រឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១ បានផ្ដួលយកឈ្នះអ្នកប្រដាល់ថៃ ដែលឆ្លងដែនមកជួបប្រកួតជាមួយឲ្យសន្លប់នៅលើសង្វៀនBoostrong Fighter On Fire SEA TV កាលពីព្រឹកថ្ងៃទី០៥ ខែឧសភា ឆ្នាំ២០១៩។
រឿង សារ័ត្ន ត្រូវគេផ្គូឲ្យជួបជាមួយហ្វាមៀឆៃ (Fa Mechhai) ដោយប្រកួតគ្នាក្នុងប្រភេទទម្ងន់៦៧ គីឡូក្រាម។ ក្នុងការជួបគ្នានេះ សារ័ត្ន ដែលជាជាជើងខ្លាំងមួយរូបរបស់កម្ពុជា បានវាយអ្នកប្រដាល់ថៃហ្វាមៀឆៃ ឲ្យអាជ្ញាកណ្ដាលរាប់៨ ក្នុងទឹកទី១ម្តង តាមរយៈការទាត់ជើងក្រោមរបស់ មៀឆៃ ឲ្យឈឺដួលលើរេញ។
មកដល់ទឹកទី២ ហ្វាមៀឆៃ ត្រូវអាជ្ញាកណ្ដាលរាប់៨ម្តងទៀត ដោយសារត្រូវកែងរបស់សារ័ត្ន ហើយមកដល់ការប្រកួតទឹក៣ ហ្វាមៀឆៃ ក៏ត្រូវរឿង សារ័ត្ន វាយកែងចំចង្កា ធ្វើឲ្យសន្លប់ក្រោកលែងរួចតែម្តង។
ចំពោះការប្រកួតមិត្តភាពរវាងអ្នកប្រដាល់រួមជាតិវិញ ធឿន វីថាត់ អ្នកប្រដាល់ក្លិបអប់រំកាយ និងកីឡាស្រុកអន្លង់វែង បានវាយឈ្នះ ហេង សំរាំង អ្នកប្រដាល់ក្លិបព្រៃទទឹងខេត្តបាត់ដំបង ដោយពិន្ទុ ក្នុងការជួបគ្នាទម្ងន់៦៩គីឡូក្រាម។
វីថាត់ គេជាជើងខ្លាំងស្រករក្រោយ មានកណ្តាប់ដៃធ្ងន់ ជើងទាត់ខ្លាំង ហើយវាយមានផ្លែល្អថែមទៀត។ គេទើបមកប្រកួតនៅសង្វៀនភ្នំពេញម្តងពីរដងប៉ុណ្ណោះ។ មកប្រកួតកាលពីថ្ងៃទី១៧ ខែមីនាឆ្នាំ២០១៩ គេបានភ្លាត់ស្នៀត ត្រូវឈាន ហុង អ្នកប្រដាល់សមាគមកីឡាប្រដាល់ក្រសួងការពារជាតិ ផ្តួលអោយបោះបង់ការប្រកួតក្នុងទឹកទី៤ តែលើកនេះធឿន វីថាត់ បានវាយឈ្នះហេង សំរាំងដោយពិន្ទុ។
ចំពោះឆាយ មាស អ្នកប្រដាល់ក្លិបសំរោងកោងខេត្តបាត់ដំបង បានប្រកួតចាញ់ សៀវ ង៉ុយ អ្នកប្រដាល់ក្លិបកងពលធំអន្តរាគមន៍លេខ២ ដោយពិន្ទុ បន្ទាប់ពីវាយគ្នា៥ទឹកពេញនោះ។ ពីរនាក់ជួបគ្នាក្នុងទម្ងន់៥៧គីឡូក្រាម។
ងឿន វិចិត្រ អ្នកប្រដាល់ក្លិបតាព្រហ្មមានជ័យ ដែលគេផ្គូឲ្យជួបប្រកួតជាមួយ ងួន គា អ្នកប្រដាល់ក្លិបរាជសីហ៍ខេត្តរតនគិរីនោះ បានវាយចាញ់ងួន គា ដោយពិន្ទុ។ ពួកគេទាំងពីរនេះ ជួបគ្នាក្នុងប្រភេទទម្ងន់៥៧គីឡូក្រាមដែរ។
