ប្រជាពលរដ្ឋជប៉ុនរាប់ពាន់នាក់ដោយអ្នកខ្លះមានអាយុត្រឹម៩ឆ្នាំដែលត្រូវបានគេបង្ខំឲ្យគ្រៀវក្រោមច្បាប់ហ្សែនគឺនឹងត្រូវទទួលសំណងពីរដ្ឋាភិបាលបន្ទាប់ពីសមាជិកសភាបានអនុម័តច្បាប់ជាប្រវត្តិសាស្ត្រកាលពីថ្ងៃពុធ។បន្ទាប់ពីការបោះឆ្នោតជាឯកច្ឆន្ទ លោកនាយករដ្ឋមន្ត្រី Shinzo Abe បានសម្ដែងការសោកស្ដាយយ៉ាងស្មោះស្ម័គ្រហើយនិយាយថា រដ្ឋាភិបាលសុំទោសដោយអស់ពីចិត្តចំពោះគោលនយោបាយបែបនេះ។
យោងតាមទិន្នន័យរបស់ក្រសួងសុខាភិបាលបានឲ្យដឹងថា មានមនុស្សពិការស្មារតីប្រមាណ១៦,៥០០នាក់ត្រូវបានគ្រៀវទាំងគ្មានការយល់ព្រមពីពួកគេក្រោមច្បាប់មួយដែលនៅតែមានសុពលភាពរហូតដល់ឆ្នាំ១៩៩៦។ជនរងគ្រោះម្នាក់ៗនឹងទទួលបានទឹកប្រាក់ចំនួន៣.២លានយ៉េន (២៩,០០០ដុល្លារអាមេរិក) ក្រោមវិធានការដែលត្រូវបានអនុម័តកាលពីថ្ងៃពុធប៉ុន្តែចំនួននេះត្រូវបានមើលងាយដោយអ្នកធ្វើយុទ្ធនាការថាវាមិនអាចប៉ះប៉ូវភាពធ្ងន់ធ្ងរនៃការខូចខាតបានទេ។
បញ្ហានេះបានលេចឡើងកាលពីឆ្នាំមុនបន្ទាប់ពីស្ត្រីជប៉ុនម្នាក់ដែលឥឡូវនេះស្ថិតក្នុងវ័យ៦០ឆ្នាំបានប្ដឹងរដ្ឋាភិបាលអំពីប្រតិបត្តិការគ្រៀវមួយដែលបានធ្វើឡើងក្នុងឆ្នាំ១៩៧២បន្ទាប់ពីនាងត្រូវបានគេធ្វើរោគវិនិច្ឆ័យឃើញថាមានពិការភាពផ្លូវចិត្ត។មេធាវីនិងអ្នកធ្វើយុទ្ធនាការបានរិះគន់រដ្ឋាភិបាលនិងសភាជាយូរមកហើយចំពោះការខកខានបង់ ប្រាក់សំណងដល់ជនរងគ្រោះក្នុងរយៈពេលដ៏យូរបន្ទាប់ពីច្បាប់នេះត្រូវបានបោះបង់ចោលក្នុងឆ្នាំ១៩៩៦។
រហូតមកដល់ពេលនេះ ជនរងគ្រោះប្រហែល២០នាក់បានដាក់ពាក្យបណ្ដឹងនៅទូទាំងប្រទេសដើម្បីទាមទារសំណងរហូតដល់ទៅ៣៨លានយ៉េន។សាលក្រមដំបូងស្ដីពីបញ្ហានេះនឹងត្រូវប្រកាសនៅថ្ងៃទី២៨ខែឧសភាហើយមេធាវីរបស់ដើមបណ្តឹងបានប្តេជ្ញាស្វែងរកសំណងដែលពួកគេនិយាយថាត្រូវតែសមរម្យនឹងភាពធ្ងន់ធ្ងរនៃគ្រោះថ្នាក់ដែលទទួលរង។គួរបញ្ជាក់ថា ប្រទេសអាល្លឺម៉ង់និងស៊ុយអែតក៏មានច្បាប់ដូចគ្នានេះដែរហើយរដ្ឋាភិបាលក៏បានសុំអភ័យទោសនិងបង់ប្រាក់សំណងដល់ជនរងគ្រោះផងដែរ៕ AFP
Source: Kampuchea Thmey Daily
0 Comments