មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អាមេរិកាំង ពង្រីក​សាខា​ថ្មី​មួយទៀត​នៅ​ផ្សារ​ថ្មី​

ភ្នំពេញ​៖ មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អាមេរិកាំង បាន​ពង្រីក​សាខា​ថ្មី​មួយ​ទៀតហើយ នៅ​ផ្សារ​ថ្មី ខណ្ឌដូនពេញ​។​

ពិធី​សម្ពោធ​បានធ្វើ​ឡើង​កាលពី​ព្រឹក​ថ្ងៃទី​០៨ ឧសភា ក្រោម​អធិបតីភាព​លោក​ឧកញ៉ា វេជ្ជបណ្ឌិត គួច ម៉េង​លី ដោយមាន​ការចូលរួម​ពី​លោកគ្រូ​អ្នកគ្រូ​និង​សិស្ស និស្សិត​ជា​ច្រើន​រយ​នាក់​។​

មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អាមេរិកាំង បង្កើត ឡើង ក្នុង​ឆ្នាំ​២០០៥ ក្រោម​គំនិត​ផ្តួចផ្តើម​ដោយ លោក​ឧកញ៉ា វេជ្ជបណ្ឌិត គួច ម៉េង​លី ជា​ស្ថាបនិក ប្រធាន​ក្រុមប្រឹក្សាភិបាល និង​អគ្គនាយក​ប្រតិបត្តិ​។ មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អាមេរិកាំង មានការ​រីកចម្រើន​គួរឱ្យកត់សម្គាល់ ដែល​ចាប់ផ្តើម ដំបូង មាន​សិស្ស​ត្រឹមតែ​៤​នាក់ ប៉ុណ្ណោះ រហូតមកដល់​ពេលបច្ចុប្បន្ន​នេះ​ចំនួន​សិស្ស​កើនឡើង ដល់ ជាង ១,១០០០ នាក់​។ សព្វថ្ងៃនេះ មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អាមេរិកាំង មិន​ត្រឹមតែ​មានកេរ្តិ៍ឈ្មោះ ល្បីល្បាញ ក្នុង ព្រះ រាជាណាចក្រ កម្ពុជា ប៉ុណ្ណោះ​ទេ ប៉ុន្តែ​ក៏​ទទួលបាន​ការទទួលស្គាល់ និង​ល្បីល្បាញ ជា​អន្តរជាតិ តាមរយៈ​ការទទួល ពានរង្វាន់ លក្ខណៈ​អន្តរជាតិ​ពី បណ្តា​ប្រទេស​ផ្សេងៗ​ដូចជា សិង្ហ​បុរី បារាំង អារ៉ាប់​រួម​(​ឌូ​បៃ​) ស្វី​ស អង់គ្លេស សហរដ្ឋអាមេរិក ព្រុយ​ណេ ប៊ែ​ល​ហ្សិ​ក ចិន (​ហុងកុង​) និង​ប្រេ​ស៊ីល​ជាដើម​។​

មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អាមេរិកាំង បច្ចុប្បន្ន​មាន​៤​ទីតាំង​គឺ ការិយាល័យ​កណ្តាល ស្ថិតនៅតាម​បណ្តោយ​មហាវិថី​ម៉ៅ​សេទុង សង្កាត់​ទំនប់ទឹក ខណ្ឌចំការមន សាខា​ទួលគោក​ស្ថិតនៅ​ផ្លូវ​លេខ​២៨៩ សង្កាត់​បឹងកក់​ទី​១ ខណ្ឌទួលគោក (​ទល់មុខ​សាលា​បឋម សិក្សា​ទួលគោក​) សាខា​ចាក់អង្រែ​ស្ថិតនៅ​ផ្លូវជាតិ​លេខ​២ សង្កាត់​ចាក់អង្រែ​ក្រោម ខណ្ឌមានជ័យ (​ទល់មុខ​រង្វង់​មូល​ព្រះ​នរាយ​ក្រុង​តាខ្មៅ ឬ​សាខា​ខេត្តកណ្តាល​) និង​សាខា​ចោមចៅ រាជធានី​ភ្នំពេញ ព្រះរាជាណាចក្រ​កម្ពុជា​។​

