ព្រឹត្តិការណ៍ប្រដាល់មួយដែលមានអ្នកប្រដាល់ជើងខ្លាំងកម្ពុជា៤រូប និង អ្នកប្រដាល់ជើងខ្លាំងថៃ៤រូប ដើម្បីជួបគ្នាវាយដណ្តើមខ្សែក្រវាត់ខារ៉ាបាវរដូវកាលទី៩ ទម្ងន់៦០គីឡូក្រាមនោះ នឹងចាប់ផ្តើមធ្វើការប្រកួតជម្រុះនៅរសៀលថ្ងៃទី១១ ខែឧសភា ឆ្នាំ២០១៩នេះហើយ នៅលើសង្វៀនSEA-TV។
សម្រាប់ការវាយជម្រុះថ្ងៃដំបូងនេះ វៀត ប៊ុនឌឿន អ្នកប្រដាល់កម្ពុជាមកពីសមាគមកីឡាប្រដាល់ក្រសួងការពារជាតិ នឹងជួបប្រកួតជាមួយអ្នកប្រដាល់ថៃ ខាន់ ថេប ( Khan Tep) ហើយមួយគូ ទៀតជាការជួបគ្នារវាងសុខ សាវិន ក្លិបឆ្មាសសែនសុខគុនខ្មែរ និង អ្នកប្រដាល់ថៃ ភុត ភេតណយ(Phut Phat Noy) ដោយប្រកួតក្នុងទម្ងន់៦០គីឡូក្រាម។
វៀត ប៊ុនឌឿន និង ខាន់ ថេប ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ដោយសារ ខាន់ ថេប ជាអ្នកប្រដាល់ថៃចំណូលថ្មីទើបមកលើកដំបូងប៉ុណ្ណោះ។ តែយ៉ាងណាខាន់ ថេប នេះ គេមានសមត្ថភាពប្រហាក់ប្រហែលវៀត ប៊ុនឌឿន ដែរ ហើយមាឌក៏ប្រហែលគ្នាដែរ គ្រាន់តែប៊ុនឌឿន មានកំណត់ត្រាប្រកួតច្រើនជាងប៉ុណ្ណោះ។
ខាន់ ថេប គេមានកំនត់ត្រាប្រកួតចំនួន៦៤លើក ឈ្នះ៥៤លើក និងចាញ់១០លើក មិនដែលស្មើ។ ចំណែកវៀត ប៊ុនឌឿន គេមានកំនត់ត្រាប្រកួត៧៩លើក ឈ្នះ៦៣លើក ចាញ់១៤លើក និងស្មើ០២លើក ។ វៀត ប៊ុនឌឿន គេប្រកួតជាមួយថៃលើកចុងក្រោយ គេវាយឈ្នះPhat Koav ក្នុងទឹកទី២។
ទោះជាយ៉ាងនេះក្តី សម្រាប់ការជួបគ្នានេះ ពុំអាចសន្និដ្ឋានមុនថា វៀត ប៊ុនឌឿន អាចវាយឈ្នះខាន់ ថេប នោះទេ ? ព្រោះខាន់ ថេបនេះ គេក៏ជាម្ចាស់ខ្សែក្រវាត់នៅស្រុកថៃផងដែរ។ ដូច្នេះអ្នកណាឈ្នះ អ្នកណាចាញ់នោះ ពុំអាចទាយមុនបានឡើយ ហើយអ្នកប្រដាល់ទាំងពីរនាក់នេះ ក៏មិនអាចអ្នកណាមើលស្រាលអ្នកណាបានដែរ ។
ចំពោះការជួបគ្នារវាង សុខ សាវិន និង ភុត ភេតណយ(Phut Phat Noy) វិញ ក៏មិនអាចទស្សន៍ទាយមុនបានដែរ ត្បិតថាអ្នកទាំងពីរពុំធ្លាប់ជួបគ្នា ព្រោះភុត ភេតណយ ជាអ្នកចំណូលថ្មីនោះ។
សុខ សាវិន គេមានផ្លែល្អ បើតាមកត់សម្គាល់ឃើញការប្រកួតរបស់កន្លងមក ពិសេសក្នុងប្រមាណ៤ប្រកួតជាមួយថៃកន្លងមកនោះ គឺសុខ សាវិន វាយឈ្នះទាំង៤ប្រកួត ហើយសុទ្ធតែផ្តួលយកឈ្នះថៃមុនទឹក៥ទាំងអស់។ ប្រកួតលើកចុងក្រោយគេ សុខ សាវិន បានផ្តួលអ្នកប្រដាល់ថៃ ឈាង រ៉ៃ ឲ្យសន្លប់ក្នុងទឹកទី៤ ។
