ឆ្នាំ ២០១៩នេះ កាកបាទក្រហមកម្ពុជាទទួលបានថវិកាឧបត្ថម្ភពីសប្បុរសជននានាជិត ២១ លានដុល្លារ

ភ្នំពេញ ៖ ក្នុងឱកាសប្រារព្ធពិធីអបអរសាទរខួប ១៥៦ឆ្នាំនៃទិវាកាកបាទក្រហម និង អឌ្ឍចន្ទក្រហម ៨ ឧសភាឆ្នាំ២០១៩កាកបាទក្រហមកម្ពុជាទទួលបានថវិកាឧបត្ថម្ភពីសប្បុរសជននានាសរុបចំនួន ២០,៧៥៧,៥១០ដុល្លារដើម្បីទ្រទ្រង់សកម្មភាពមនុស្សធម៌របស់កាកបាទក្រហមថវិកាទទួលបាននេះបើប្រៀបធៀបទៅឆ្នាំ២០១៨មានការកើនឡើងជិត៣លានដុល្លារដែលកាលពីឆ្នាំ២០១៨ ទទួលជាង ១៨លានដុល្លារប៉ុណ្ណោះ។

មិនខុសពីបណ្តាឆ្នាំកន្លងទៅនោះឡើយ ការប្រារព្ធទិវាកាកបាទក្រហមនិងអឌ្ឍចន្ទក្រហម ៨ ឧសភា ឆ្នាំ២០១៩ ដែលធ្វើឡើងក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជានិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមជាមួយមន្ត្រីជាន់ខ្ពស់រាជរដ្ឋាភិបាល មកពីគ្រប់ក្រសួងស្ថាប័ននិងរាជធានីខេត្តទូទាំងប្រទេស និង វត្តមានរបស់ថ្នាក់ដឹកនាំព្រឹទ្ធសភា រដ្ឋសភា និង សប្បុរសជនយ៉ាងច្រើនកុះករបានរួមគ្នាបរិច្ចាគថវិកាផ្ទាល់ខ្លួនរបស់ពួកគេដើម្បីជួយទ្រងទ្រង់សកម្មភាពមនុស្សធម៌ ដែលកាកបាទក្រហមកម្ពុជា តែងតែបានធ្វើយ៉ាងសស្រាក់សស្រាំជារៀងរាល់ឆ្នាំនោះ។

