ភ្នំពេញ ៖ រថយន្ត ម៉ាកTOYOTA COROLA ពណ៌សមួយគ្រឿង ត្រូវបានជនមិនស្គាល់មុខ បើកយកមកប្លុងចោលនៅតាមបណ្តោយផ្លូវភ្លោះក្រុមហ៊ុនOCIC ហើយគេចខ្លួនបាត់ រយៈពេលមួយយប់មួយថ្ងៃមកហើយ ធ្វើឲ្យមានការភ្ញាក់ផ្អើល ដល់សន្តិសុខ និងអ្នកដំណើរ ហើយក៏បានរាយការណ៍ប្រាប់សមត្ថកិច្ចប៉ុស្តិ៍ និងខណ្ឌជ្រោយចង្វារ ចុះត្រួតពិនិត្យ ដោយគេឆ្ងល់ថា មិនដឹងម្ចាស់នៅឯណាហើយមានរឿងអី ឬលួចគេពីណាមក ទើបយកមកប្លុងចោលនៅទីនេះ។
ហេតុការណ៍ នេះមានការភ្ញាក់ផ្អើល កាលពីវេលាម៉ោង៨និង៣០នាទីព្រឹក ថ្ងៃទី២៧ ខែមេសា ឆ្នាំ២០១៩ ចំណុចផ្លូវភ្លោះ ក្នុងក្រុមហ៊ុនOCIC ស្ថិតក្នុងភូមិដើមគ សង្កាត់ជ្រោយចង្វារ ខណ្ឌជ្រោយចង្វារ។
សមត្ថកិច្ចបានឲ្យដឹងថា រថយន្តដែលគេយកទៅប្លុងចោលនោះម៉ាកតូយ៉ូតា កូរ៉ូឡាពណ៌ស ស៊េរីឆ្នាំ១៩៩៣ ពាក់ស្លាកលេខ សៀមរាប 2A 6938។
បើតាមសន្តិសុខនៅយាមក្រុមហ៊ុនសំណង់ក្បែរនោះនិយាយថា កាលពីល្ងាចម៉ោងប្រហែល១២និង០០នាទីយប់ ឈានចូលថ្ងៃទី២៧ ខែមេសា ឆ្នាំ២០១៩ ខណៈគាត់កំពុងយាម ស្រាប់តែមានបុរស៤នាក់ ជិះរថយន្តនេះមកចតនៅចំណុចនេះ ហើយចុះពីរថយន្តបើកដំបូលមុខមើលឆ្កឹះឆ្កៀលមួយសន្ទុះ ក៏នាំគ្នាចេញបាត់តែម្តង។ ដោយបាត់ម្ចាស់យូរពេក រយៈពេល១យប់១ថ្ងៃមកហើយ មិនឃើញមកយករថយន្តវិញ រហូតដល់ថ្ងៃទី២៧មេសា ក៏រាយការណ៍ប្រាប់ប៉ូលិសទៅពិនិត្យ និងយកមករក្សាទុកនៅខណ្ឌជ្រោយចង្វារ ដើម្បីស្វែងរកម្ចាស់រថយន្តដែលបាត់។
នៅព្រឹកថ្ងៃទី២៧មេសា ក្រោយពីសមត្ថកិច្ចពិនិត្យរថយន្តដើម្បីរកវត្ថុតាង ឬមូលហេតុត្រឹមត្រូវមិនឃើញមានអ្វីគួរឲ្យសង្ស័យ សមត្ថកិច្ចក៏បានអូសរថយន្តមកទុកនៅប៉ុស្តិ៍ខណ្ឌជ្រោយចង្វារ ដើម្បីប្រកាសរកម្ចាស់ ហើយបើបងប្អូនណាបាត់រថយន្តដូចមានភិនភាគខាងលើ សូមទំនាក់ទំនងនៅប៉ុស្តិ៍រដ្ឋបាលជ្រោយចង្វារ នឹងបានឃើញមិនខាន។
នៅព្រឹកម៉ោង១០និង៣០នាទីថ្ងៃទី២៧មេសា ក្រោយពីសមត្ថកិច្ចពិនិត្យរថយន្តដើម្បីរកវត្ថុតាង ឬមូលហេតុត្រឹមត្រូវមិនឃើញមានអ្វីគួរឲ្យសង្ស័យ សមត្ថកិច្ចរកឃើញលេខទូរស័ព្ទ ក៏ខលទៅសាកមើលម្ចាស់រថយន្តទទួលទូរស័ព្ទ ហើយសមត្ថកិច្ចសួរនាំទើបដឹងថា ម្ចាស់រថយន្តស្នាក់នៅផ្ទះជួលនៅម្តុំម្លប់ដើមមាន សង្កាត់ព្រែកលៀប ហើយមូលហេតុដែលបណ្ដាលឲ្យម្ចាស់រថយន្តចតចោលដូច្នេះ គឺបណ្តាលមកពីរថយន្តអស់ប្រេង និងម្ចាស់ស្រវឹងសា បើកទៅមុខលែងរួច ក៏សម្រេចចិត្តទុកចោល ហើយចាកចេញទៅសម្រាកបាត់។ ក្រោយពីសមត្ថកិច្ចទាក់ទងទៅម្ចាស់រថយន្តរួចមក រថយន្តត្រូវបានម្ចាស់យកទៅវិញហើយ៕
Source: Kampuchea Thmey Daily
0 Comments