កាលពីថ្ងៃពុធ អង្គការសហប្រជាជាតិបានបន្ថែមមេដឹកនាំក្រុមឥស្លាមនិយមដែលមានមូលដ្ឋាននៅប្រទេសប៉ាគីស្ថានលោក Masood Azhar ចូលក្នុងបញ្ជីភេរវករជាសកលរបស់ខ្លួនបន្ទាប់ពីប្រទេសចិនដកការជំទាស់ចំពោះទង្វើនេះ។
គណៈកម្មាធិការដាក់ទណ្ឌកម្មអង្គការសហប្រជាជាតិលើក្រុមរដ្ឋឥស្លាមនិងអាល់កៃដាបានប្រកាសក្នុងសេចក្តីប្រកាសព័ត៌មានមួយថា ការដាក់បញ្ចូលលោក Azhar ដែលជាមេដឹកនាំរបស់ក្រុម Jaish-e-Mohammad (JeM) គឺដោយសារតែទំនាក់ទំនងរបស់គាត់ជាមួយក្រុមអាល់កៃដា។
JeM បានអះអាងទទួលខុសត្រូវចំពោះការវាយប្រហារកាលពីថ្ងៃទី១៤ខែកុម្ភៈនៅតំបន់កាស្មៀរដែលបានសម្លាប់ទាហានឥណ្ឌាចំនួន៤០នាក់និងបង្កើនភាពតានតឹងរវាងប្រទេសឥណ្ឌានិងប៉ាគីស្ថាន។
ដោយត្រូវបានគេចាត់ទុកថាជាស្ថាបនិកនៃ JeM, លោក Azhar ត្រូវបានរងគ្រោះដោយការបង្កកទ្រព្យសម្បត្តិអន្តរជាតិ ការហាមឃាត់ការធ្វើដំណើរជាសកលនិងការដាក់ទណ្ឌកម្មអាវុធ។ JeM ខ្លួនឯងបានស្ថិតនៅក្នុងបញ្ជីភេរវកម្មអង្គការសហប្រជាជាតិចាប់តាំងពីឆ្នាំ២០០១មកម្ល៉េះ។
ប្រទេសចិនបានរារាំងការប៉ុនប៉ងចំនួនបីលើកមុននៅឯគណៈកម្មាធិការដាក់ទណ្ឌកម្មក្នុងការដាក់លោក Azhar ចូលក្នុងបញ្ជីខ្មៅហើយបានពន្យាពេលសំណើបច្ចេកទេសលើកទី៤ពីប្រទេសអង់គ្លេស បារាំងនិងសហរដ្ឋអាមេរិកកាលពីខែមីនា។
អ្នកការទូត UN បាននិយាយថា សំណើនេះត្រូវបានដាក់ជូនគណៈកម្មាធិការជាថ្មីម្តងទៀតកាលពីសប្តាហ៍មុនហើយថា ប្រទេសចិនមិនបានជំទាស់ចំពោះការដាក់លោក Azhar ចូលក្នុងបញ្ចីខ្មៅកាលពីថ្ងៃពុធទេ។ ការសម្រេចចិត្តបន្ថែមបុគ្គលឬក្រុមណាមួយទៅក្នុងបញ្ជីភេរវកម្មរបស់អង្គការសហប្រជាជាតិគឺត្រូវបានធ្វើឡើងដោយមតិជាឯកច្ឆន្ទនៅក្នុងគណៈកម្មាធិការនេះ។
ប្រទេសឥណ្ឌាបានអបអរសាទរចំពោះការធ្វើបែបនេះដែលបានកើតឡើងបន្ទាប់ពីកងកម្លាំងអាកាសរបស់ខ្លួនកាលពីខែកុម្ភៈបានបើកការវាយប្រហារអាកាសលើជំរំយុទ្ធជន JeM នៅក្នុងប្រទេសប៉ាគីស្ថាន។
ភាពតានតឹងរវាងឥណ្ឌានិងប៉ាគីស្ថានបានកើនឡើងចាប់តាំងពីការវាយប្រហារខែកុម្ភៈនៅតំបន់កាស្មៀរដែលជាហេតុជំរុញឲ្យមានការវាយឆ្មក់អាកាសតបតដាក់គ្នាហើយជំរុញឲ្យមានការភ័យខ្លាចនូវជម្លោះរវាងប្រទេសប្រដាប់អាវុធនុយក្លេអ៊ែរទាំងពីរនេះ៕ AFP
Source: Kampuchea Thmey Daily
0 Comments