័យរាប់រយខ្នង៕