ព្រះមហាក្សត្រខ្មែរ ព្រះករុណា ព្រះបាទសម្តេចព្រះ នរោត្តម សីហមុនី និងព្រះវររាជមាតាជាតិខ្មែរ ព្រះមុនិនាថ នរោត្តម សីហនុ បានព្រះរាជទានថវិកាសរុប ៤ម៉ឺនដុល្លារផងដែរ។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាបានមានប្រសាសន៍ឲ្យដឹងថា ក្នុងឆ្នាំ២០១៨ និង ៤ខែក្នុងឆ្នាំ ២០១៩ នេះកាកបាទក្រហមកម្ពុជាដែលមានសាខានៅរាជធានីខេត្តទាំង២៥បានសម្រេចបាននូវសមិទ្ធផលធំៗគួរឲ្យកត់សម្គាល់មានប្រជាពលរដ្ឋដាច់ស្រយាលជាង៣ ម៉ឺនគ្រួសារបានទទួលអណ្ដូងទឹកស្អាតចំនួន ១៣៩, ចាស់គ្មានទីពឹងគ្រួសារគ្មានទីពឹងគ្រួសារស្ត្រីមេម៉ាយទុរគតចំនួន ១៦៧ គ្រួសារទទួលបានផ្ទះថ្មី។ ប្រជាពលរដ្ឋតាមជនបទ ៤៥៣ គ្រួសារបានទទួលបង្គន់អនាម័យ។ ប្រជាពលរដ្ឋត្រូវរងគ្រោះដោយសារគ្រោះធម្មជាតិនិងចាស់គ្មានទីពឹងកុមារកំព្រាគ្រួសារមានជំងឺរ៉ាំរ៉ៃស្ត្រីមេម៉ាយជាង ៤ ម៉ឺនគ្រួសារទទួលបានស្បៀងនិងសម្ភារៈជួយសម្រាលជីវភាពរស់នៅ។ ប្រជាពលរដ្ឋរស់នៅតំបន់ប្រឈមជំងឺគ្រុនចាញ់គ្រុនឈាមចំនួន ២ ម៉ឺនគ្រួសារបានទទួលនូវអំណោយមុងសុវត្ថិភាព , អ្នកពិការជើងចំនួន ៩៥៦ នាក់ទទួលបានរទេះជនពិការ,ប្រជាពលរដ្ឋរស់នៅតាមតំបន់ជិតព្រំដែនរាប់រយគ្រួសារទទួលបានប្រាក់កម្ចីធ្វើដើមទុនប្រកបរបរចិញ្ចឹមជីវិត,អ្នកស្ម័គ្រចិត្តនិងបុគ្គលិកក្នុងវិស័យឯកជន ៤,០០០ នាក់ទទួលបានការបណ្ដុះបណ្ដាលវិជ្ជាសង្គ្រោះបន្ទាន់ប្រជាពលរដ្ឋតាមសហគមន៍រាប់ម៉ឺនគ្រួសារបានចូលរួមក្នុងការផ្សព្វផ្សាយការយល់ដឹងអំពីគ្រោះថ្នាក់ដោយសារមីនគ្រាប់មិនទាន់ផ្ទុះការថែទាំសុខភាពការប្រើប្រាស់ទឹកស្អាតអនាម័យនិងអាហារូបត្ថម្ភ ។ល។ ជាមួយគ្នានេះសិស្សនិស្សិតមន្ត្រីនិងប្រជាពលរដ្ឋប្រមាណជាង ៨ ម៉ឺននាក់ទទួលបានចំណេះដឹងតាមរយៈការផ្សព្វផ្សាយច្បាប់ចរាចរណ៍ផ្លូវគោក ,យុវជនកាកបាទក្រហមជាង ២ ម៉ឺននាក់នៅទូទាំងប្រទេសបានចូលរួមក្នុងសកម្មភាពនានាដូចជាមិត្តអប់រំមិត្ត,សម្អាតបរិស្ថាន ,ការដាំដើមឈើការបរិច្ចាគឈាម ។ល។ ជារៀងរាល់ឆ្នាំកាកបាទក្រហមកម្ពុជាតែងតែផ្សព្ធផ្សាយជូនបងប្អូនជនរួមជាតិតាមគ្រប់ប្រព័ន្ធព័ត៌មាននៅសារអំពាវនាវស្ដីពីការអប់រំថែទាំសុខភាពក្នុងឱកាសទិវាជាតិសុខភាពមាតានិងទារកថ្ងៃ ២១ កុម្ភៈនិងទិវាឆ្នបជាតិ ៥ឧសភានិងទិវាពិភពលោកប្រយុទ្ធនឹងជំងឺអេដស៍ ១ធ្នូ។

សម្តេចកិត្តិព្រឹទ្ធបណ្ឌិតបានឲ្យដឹងទៀតថា គ្រាន់តែរយៈពេល ៤ ខែ ឆ្នាំ ២០១៩ នេះ សាខាកាក បាទក្រហមទាំង ២៥ក្នុងរាជធានីភ្នំពេញបានផ្ដល់អំណោយជូនអ្នករងគ្រោះដោយខ្យល់កន្ត្រាក់ ១១៦ ដងចំនួន ៣,០៣៥ គ្រួសារ។ ជាមួយគ្នានេះដែរកាកបាទក្រហមកម្ពុជាបានចូលរួមឧបត្ថម្ភដល់មន្ទីរពេទ្យគន្ធបុប្ផាតាមរយៈមូលនិធិគន្ធបុប្ផាចំនួន ១ លានដុល្លារក្នុងឆ្នាំ ២០១៨ ហើយនៅឆ្នាំ ២០១៩ នេះនឹងបន្តជួយទៀតមួយលានដុល្លារបន្តទៀត ។ ការឧបត្ថម្ភប្រចាំឆ្នាំដល់អង្គការចំនួន ៣ ចុះសួរសុខទុក្ខសមាគមនិងអង្គការមួយចំនួនដើម្បីឧបត្ថម្ភស្បៀងជួយអាហារសាមគ្គីដល់កុមារកំព្រាអ្នកមានពិការភាពសិស្សនិស្សិតក្រីក្រ និង បានផ្តល់ដល់អនុសាខាខណ្ឌទាំង ១២ ក្នុងរាជធានីភ្នំពេញចំនួន ២លើកក្នុងមួយឆ្នាំនូវអង្ករ ២០០តោនក្នុងមួយឆ្នាំសម្រាប់ប្រជាពលរដ្ឋងាយរងគ្រោះចំនួន ៧,២០០ គ្រួសារទៀត។

