ក្រុងហ្ស៊ឺណែវ ៖ លោកស្រី រ៉ូណា ស្មីត (Rhona Smith) អ្នករាយការណ៍ពិសេសរបស់ អ.ស.បទទួលបន្ទុកសិទ្ធិមនុស្សប្រចាំកម្ពុជា នឹងមកបំពេញទស្សនកិច្ចនៅកម្ពុជា រយៈពេល១១ថ្ងៃ តាមការអញ្ជើញរបស់រាជរដ្ឋាភិបាល នេះបើតាមសេចក្តីប្រកាសព័ត៌មានពីទីក្រុងហ្ស៊ឺណែវ ហើយទស្សនកិច្ច នឹងផ្តោតទៅលើស្ថានភាពសិទ្ធិមនុស្សនាពេលបច្ចុប្បន្ន និងតាមដានពីដំណើរវិវត្តន៍នានា ក្រោយពីដំណើរទស្សនកិច្ចកាលពីលើកមុន។
សេចក្តីប្រកាសព័ត៌មានពីទីក្រុងហ្ស៊ឺណែវ ចុះថ្ងៃទី២៣ ខែមេសា ឆ្នាំ២០១៩ បានបញ្ជាក់ថា "អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត នឹងមកបំពេញទស្សនកិច្ចនៅប្រទេសកម្ពុជា ចាប់ពីថ្ងៃទី២៩ ខែមេសា ដល់ថ្ងៃទី០៩ ខែឧសភា ឆ្នាំ២០១៩ តាមការអញ្ជើញរបស់រាជរដ្ឋាភិបាល”។
តាមលោកស្រី Rhona Smith បានអះអាងថា ដំណើរទស្សនកិច្ចនេះ “ខ្ញុំនឹងផ្តោតបេសកកម្មរបស់ខ្ញុំទៅលើស្ថានភាពសិទ្ធិមនុស្សនាពេលបច្ចុប្បន្ន និងតាមដានពីដំណើរវិវត្តន៍នានាចាប់តាំងពីបេសកកម្មរបស់ខ្ញុំកាលពីខែវិច្ឆិកាកន្លងមក។ ខ្ញុំមានបំណងបន្តការពិនិត្យផងដែរ ទៅលើវិស័យសិទិ្ធមនុស្ស ទាក់ទងនឹងគោលដៅអភិវឌ្ឍន៍ប្រកបដោយចីរភាព ដោយពិនិត្យជាពិសេសទៅលើការមិនរើសអើង និងសមភាព ព្រមទាំងការចូលរួម និងគណនេយ្យភាព”។
ក្នុងអំឡុងពេលដំណើរទស្សនកិច្ចរយៈពេល១១ថ្ងៃនេះ លោកស្រី Rhona Smith គ្រោងជួបប្រជុំជាមួយមន្ត្រី ជាន់ខ្ពស់របស់រដ្ឋាភិបាល តំណាងសង្គមស៊ីវិល និងសមាជិកសហគមន៍ការទូតនានា។ លោកស្រី ស្មីត នឹងបំពេញទស្សនកិច្ចផងដែរ ទៅតាមតំបន់ផ្សេងៗ ដើម្បីប្រមូលព័ត៌មានដោយផ្ទាល់។
សូមបញ្ជាក់ថា អ្នករាយការណ៍ពិសេស អ.ស.ប លោកស្រី Rhona Smith តែងតែបំពេញបេសកកម្មផ្លូវការជាប្រចាំមកកាន់ប្រទេសកម្ពុជា និងធ្វើរបាយការណ៍ប្រចាំឆ្នាំទៅក្រុមប្រឹក្សាសិទ្ធិមនុស្ស ក្រោយពីក្រុមប្រឹក្សានេះ បានតែងតាំងលោកស្រី ជាអ្នករាយការណ៍ពិសេសរបស់ អ.ស.ប ទទួលបន្ទុកសិទ្ធិមនុស្សប្រចាំកម្ពុជា កាលពីខែមីនា ឆ្នាំ២០១៥ ហើយលោកស្រី នឹងបង្ហាញរបាយការណ៍ទៅក្រុមប្រឹក្សាសិទ្ធិមនុស្ស នៅខែកញ្ញា ឆ្នាំ២០១៩ ខាងមុខ។
នៅពេលបញ្ចប់ដំណើរទស្សនកិច្ច លោកស្រី Rhona Smith នឹងធ្វើសន្និសីទសារព័ត៌មានមួយ ដើម្បីពិភាក្សាអំពីលទ្ធផលស្រាវជ្រាវបឋមនៃដំណើរទស្សនកិច្ចរបស់លោកស្រី ដែលសន្និសីទនេះ នឹងប្រព្រឹត្តទៅនៅថ្ងៃព្រហស្បតិ៍ ទី០៩ ខែឧសភា នៅវេលាម៉ោង៣រសៀល ម៉ោងក្នុងប្រទេសកម្ពុជា នៅការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដែលមានអាសយដ្ឋាន អគារលេខ៤ ផ្លូវ២៧១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ៕
Source: Kampuchea Thmey Daily
0 Comments