ក្រុមជើងឯក៣សម័យកាលបឹងកេត បានបន្តរកបាន៣ពិន្ទុទៀតហើយក្នុងសប្ដាហ៍ទី៦នៃពានរង្វាន់លីគកំពូលកម្ពុជា (Metfone Cambodian League 2019) ក្រោយយកឈ្នះលើក្រុមយុវជនសាលាបាល់ទាត់ជាតិបាទី ដោយលទ្ធផល៣ទល់១ លើទីលានមជ្ឈមណ្ឌល និងសាលាបាល់ទាត់ជាតិបាទី ក្នុងខេត្តតាកែវ កាលពីពេលថ្មីៗនេះ។
លោកគ្រូបង្វឹក ហៅ សុជាតិ របស់ក្រុមបឹងកេត បានលើកឡើងក្រោយចប់ការប្រកួតថា៖«ពួកយើងគឺធ្វើបានល្អក្នុងប្រកួតនេះ តែអ្វីដែលសោកស្តាយ គឺយើងមានឱកាសច្រើនធ្វើមិនបានសម្រេចក្នុងការរកគ្រាប់បាល់បន្ថែម។ លទ្ធផលនេះគឺមិនដូចទៅនឹងអ្វីដែលយើងគិតទុកនោះទេ ដោយសារតែ យើងរំពឹងថាឈ្នះទទួលបាន ៣ពិន្ទុ ហើយរកគ្រាប់បាល់បានច្រើន ហើយមួយវិញទៀត គឺយើងភ្លាត់ឱ្យយុវជនបាទី រកគ្រាប់បាល់បានមុនទៀត»។
សូមបញ្ជាក់ថាក្រុមបាល់ទាត់យុវជនសាលាបាល់ទាត់ជាតិ បានរកគ្រាប់បាល់នាំមុខមុនក្នុងប្រកួតរវាងក្រុមទាំង២គឺនៅនាទីទី៦ ដោយកីឡាករ ប៊ុនធឿន ប៊ុនណារ៉ុង ប៉ុន្តែបន្ទាប់មកត្រូវកីឡាករបរទេសរបស់បឹងកេត រកគ្រាប់តាមស្មើវិញនៅនាទី ៤២ ដោយកីឡាករ Julius ជនជាតិនីហ្សេរីយ៉ា ខណៈនៅក្នុងវគ្គទីពីរ កីឡាករ Julius ដដែលនិងមិនរួមក្រុមជនជាតិប្រេស៊ីល Eduardo រកគ្រាប់បាល់បន្ថែមទៀត រហូតដល់ចប់ការប្រកួត ៣-១។
លោក ហៅ សុជាតិ បានបញ្ជាក់ថាក្លិបបឹងកេតនាពេលបច្ចុប្បន្នកំពុងព្យាយាមរៀបចំឲ្យបានល្អកាន់តែខ្លាំងដើម្បីប្រកួតទាំងក្នុងលីគកំពូល និង ពានសម្ដេចតេជោ ហ៊ុន សែន រដូវកាលឆ្នាំ២០១៩នេះ។ គិតត្រឹមពេលនេះក្រុមបឹងកេត កំពុងតែឈរនៅចំណាត់ថ្នាក់លេខ៤ក្នុងចំណោមក្រុមជាសមាជិកទាំង១៤ក្រុម ក្រោយប្រកួតបាន៦លើកឈ្នះបាន៤លើក ស្មើគ្នា១លើកនិងចាញ់១លើក មាន១៣ពិន្ទុក្នុងដៃ ពោលគឺចាញ់ក្រុមកំពូលតារាងព្រះខ័នរាជស្វាយរៀង៣ពិន្ទុប៉ុណ្ណោះ។ សម្រាប់ប្រកួតបន្ទាប់ប្រចាំសប្ដាហ៍ទី៧ គឺក្រុមបឹងកេត ត្រូវប៉ះក្រុមវិសាខា នៅថ្ងៃសៅរ៍ ទី១១ ខែឧសភា ឆ្នាំ២០១៩ ខាងមុខលើទីលានកីឡដ្ឋានវិសាខា។
សូមរំលឹកថាក្រុមបឹងកេត កាលពីរដូវកាលឆ្នាំ២០១៨ កន្លងទៅ បានបញ្ចប់ក្នុងចំណាត់ថ្នាក់លេខ២ Metfone Cambodian League មាន៤៩ពិន្ទុ ក្រោយឈ្នះបាន១៥ លើក ហើយស្មើគ្នាបាន៤ លើកនិង ចាញ់៣ប្រកួត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមបឹងកេត បានធ្លាក់ចេញត្រឹមវគ្គ៨ក្រុមចុងក្រោយក្រោយចាញ់ក្រុមណាហ្គាវើល៕
Source: Kampuchea Thmey Daily
0 Comments