សម្តេចកិត្តិព្រឹទ្ធបណ្ឌិតបានយកឳកាសនេះថ្លែងអំណរព្រះគុណព្រះមហាក្សត្រនិងសម្តេចព្រះមហាក្សត្រីព្រះវររាជមាតាជាតិខ្មែរដែលព្រះអង្គទាំងទ្វេតែងតែព្រះរាជទាននូវព្រះរាជកិច្ចគាំទ្រគ្រប់កាលៈទេសៈដល់កាកបាទក្រហមកម្ពុជា។ ជាក់ស្តែងជារៀងរាល់ខែព្រះករុណាព្រះមហាក្សត្រព្រះអង្គបានប្រោសព្រះរាជូបត្ថម្ភនូវព្រះរាជទ្រព្យចំនួន១ពាន់ដុល្លារនិងសម្តេចមហាក្សត្រីព្រះវររាជមាតាជាតិខ្មែរព្រះអង្គបានប្រោសព្រះរាជូបត្ថម្ភនូវព្រះរាជទ្រព្យចំនួន៣ពាន់ដុល្លារជារៀងរាល់ត្រីមាសនិងក្នុងឱកាសផ្សេងៗទៀត។ នៅក្នុងឱកាសទិវា ៨ឧសភា ឆ្នាំនេះព្រះករុណាព្រះមហាក្សត្រជាអម្ចាស់ព្រះអង្គបានសព្វព្រះរាជហឫទ័យប្រោសព្រះរាជូបត្ថម្ភព្រះរាជទ្រព្យចំនួន២ម៉ឺនដុល្លារនិងសម្តេចព្រះមហាក្សត្រីព្រះវររាជមាតាជាតិខ្មែរបានសព្វព្រះរាជហឬទ័យប្រោសព្រះរាជូបត្ថម្ភព្រះរាជទ្រព្យចំនួន២ម៉ឺនដុល្លារដល់កាកបាទក្រហមកម្ពុជាផងដែរ។ លើសពីនេះទៅទៀតព្រះអង្គទាំងទ្វេតែងតែមានព្រះរាជសកម្មភាពជួបប្រាស្រ័យនិងប្រោសព្រះរាជទានអំណោយចំពោះប្រជានុរាស្ត្ររបស់ព្រះអង្គជាពិសេសព្រះករុណាព្រះមហាក្សត្រជាអម្ចាស់បានស្តេចយាងព្រះរាជទានអំណោយដល់ជនបទដាច់ស្រយាលតាមបណ្តាខេត្តនិងត្រាសបង្គាប់ក្រុមសម្តេចឳ ផ្គត់ផ្គងទឹក ជីកស្រះ ជីកអណ្តូង ជូនប្រជានុរាស្ត្រព្រះអង្គដោយព្រះរាជហឫទ័យស្រឡាញ់អាណិតអាសូរយ៉ាងខ្លាំង។

ក្នុងស្មារតីសាមគ្គីភាពជាមួយសមាគមកាកបាទក្រហមប្រទេសជាមិត្ត កាកបាទក្រហមកម្ពុជាក៏បានផ្ដល់ថវិកាចំនួន ៥ ម៉ឺនដុល្លារជួយអ្នករងគ្រោះដោយសារការបាក់ទំនប់វារីអគ្គិសនីនៅឡាវនិងជួយ ៥ ម៉ឺនដុល្លារដល់អ្នករងគ្រោះដោយគ្រោះរញ្ជួយដីនិងស៊ូណាមី នៅឥណ្ឌូណេស៊ី។

មូលនិធិដែលកាកបាទក្រហមកម្ពុជាទទួលបានពីសប្បុរសជនគ្រប់មជ្ឈដ្ឋានទាំងនៅថ្នាក់កណ្តាលទាំងនៅសាខាជារៀងរាល់ឆ្នាំបានជួយឲ្យកាកបាទក្រហមកម្ពុជាមានធនធានធ្វើប្រតិបត្តិការបំពេញបានយ៉ាងសក្តិសមជាជំនួយការឲ្យអាជ្ញាធរសាធារណៈរួមចំណែកដោះស្រាយបញ្ហាអាទិភាពក្នុងសង្គមជាតិជាពិសេសក្នុងការសង្គ្រោះជីវិតកសាងភាពធន់មាំទៅនឹងគ្រោះមហន្តរាយនិងវិបត្តិភ័យផ្សេងៗការកាត់បន្ថយអត្រាឈឺ និងស្លាប់នៃមាតានិងកុមារការការពារជំងឺឆ្លង និងអន្តរាគមន៍សុខភាពសាធារណៈគ្រាអាសន្ន ការលើកកម្ពស់គោលការណ៍គ្រឹះតម្លៃមនុស្សធម៌សេចក្តីថ្លៃថ្នូររបស់មនុស្សជាតិនិងវប្បធម៌អហិង្សានិងការពង្រឹងសមត្ថភាពកាកបាទក្រហមកម្ពុជា។

