រតនគិរី ៖ លោក សយ សូណា ប្រធានមន្ទីរកសិកម្មរុក្ខាប្រមាញ់ និងនេសាទខេត្តរតនគិរី បានឲ្យដឹងតាមទូរស័ព្ទកាលពីថ្ងៃទី២៣ ខែមេសា ឆ្នាំ២០១៩ថា អាជ្ញាធរខេត្តបានចាត់វិធានការយ៉ាងតឹងរ៉ឹងបំផុត ហាមឃាត់ការដឹកជញ្ជូនសត្វជ្រូកចេញ-ចូលក្នុងដែនដីរដ្ឋបាលខេត្ត ខណៈជំងឺប៉េស្តជ្រូកអាហ្វ្រិក បានសម្លាប់សត្វជ្រូកជាង១០០ក្បាលនៅក្នុងភូមិកាំ ឃុំល្អក ស្រុកអូរជុំដែលជាស្រុកទីពីរហើយដែលបានផ្ទុះជំងឺនេះ បន្ទាប់ពីស្រុកអូរយ៉ាដាវ ជាប់ព្រំដែនប្រទេសវៀតណាម បានផ្ទុះជំងឺដ៏ចង្រៃកាលពីខែកន្លងទៅនេះ។
ប្រធានមន្ទីររូបនេះ បានបន្តទៀតថា មន្ត្រីជំនាញរបស់យើង កំពុងតែធ្វើការសិក្សា ថាតើវាមានផលប៉ះពាល់ដល់សត្វជ្រូកប៉ុន្មានក្បាល ប៉ះពាល់ប៉ុន្មានភូមិនៅឃុំណាខ្លះបន្តទៀត។
បច្ចុប្បន្នអាជ្ញាធរខេត្តបាន បិទចលនានាំចេញសត្វជ្រូកទូទាំងខេត្ត និងចាត់វិធានការទប់ស្កាត់ កុំឲ្យរាលដាលបន្តនៅតាមបណ្តាស្រុកផ្សេងៗទៀត។
ចំពោះវិធានការសម្រាប់ទប់ស្កាត់ត្រូវបានលោក សយ សូណា អះអាងថា ខាងមន្ទីរបានដាក់តំបន់ដែលផ្ទុះជំងឺខាងលើជាតំបន់ហាមឃាត់ចរាចរសត្វ និងបាញ់ថ្នាំសម្លាប់មេរោគក្នុងភូមិ ព្រមទាំងបានអញ្ជើញប្រជាពលរដ្ឋដែលចិញ្ចឹមជ្រូក មកអប់រំផ្សព្វផ្សាយអំពីជំងឺប៉េស្តជ្រូកអាហ្វ្រិក និងផ្សព្វផ្សាយសេចក្ដីណែនាំរបស់រដ្ឋបាលតាម វិទ្យុ ទូរទស្សន៍ខេត្ត ជាភាសាខ្មែរនិងជាភាសាជនជាតិដើមភាគតិចមានដូចជា ចារ៉ាយ ទំពួន ព្រៅ និងគ្រឹងផងដែរ។
លោកថា ជំងឺប៉េស្តជ្រូកអាហ្វ្រិក មិនប៉ះពាល់ដល់សុខភាពមនុស្សទេ ប៉ុន្តែជំងឺនេះ កើតលើតែសត្វជ្រូកស្រុក និងជ្រូកព្រៃ ដោយសារមេរោគអាចរស់ បានរយៈពេលយូរក្នុងសាច់ជ្រូកកែច្នៃ សាច់ជ្រូកសម្ងួត និងសាច់ជ្រូកប្រឡាក់។
លោកបន្ថែមថា បច្ចុប្បន្នមិនមានវិធីព្យាបាលជំងឺនេះ ឲ្យជាសះស្បើយ និងមិនទាន់មានថ្នាំបង្ការ ឬការព្យាបាលណាមួយ ដែលមានប្រសិទ្ធភាពនៅឡើយ ដូច្នេះនៅពេលដែលសត្វជ្រូកឆ្លងជំងឺនេះ វិធានការតែមួយគត់ គឺកម្ទេចហ្វូងជ្រូកដែលទទួលរងផលប៉ះពាល់៕
Source: Kampuchea Thmey Daily
0 Comments