ឧកញ៉ា វេជ្ជបណ្ឌិត គួច ម៉េង​លី បាន​អោយដឹងទៀតថា ដោយសា​តែ​ស្ថេរភាព​នយោបាយ កំណើនសេដ្ឋកិច្ច និង​កេរ្តិ៍ឈ្មោះ​សាលា​មាន​ភាព​ល្បី​រន្ទឺ ទាំង​ក្នុងស្រុក និង​ក្រៅ​ស្រុក ព្រមទាំង​ដើម្បី​រួមចំណែក​ក្នុង​ការផ្តល់សេវា​អប់រំ​ប្រកបដោយ​គុណភាព និង​ដើម្បី​ឆ្លើយតប​ទៅ នឹង​តម្រូវការ​ទីផ្សារ និង​សំណូមពរ​ជាច្រើន​ពី​សំណាក់​មាតាបិតា អ្នក​អាណា​ព្យា បាល និង​សិស្សានុសិស្ស​ពី គ្រប់ មជ្ឈដ្ឋាន អំពី​គុណភាព វិន័យ និង​សេវាកម្ម មជ្ឈមណ្ឌល​ភាសា អេ អាយ អាយ នឹង​បើក​ដំណើរការ សាខា​ផ្សារ​ថ្មី ដែលមាន អាសយដ្ឋាន​អគារ​លេខ​១C និង ១៣D ផ្លូវ ៥៣ កែង ផ្លូវ ១៥៣ ភូមិ​៥ សង្កាត់​ផ្សារ​ថ្មី​៣ ខណ្ឌដូនពេញ រាជធានី​ភ្នំពេញ ព្រះរាជាណាចក្រ​កម្ពុជា ចាប់ពី​ថ្ងៃទី​០៨ ខែឧសភា ឆ្នាំ​២០១៩ តទៅ​។ មជ្ឈមណ្ឌល​ភាសា អេ អាយ អាយ បានចាប់ផ្តើម​ទទួល​ចុះឈ្មោះ​សិស្ស សម្រាប់​វគ្គ​សិក្សា​ថ្មី​ចូលរៀន នៅ​ថ្ងៃទី​០៨ ខែឧសភា ឆ្នាំ​២០១៩​។​
​
អគារសិក្សា​ថ្មី សាខា​ផ្សារ​ថ្មី​នេះ​មាន​កម្ពស់ ៨​ជាន់ សាងសង់​នៅលើ​ផ្ទៃដី ៤២៥.០១ ម៉ែត្រការ៉េ ដែល​ស្ថិតនៅ​ផ្លូវ ៥៣ កែង ផ្លូវ ១៥៣ មាន​បរិវេណ​ធំ​លូ​លាយ​សម្រាប់​សិស្សានុសិស្ស បំពាក់​ទៅដោយ​សម្ភារ​សិក្សា​ទំនើបៗ បន្ទប់​មាន ផាសុកភាព អនាម័យ និង​ខ្យល់​បរិសុទ្ធ ចេញចូល គ្រប់គ្រាន់ និង​មាន​សុវត្ថិភាព​ដល់​សិស្សានុសិស្ស​ក្នុងការ​សិក្សា ប្រកបដោយ​ប្រសិទ្ធភាព និង​គុណភាព តាម ស្តង់ដារ​អន្តរជាតិ​។​