ភុត ភេតណយ គេទើបតែមកប្រកួតនៅស្រុកខ្មែរ ក្នុងការប្រកួតដណ្តើមខ្សែក្រវាត់នេះ ប៉ុណ្ណោះ។ តែតាមអ្នកផ្គូផ្គងឲ្យដឹងនោះថា ភុត ភេតណយនេះ គេវាយល្អនិងខ្លាំងគួរសមដែរ។ បើមើលពីប្រវត្តិប្រកួតរបស់គេ គឺប្រកួតបាន៦៧លើក ឈ្នះ៥៩លើក ចាញ់០៧លើក និងស្មើ០១លើក។
សុខ សាវិន អ្នកប្រដាល់កម្ពុជាយើងនេះ គេមានប្រវត្តិប្រកួត១០៤លើក ឈ្នះ៧១លើកចាញ់២៧លើក និងស្មើ០៦លើក។ យ៉ាងណាសម្រាប់ការប្រកួតជុំដំបូងនេះ គេរំពឹងថាសុខ សាវិន នឹងរកបាន៣ពិន្ទុមិនខាន ក្នុងការជួបភុត ភេតណយ នេះ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៩ ទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន៨រូប ចូលរួមប្រកួត គឺខ្មែរ៤នាក់ ថៃ៤នាក់។ អ្នកប្រដាល់ខ្មែរទាំង៤នាក់នោះ រួមមាន វៀត ប៊ុនឌឿន សមាគមកីឡាប្រដាល់ក្រសួងការពារជាតិ, សុខ សាវិន ក្លិបឆ្មាសសែនសុខគុនខ្មែរ, ចាន់ សំអាត ក្លិបអប់រំកាយកីឡាស្រុកអន្លង់វែងខេត្តឧត្តរមានជ័យ និង សូត្រ ប៊ុនធី ក្លិបបក្សីស្លាបដែក។ ឯ អ្នកប្រដាល់ថៃ ៤ នាក់វិញ មានខាន់ថេប( Khan Thep) , ភុត ភេតណយ(Phut Phat Noy), ឆ័យ យ៉ូ( Chhai Yo) និង ស៊ុបពើពែក(Super Pek)។
ចំពោះការការប្រកួតក្រៅពីគូខ្សែក្រវាត់នេះ នីម នន អ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវគេផ្គូឲ្យជួបប្រកួតជាមួយធន អៀងឡៃ អ្នកប្រដាល់សមាគមកីឡាប្រដាល់ក្រសួងការពារជាតិ ។ សម្រាប់ការជួបគ្នារវាងអ្នកប្រដាល់ទាំងពីរនាក់នេះ គេមិនរំពឹងថា នីម នន អាចវាយឈ្នះធន អៀងឡៃ នោះឡើយ ? ព្រោះអៀងឡៃ មានផ្លែស៊ូជាង និងមានផ្លែល្អជាងនីម នន។
ឆាយ មាស អ្នកប្រដាល់ក្លិបសំរោងកោងខេត្តបាត់ដំបង នឹងជួបប្រកួតជាមួយភិន សុទី អ្នកប្រដាល់ក្លិបបូរីរាជសីហ៍មានរិទ្ធ។ ពួកគេពីរនាក់នេះ មិនដែលជួបគ្នាទេកន្លងមក។ ពួកគេជួបគ្នាក្នុងទម្ងន់៦០គីឡូក្រាម។ ចាំមើល រវាង ឆាយ មាស និង ភិន សុទី នេះ តើនរណាឈ្នះ?៕
Source: Kampuchea Thmey Daily
0 Comments