•សារឿន ច័ន្ទ សន្លប់ទឹក១ ខណៈវ៉ាន់ វឿន ឈ្នះយ៉ត វ៉ាន់ឌី ដោយពិន្ទុ
សារឿន ច័ន្ទ អ្នកប្រដាល់ជើងចាស់ នៃក្លិបតាព្រហ្មមានជ័យ ដែលត្រូវគេផ្គូឲ្យជួបប្រកួតសាកកណ្តាប់ដៃជាមួយអ្នកប្រដាល់ថៃឈ្មោះយ៉ត ចាក់ភេត(Yorth Chakphat) នៅលើសង្វៀនWurkz កាលពីរសៀលថ្ងៃទី០៥ ខែឧសភា ឆ្នាំ២០១៩នោះ បានវាយចាញ់ថៃក្នុងទឹកទី១។
សារឿន ច័ន្ទ ត្រូវ យ៉ត ចាក់ភេត ចាប់អុកត្រូវមួយជង្គង់ពេញចំពោះទឹក បណ្តាលឲ្យដួលសន្លប់លែងក្រោកក្នុងរយៈពេលមិនដល់មួយទឹកផងនោះ។ សារឿន ច័ន្ទ និង យ៉ត ចាក់ភេត ជួបប្រកួតគ្នាក្នុងទម្ងន់៦០គីឡូក្រាម។
ចំពោះ វ៉ាន់ វឿន អ្នកប្រដាល់កម្ពុជាក្លិបឃ្លាំងមឿងកីឡា បានវាយឈ្នះអ្នកប្រដាល់ថៃ យ៉ត វ៉ាន់ឌី(Yorth Vandy) ដោយពិន្ទុ។ អ្នកប្រដាល់ថៃ យ៉ត វ៉ាន់ឌី នេះ គេឡើងមកសងសឹក វ៉ាន់ វឿនដែលបានវាយរូបគេឲ្យសន្លប់ក្នុងទឹកទី១ ក្នុងការប្រកួតជម្រុះដណ្តើមខ្សែក្រវាត់ខារ៉ាបាវ ទម្ងន់៥៧គីឡូក្រាម កាលពីថ្ងៃទី២៦ ខែមករា ឆ្នាំ២០១៩។ តែលើកនេះ វ៉ាន់ វឿន បានឈ្នះយ៉ត វ៉ាន់ឌីត្រឹមពិន្ទុ ប៉ុណ្ណោះ ហើយឈ្នះដោយប្រផុតប្រផើយថែមទៀត។
វ៉ាន់ វឿន ម្ចាស់ខ្សែក្រវាត់ខារ៉ាបាវទម្ងន់៥៧គីឡូក្រាមនេះ គេមានតែមនិងប្រៀបជាង យ៉ត វ៉ាន់ឌី ត្រង់គេខ្ពស់ជាងបន្តិច គឺ១,៦៧ម៉ែត្រ ខណៈដែល យ៉ត វ៉ាន់ឌី គេ១,៦៥ម៉ែត្រនោះ។ ចំពោះសមត្ថភាពវិញ គឺប្រហាក់ប្រហែលគ្នាទេ ឯបទពិសោធន៍ និង កំណត់ត្រា ក៏ប្រហែលគ្នាដែរ។
ដោយឡែក ការប្រកួតរវាងអ្នកប្រដាល់រួមជាតិវិញ សេក គឹមរួន អ្នកប្រដាល់ក្លិបអង្គរមានជ័យខេត្តសៀមរាប វាយចាញ់ឡុង បេនលឿន អ្នកប្រដាល់ក្លិបសាលវ័ន្តកីឡា ដោយពិន្ទុ តែបេនលឿនត្រូវបែកឈាមក្បាលដោយកែងរបស់គឹមរួនច្រើនថ្នេរដែរ។ ពួកគេទាំងពីរជួបគ្នាក្នុងទម្ងន់៦៣,៥០០គីឡូក្រាម។
ឡូញ វ៉ាន់ឌី អ្នកប្រដាល់ក្លិបវិបុលដារិទ្ធពោធិសែនជ័យ ប្រកួតចាញ់លន់ សៀកឡេង អ្នកប្រដាល់ក្លិបថ្នល់ទទឹងគុនខ្មែរខេត្តកំពង់ស្ពឺ ដោយពិន្ទុ បន្ទាប់ពីប្រកួតគ្នា៥ទឹកពេញនោះ ។ អ្នកប្រដាល់ទាំងពីរនាក់នេះ ប្រកួតក្នុងទម្ងន់៥៧គីឡូក្រាម៕
Source: Kampuchea Thmey Daily
0 Comments