អ្នកមានទ្រព្យសម្បត្តិស្តុកស្តមបំផុតរបស់កោះតៃវ៉ាន់និងជាបេក្ខភាពសង្ឃឹមឈ្នះតំណែងប្រធានាធិបតីលោក Terry Gou បាននិយាយថា លោកបានជួបលោក Donald Trump នៅក្នុងសេតវិមានកាលពីថ្ងៃពុធដោយមេដឹកនាំអាមេរិករូបនេះបានព្រមានលោកថា ការងារដែលលោកនឹងធ្វើគឺពិបាកណាស់។
លោក Gou ដែលជាប្រធានក្រុមហ៊ុនបច្ចេកវិទ្យាយក្ស Foxconn បានធ្វើសេចក្តីប្រកាសដ៏ភ្ញាក់ផ្អើលមួយកាលពីខែមុនថា លោកគ្រោងនឹងឈរឈ្មោះជាបេក្ខជនប្រធានាធិបតីក្នុងការបោះឆ្នោតនាខែមករាឆ្នាំក្រោយនេះបន្ទាប់ពីប្រកាសថា ទេពធីតាសមុទ្រ Matsu បានជំរុញឲ្យគាត់ធ្វើដូច្នេះ។
មហាសេដ្ឋីវ័យ៦៩ឆ្នាំរូបនេះកំពុងស្វែងរកការតែងតាំងពីគណបក្សប្រឆាំង Kuomintang (KMT) ដែលមានមិត្តភាពជាមួយក្រុងប៉េកាំងប៉ុន្តែរោងចក្រធំៗរបស់លោកនៅចិនដីគោកបានបង្កឲ្យមានការព្រួយបារម្ភអំពីភាពសុខសាន្តរបស់លោកជាមួយទីក្រុងប៉េកាំង។
អ្នកនយោបាយតៃវ៉ាន់ជាច្រើនបានបោះជំហានទៅកាន់រដ្ឋធានីវ៉ាស៊ីនតោនក្នុងរយៈពេលប៉ុន្មានខែថ្មីៗនេះជាមួយក្តីសង្ឃឹមថានឹងទទួលបានការគាំទ្រពីមន្ត្រីមានឥទ្ធិពលរបស់អាមេរិក។
ប៉ុន្តែមានតែលោក Gou ទេដែលអាចជួបទល់មុខជាមួយលោក Trump បាន។
លោក Gou បានប្រាប់ក្រុមអ្នកយកព័ត៌មាននៅក្នុងទីក្រុងវ៉ាស៊ីនតោនបន្ទាប់ពីជំនួបនោះថា “ប្រសិនបើខ្ញុំជាប់ឆ្នោតជាប្រធានាធិបតីនៃសាធារណរដ្ឋចិន ខ្ញុំនឹងក្លាយជាអ្នកបង្កើតសន្តិភាពហើយនឹងមិនក្លាយជាអ្នកបង្កើតបញ្ហាទេ។ ខ្ញុំនឹងពង្រឹងសេដ្ឋកិច្ចរបស់កោះតៃវ៉ាន់និងសហរដ្ឋអាមេរិក”។
នៅពេលសួរថាតើលោក Trump បានប្រាប់អ្វីដល់លោក, លោក Gou បាននិយាយថា “គាត់បានឆ្លើយតបថា ការធ្វើជាប្រធានាធិបតីគឺជាការងារដ៏លំបាកមួយ”។
លោក Gou រកចំណូលបានរាប់ពាន់លានតាមរយៈក្រុមហ៊ុន Foxconn ដែលបានដំឡើងទូរស័ព្ទ Apple និង Huawei ក៏ដូចជាគ្រឿងបន្លាស់និងឧបករណ៍នានាសម្រាប់ម៉ាកអន្តរជាតិសំខាន់ៗដទៃទៀតផងដែរ។
ភាគច្រើននៃការវិនិយោគរបស់លោក Gou គឺនៅក្នុងប្រទេសចិន។ លោកបានជួលកម្មករជាងមួយលាននាក់នៅក្នុងប្រទេសនេះដែលជាកន្លែងកម្លាំងពលកម្មថោកបានជួយជំរុញដល់ការកើនឡើងនៃអត្ថប្រយោជន៍របស់ក្រុមហ៊ុន៕ AFP
Source: Kampuchea Thmey Daily
0 Comments