ឧកញ៉ា វេជ្ជបណ្ឌិត គួច ម៉េង​លី បន្តទៀតថា​ យើង​មាន​ចក្ខុវិស័យ និង​បេសកកម្ម​ច្បាស់លាស់​ក្នុងការ​ពង្រីក​សាខា​។ ផ្សារ​ថ្មី​គឺជា​ទីតាំង យុទ្ធសាស្ត្រ​មួយ​របស់​យើង​ក្រៅពី​សាខា​ម៉ៅ​សេទុង សាខា​ទួលគោក សាខា​ចាក់អង្រែ និង​សាខា​ចោមចៅ​។ នៅ​តំបន់​នោះ និង​តំបន់​ជុំវិញ​ផ្សារ​ថ្មី កំពុងមាន​ការអភិវឌ្ឍ​យ៉ាងខ្លាំង ដែល​ធ្វើឱ្យមាន​កំណើន ប្រជាជន និង​សំណង់​អគារ​ធំៗ​ជាច្រើន​កំពុងមាន ភាពជឿនលឿន​ជាខ្លាំង​។​

ជា​ទិសដៅ យើង​មាន​គម្រោង​ពង្រីក​សាខា​ថ្មី​បី បន្ថែមទៀត​គឺ សាខា​ជ្រោយចង្វា នឹង​បើក​ដំណើរការ​ក្នុង​វគ្គ​សិក្សា​ទី​៦២​។ ហើយ​យើង​ក៏​កំពុង សម្លឹងមើល​ទីតាំង​ថ្មី​មួយ​បន្ថែមទៀត​នៅ​ម្តុំ​ជ្រោយចង្វា ដើម្បី​បើក​សាលារៀន អន្តរទ្វីប អា​រិ​កាំ​ង ឬ យើង​អាច​ប្រើប្រាស់​អគារ មជ្ឈមណ្ឌល​ភាសា អេ អាយ អាយ ជ្រោយចង្វា សម្រាប់​មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អា​រិ​កាំ​ង​សម្រាប់​ឆ្នាំ​សិក្សា ២០១៩-២០២០ តែម្តង​។​

សាខា​សែន​សុខ ដែលមាន​ទំហំ​ដី ៣​ហិកតា សម្រាប់​បើក មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អា​រិ​កាំ​ង​។ ទីតាំង​លេង​កីឡា និង MJQE Square នៅ​សាខា​សែន សុខ​។​
​សាខា​ទួល​សង្កែ ដែលមាន​ទំហំ​ដី ៧០០០ ម៉ែត្រការ៉េ សម្រាប់​បើក មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អា​មេរិ​កាំ​ង​។​
​មជ្ឈមណ្ឌល​ភាសា អេ អាយ អាយ មាន​វគ្គ​បណ្តុះបណ្តាល​ផ្នែក ភាសា​អង់គ្លេស និង​ភាសា​ចិន គ្រប់​កម្រិត វគ្គ​បណ្តុះបណ្តាល TESOL ថ្នាក់​ត្រៀមប្រឡង TOEFL ព្រមទាំង កុំព្យូទ័រ​គ្រប់​ជំនាញ សម្រាប់ សិស្សានុសិស្ស គ្រប់​វ័យ​។​

ក្រៅពីនេះ​ផងដែរ ដើម្បី​ផ្តល់នូវ​ឱកាស​សម្រាប់​យុវជន​ឱ្យទទួល​បានការ​បណ្ដុះបណ្ដាល​ល្អ និង ទទួលបាន​នូវ​បទពិសោធន៍​សម្រាប់​អាជីព​នាពេល​អនាគត​របស់​ពួកគេ មជ្ឈមណ្ឌល និង​សាលារៀន មាន​មជ្ឈមណ្ឌល​រៀបចំ​ផែនការ​អាជីព និង​ស្វែងរក​ការងារ​ធ្វើ (Career Planning and Placement Center) និង​កម្មវិធី​បណ្តុះបណ្តាល​វិជ្ជាជីវៈ​ខ្លីៗ​សម្រាប់​សិស្ស និស្សិត ដែល​កំពុង​សិក្សា​នៅតាម មហាវិទ្យាល័យ​ដែល​ត្រូវការ​បទពិសោធន៍ និង​ប្រាក់ឧបត្ថម្ភ​សម្រាប់​ការសិក្សា​៕



Source: Kampuchea Thmey Daily