សម្តេចកិត្តិព្រឹទ្ធបណ្ឌិតបានធ្វើការអំពាវនាវដល់សម្តេច ឯកឧត្តម លោកជំទាវ លោកឧកញ៉ា លោក លោកស្រី អ្នកនាងកញ្ញា មន្ត្រីរាជការកគ្រប់លំដាប់ថ្នាក់សប្បុរសជនបងប្អូនរួមជាតិគ្រប់មជ្ឈដ្ឋានសូមមេត្តាបន្តចូលរួមជាកម្លាំងមនុស្សធម៌ជាមួយកាកបាទក្រហមកម្ពុជាជួយសម្រាលទុក្ខលំបាករបស់បងប្អូនប្រជាពលរដ្ឋងាយរងគ្រោះបំផុតដែលជារួមមានអ្នករងគ្រោះមហន្តរាយផ្សេងៗជនពិការចាស់ឥតទីពឹងកុមារកំព្រាស្ត្រីមេម៉ាយ អ្នកផ្ទុកមេរោគអេដស៍។ល។ ជួយដោះស្រាយកង្វះទឹកស្អាតនៅតាមសហគមន៍ជនបទនានាទូទាំងព្រះរាជាណាចក្រកម្ពុជាបានឆាប់រហ័សនិងទាន់ពេលវេលាដោយពុំមានការរើសអើង បែងចែកពូជសាសន៍ជំនឿសាសនានិន្នាការនយោបាយអ្វីឡើយ។

សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានធ្វើការកត់សំគាល់ថា៖ប្រជាពលរដ្ឋខ្មែររងគ្រោះជិត១៤ម៉ឺនគ្រួសារបានទទួលការជួយសង្គ្រោះពីកាកបាទក្រហមកម្ពុជាហើយសម្ដេចបានវាយតម្លៃថា សកម្មភាពសប្បុរសធម៌នេះគឺជាសកម្មភាពដ៏អង់អាចក្លាហានរបស់កាកបាទក្រហម។

សម្ដេចតេជោនាយករដ្ឋមន្ត្រីបានមានប្រសាសន៍ទៀតថា៖«ខ្ញុំពិតជាមានមោទនភាពចំពោះការចូលរួមរបស់កាកបាទក្រហមកម្ពុជាដែលសកម្មភាពទាំងអស់នេះបានចូលរួមចំណែកយ៉ាងធំធេងដល់គោលនយោបាយគាំពារសង្គមរបស់រាជរដ្ឋាភិបាលព្រោះថា ជនរងគ្រោះត្រូវការជំនួយដែលជាផ្នែកមួយនៃគោលនយោបាយគាំពារសង្គមរបស់រាជរដ្ឋាភិបាល»។

សម្តេចតេជោ ហ៊ុន សែន ក៏បានការកោតសរសើរចំពោះយុវជនកាកបាទក្រហមកម្ពុជាដែលមានបណ្ដាញនៅគ្រប់ទិសទីទាំងអស់នៃសាខាកាកបាទក្រហមកម្ពុជានៅគ្រប់ទីកន្លែងទាំងអស់ដែលឃើញខ្ញុំអាចចាត់ទុកថាជាបណ្ដាញព័ត៌មានដែលឆាប់រហ័សឆ្លើយតបជាមួយនឹងអ្វីដែលជាកង្វល់ហើយដែលជាបញ្ហាត្រូវដោះស្រាយបន្ទាន់ទាក់ទងជាមួយនឹងតម្រូវការនៃការជួយសង្គ្រោះ។

សម្ដេចតេជោនាយករដ្ឋមន្ត្រីក៏បានថ្លែងអំណរព្រះគុណព្រះមហាក្សត្រខ្មែរនិងសម្តេចព្រះមហាក្សត្រី ព្រះវររាជមាតាជាតិខ្មែរ ដែលព្រះអង្គតែងតែយកព្រះទ័យទុកដាក់ជាមួយកាកបាទក្រហមកម្ពុជា និងតែងតែបានយាងចុះជួយប្រជាពលរដ្ឋខ្មែរនៅគ្រប់ទីកន្លែង។ ព្រះរាជសកម្មភាពរបស់ព្រះអង្គក៏ក្លាយទៅជាព្រះរាជគំរូសម្រាប់មន្ត្រីរាជការកងកម្លាំងប្រដាប់អាវុធក៏ដូចជាសប្បុរសជននានានិងមន្ត្រីថ្នាក់ក្រោមរបស់យើង ។ សម្ដេចក៏បានថ្លែងអំណរគុណដល់សប្បុរសជនទាំងអស់ដែលបានចូលរួមចំណែកជួយដល់កាកបាទក្រហមកម្ពុជា៕