ប្រធានាធិបតីម៉ិកស៊ិកលោក Andres Manuel Lopez Obrador បានប្រាប់សហរដ្ឋអាមេរិកកាលពីថ្ងៃអង្គារថា ប្រសិនបើអាមេរិកចង់បញ្ឈប់លំហូរនៃជនអន្តោប្រវេសន៍អាមេរិកកណ្ដាលទៅកាន់ព្រំដែនភាគខាងត្បូងរបស់ខ្លួននោះ ខ្លួនចាំបាច់ត្រូវតែវិនិយោគនៅក្នុងតំបន់នេះ។ ការកាត់បន្ថយលំហូរមកពីប្រទេសម៉ិកស៊ិកគឺជាការយកចិត្តទុកដាក់ដ៏សំខាន់មួយរបស់រដ្ឋបាលលោកប្រធានាធិបតី Donald Trump ចំពេលមានសេចក្តីរាយការណ៍ជាច្រើនអំពីក្បួនជនអន្តោប្រវេសន៍ដែលកំពុងធ្វើដំណើរមកពីប្រទេសហ្គាតេម៉ាឡា អែលសាល់វ៉ាឌ័រនិងហុងឌូរ៉ាសជាមួយក្តីសង្ឃឹមថានឹងមានជីវិតល្អប្រសើរជាងមុន។
ជនអន្តោប្រវេសន៍បាននិយាយថា ពួកគេកំពុងគេចចេញពីភាពក្រីក្រនិងអំពើហឹង្សាក្រុមបងធំប៉ុន្តែលោក Trump បានចាត់ទុកមនុស្សមួយចំនួនថាជាឧក្រិដ្ឋជនហើយបានបង្កើនសម្ពាធលើប្រទេសម៉ិកស៊ិកឲ្យជួយបន្ធូរបន្ថយភាពតានតឹងលើអាជ្ញាធរអន្តោប្រវេសន៍របស់សហរដ្ឋអាមេរិក។ កាលពីថ្ងៃចន្ទ ប្រទេសម៉ិកស៊ិកបានឃាត់ខ្លួនមនុស្សចំនួន៣៦៧នាក់ដែលភាគច្រើនជាជនអន្តោរប្រវេសន៍គ្មានឯកសារហុងឌូរ៉ាសនៅក្នុងរដ្ឋ Chiapas ភាគខាងត្បូង។
លោក Lopez Obrador និយាយថា “យើងមិនចង់ប្រយុទ្ធជាមួយរដ្ឋាភិបាលសហរដ្ឋអាមេរិកទេហើយយើងក៏មិនចង់ចូលរួមក្នុងការប្រឈមមុខដាក់គ្នាផ្នែកនយោបាយដែរ។ ក្នុងពេលជាមួយគ្នានេះដោយក្តីគោរព យើងសុំស្នើឲ្យបញ្ហានេះត្រូវដោះស្រាយជាមួយនឹងការអភិវឌ្ឍន៍ ជាមួយនឹងការបង្កើតការងារ”។
លោក Trump បានប្រកាសបញ្ហានេះថាជាគ្រាអាសន្នថ្នាក់ជាតិហើយបានទាមទារឲ្យសមាជិកសភាអាមេរិកអនុម័តទឹកប្រាក់រាប់ពាន់លានដុល្លារដើម្បីកសាងជញ្ជាំងព្រំដែនក្នុងគោលបំណងទប់ស្កាត់ជនចំណាកស្រុក។ក៏ប៉ុន្តែចំនួននៃជនជាតិអាមេរិកកណ្ដាលដែលធ្វើដំណើរទៅសហរដ្ឋអាមេរិកនៅតែកើនឡើង៕ AFP
Source: Kampuchea Thmey Daily
0 Comments