ក្រុម មន្ត្រីបាននិយាយកាលពីថ្ងៃចន្ទថា អ្នកជួយសង្គ្រោះជីវិតជាឪពុកនិងកូនបានលង់ទឹកស្លាប់ ខណៈ កំពុងព្យាយាមជួយសង្គ្រោះភ្ញៀវទេសចរម្នាក់ចេញពីសមុទ្រនៅជិតកន្លែងទេសចរណ៍ដ៏ល្បីល្បាញបំផុតមួយរបស់អូស្ត្រាលីនៅឆ្នេរសមុទ្រភាគខាងត្បូង។ លោក Ross Powell អាយុ៧១ឆ្នាំនិងកូនប្រុសរបស់គាត់ឈ្មោះ Andrew អាយុ៣២ឆ្នាំបានស្លាប់កាលពីថ្ងៃអាទិត្យបន្ទាប់ពីទូកជួយសង្គ្រោះរបស់ពួកគេបានក្រឡាប់អំឡុងពេលជួយសង្គ្រោះបុរសអាយុ៣០ឆ្នាំម្នាក់នៅក្បែរចំណោត Twelve Apostles ដែលជាបំណែកថ្មកំបោរចំនួន១២ជិតឆ្នេររដ្ឋ Victoria ។
អ្នកទេសចរដែលសញ្ជាតិឬឈ្មោះមិនត្រូវបានគេបង្ហាញនោះគឺបានដើរលេងនៅមាត់ទន្លេនៅពេលដែលគាត់ជួបបញ្ហា។ ប៉ូលិសរដ្ឋ Victoria បាននិយាយថា គាត់ត្រូវបានជួយសង្គ្រោះពីទឹករួមជាមួយនឹងអ្នកសង្គ្រោះជីវិតទីបីដោយឧទ្ធម្ភាគចក្រជួយសង្គ្រោះមួយគ្រឿងហើយត្រូវបាននាំទៅកាន់មន្ទីរពេទ្យ។ សាកសពរបស់លោក Powell ត្រូវបានគេរកឃើញនៅក្នុងទឹកមិនយូរប៉ុន្មានក្រោយពេលនោះ។
សោកនាដកម្មនេះបានបង្កការភ្ញាក់ផ្អើលដល់ទីប្រជុំជន Port Campbell ដែលជាទីប្រជុំជនតូចមួយនិងជាទីកំណើតរបស់បុរសទាំងពីរខណៈលោកនាយករដ្ឋមន្ត្រី Scott Morrison បានធ្វើដំណើរទៅអធិស្ឋាន។ លោក Morrison បានសរសេរនៅលើគេហទំព័រ Twitter កាលពីថ្ងៃចន្ទថា “អ្នកជួយសង្គ្រោះជីវិតគឺមិនគិតតែពីខ្លួនឯងនិងមានភាពក្លាហាន។ យើងសូមអរគុណពួកគេចំពោះការងាររបស់ពួកគេនិងមានការអាណិតអាសូរយ៉ាងជ្រាលជ្រៅចំពោះក្រុមគ្រួសារនិងមិត្តភក្តិរបស់ Ross និង Andrew”។
លោក Paul James ដែលជាប្រធានមជ្ឈមណ្ឌល Surf Lifesaving Victoria បានសរសើរអ្នកទាំងពីរថាជាវីរបុរស។គួរបញ្ជាក់ថា ឆ្នេរសមុទ្រអូស្ត្រាលីគឺស្ថិតក្នុងចំណោមទីតាំងដែលមានភ្ញៀវទេសចរដ៏ធំបំផុតរបស់ទ្វីបនេះ។ អ្នកហែលទឹកត្រូវបានគេណែនាំឲ្យរក្សាគម្លាតរវាងតំបន់ដែលមានទង់និងល្បាតដោយអ្នកសង្គ្រោះ៕ AFP
Source: Kampuchea Thmey Daily
0 Comments