យោធា​អាមេរិក​ឈប់​តាមដាន​ទិន្នន័យ​សំខាន់ៗ​ស្តីពី​សង្គ្រាម​អា​ហ្វ​ហ្គា​នី​ស្ថាន​នៅពេល​ស្ថានភាព​កាន់តែ​យ៉ាប់យ៉ឺន

ក្រុម​ឃ្លាំមើល​អាមេរិក​បាន​និយាយ​នៅ​ថ្ងៃ​ពុធ​ថា យោធា​អាមេរិក​បាន​បញ្ឈប់​ការតាមដាន​លើទឹក​ដី​ដែល​ត្រួតត្រា​និង​ទទួល​ឥទ្ធិពល​ដោយ​រដ្ឋាភិបាល​និង​ក្រុម​សកម្មប្រយុទ្ធ​អា​ហ្វ​ហ្គា​នី​ស្ថាន​ខណៈ​ស្ថានភាព​សន្តិសុខ​នៅក្នុង​ប្រទេស​ដែល​ហែកហួរ​ដោយ​សង្គ្រាម​មួយ​នេះ​កាន់តែ​អាក្រក់​ទៅៗ​។​

រឿងនេះ​បាន​កើតឡើង​ខណៈដែល​ម​ន្ត្រី​អាមេរិក​និង​ក្រុម​តា​លី​បង់​បានរៀបចំ​កិច្ចចរចា​ជាច្រើនលើក​ក្នុង​គោលបំណង​ធានា​ឲ្យ​មានការ​ចាកចេញ​ដោយ​សុវត្ថិភាព​សម្រាប់​កងកម្លាំង​អាមេរិក​។​

ក្រុម​តា​លី​បង់​បានប្រកាស​ចាប់ផ្តើម​ការ​វាយលុក​និ​ទាឃ​រដូវ​កាលពីដើម​ខែមេសា​។ សូម្បី​មុន​ការប្រកាស​នោះ​ក៏ដោយ ការប្រយុទ្ធ​បាន​កើនឡើង​ខ្លាំង​នៅ​ទូទាំងប្រទេស​អា​ហ្វ​ហ្គា​នី​ស្ថាន​ក្នុង​រយៈពេល​ប៉ុន្មាន​សប្តាហ៍​ថ្មីៗ​នេះហើយ​កងទ័ព​អា​ហ្វ​ហ្គា​នី​ស្ថាន​រាប់រយ​នាក់​ត្រូវបាន​សម្លាប់​។​

អគ្គ​អធិការកិច្ច​ពិសេស​សម្រាប់​ការស្តារ​ប្រទេស​អា​ហ្វ​ហ្គា​នី​ស្ថាន​ឡើងវិញ (SIGAR) បាន​និយាយ​ក្នុង​របាយការណ៍​មួយ​ដែល​បានចេញ​ផ្សាយ​កាលពី​យប់​ថ្ងៃ​អង្គា​រថា យោធា​អាមេរិក​បាន​ប្រាប់​ក្រុម​ឃ្លាំ​មើលថា ខ្លួន​លែង​តាមដាន​កម្រិត​នៃ​ការគ្រប់គ្រង​ឬ​ឥទ្ធិពល​ដែល​រដ្ឋាភិបាល​អា​ហ្វ​ហ្គា​នី​ស្ថាន​និង​ពួក​សកម្មប្រយុទ្ធ​បាន​គ្រប់គ្រង​នៅក្នុង​ប្រទេស​នេះ​ទៀតហើយ​។​

លោក​វរសេនីយ៍ឯក David Butler អ្នកនាំពាក្យ​កងកម្លាំង​អាមេរិក​នៅ​អា​ហ្វ​ហ្គា​នី​ស្ថាន​បាន​និយាយថា ខណៈពេលដែល​បេសកកម្ម Resolute Support (RS) លែង​អនុវត្ត​ការវិភាគ​ទៀតហើយ​នោះ សហគមន៍​ស៊ើបការណ៍​បានធ្វើការ​វាយតម្លៃ​ដោយឡែក​លើ​ស្រុក​ដែល​គ្រប់គ្រង​ដោយ​រដ្ឋាភិបាល​និង​ក្រុម​តា​លី​បង់​។​

របាយការណ៍​ខែមករា​បាន​បង្ហាញថា ស្រុក​ដែល​ស្ថិតនៅក្រោម​ការត្រួតត្រា​ឬ​ឥទ្ធិពល​របស់​រដ្ឋាភិបាល​គឺមាន​៥៣,៨​ភាគរយ​ខណៈ​ស្រុក​នៅ​សេសសល់​ក្នុងប្រទេស​នេះ​គឺ​ត្រូវបាន​គ្រប់គ្រង​ឬ​ប្រជែង​ដោយ​ក្រុម​តា​លី​បង់​។​

ក្រុម​អ្នកជំនាញ​បាន​និយាយថា ទង្វើ​ដើម្បី​បញ្ឈប់​ការតាមដាន​ទិន្នន័យ​សំខាន់​នេះ​គឺ​គួរ​ឲ្យ​ព្រួយបារម្ភ​ដោយសារតែ​ទីក្រុង​វ៉ាស៊ីនតោន​បានកំណត់​វិធានការ​ស្ដង់ដារ​ជា​សាធារណៈ​ដែល​ឥឡូវនេះ​ពិបាក​ក្នុងការ​វាស់វែង​៕ REUTERS

​

Source: Kampuchea Thmey Daily