ភ្នំពេញ ៖ បុរសជនជាតិកាណាដាម្នាក់ត្រូវគេសង្ស័យថា បានដើរផឹកស៊ីនិងប្រើប្រាស់គ្រឿងញៀនលើសកម្រិតរហូតដេកស្លាប់នៅក្នុងផ្ទះសំណាក់យីហោ "ច័ន្ទសុដា" ស្ថិតនៅទីតាំងផ្ទះលេខ២៩Eo ផ្លូវលេខ១៧៨ ស្ថិតក្នុងសង្កាត់ជ័យជំនះ ខណ្ឌដូនពេញ ដែលបង្កឱ្យមានការភ្ញាក់ផ្អើលបានកើតឡើងកាលពីវេលាម៉ោង១៧ល្ងាច ថ្ងៃទី២៥ ខែមករា ឆ្នាំ២០១៥។
ប្រភពព័ត៌មានពីបុរសជាអ្នករត់ម៉ូតូឌុបម្នាក់សុំមិនបញ្ចេញឈ្មោះ នៅវេលាម៉ោងប្រមាណជា៥ល្ងាច ខណៈដែលកំពុងតែអង្គុយចាំម៉ូយនៅខាងមុខផ្ទះសំណាក់ "ច័ន្ទសុដា" ស្រាប់តែបានឃើញអ្នកបម្រើការនៅក្នុងផ្ទះសំណាក់ខាងលើ បានសែងសពជនជាតិបរទេសម្នាក់នោះមកដាក់នៅខាងមុខជិតនឹងចិញ្ចើមផ្លូវ ភ្លាមៗនោះក៏បង្កឱ្យមានការភ្ញាក់ផ្អើលដល់អ្នកជិតខាង និងអ្នកដំណើរមកចោមរោមមើល ឃើញដូច្នេះក៏អ្នកបម្រើការនៅក្នុងផ្ទះសំណាក់បានយកសាកសពចូលទៅខាងក្នុងវិញ។ ប្រភពបន្តថា បានប្រមាណជា៣០នាទី គេឃើញមានសមត្ថកិច្ចជាច្រើននាក់បានចុះមកដល់ផ្ទះសំណាក់"ច័ន្ទសុដា" ដើម្បីធ្វើកោសល្យវិច័យសព និងស្វែងរកអត្តសញ្ញាណរបស់ជនជាតិបរទេសម្នាក់នោះ។
សមត្ថកិច្ចបានឲ្យដឹងថា ជនបរទេសរូបនោះឈ្មោះANTHONY DAVID JAME ភេទប្រុសអាយុ៣៨ឆ្នាំ មុខរបរទេសចរណ៍កាន់លិខិតឆ្លងដែនលេខGE ២២៦៤៨២ ចូលមកប្រទេសកម្ពុជាកាលពីថ្ងៃទី២៤ ខែមករា ឆ្នាំ២០១៥ តាមច្រកអាកាសយានអន្តរជាតិភ្នំពេញ។
សមត្ថកិច្ចបានបន្តទៀតថា ដោយយោងតាមការបំភ្លឺរបស់បុគ្គលិកផ្ទះសំណាក់នៅមុនពេលកើតហេតុកាលពីវេលាម៉ោង១៩ ថ្ងៃទី២៤ ខែមករា ឆ្នាំ២០១៥ ជនរងគ្រោះរួមជាមួយមិត្តភ័ក្ដិពីរនាក់ទៀតបានមកជួលបន្ទប់លេខ១១៥និងបន្ទប់១១១នៃផ្ទះសំណាក់កើតហេតុ ដោយជនរងគ្រោះស្នាក់នៅម្នាក់ឯងបន្ទាប់មកជនរងគ្រោះនិងមិត្តភ័ក្ដិបានចេញពីបន្ទប់មកអង្គុយញ៉ាំស្រាបៀរហូតដល់វេលាម៉ោង២១យប់ បាននាំគ្នាទៅក្លិបរហូតដល់ម៉ោង០៤ទៀបភ្លឺ ថ្ងៃទី២៥ ខែមករា ឆ្នាំ២០១៥ ត្រឡប់មកបន្ទប់ជួលវិញ លុះដល់ម៉ោង១៦ល្ងាចថ្ងៃដដែល មិត្តភ័ក្ដិមិនឃើញជនរងគ្រោះក្រោកបានដើរទៅគោះទ្វារបន្ទប់ ពេលនោះជនរងគ្រោះលើកដៃថា មិនអីទេ ប៉ុន្តែបើកភ្នែកមិនរួចដោយមិត្តភ័ក្ដិឃើញសភាពមិនស្រួលក៏ចុះមកប្រាប់បុគ្គលិកផ្ទះសំណាក់ឡើងទៅជួយហៅរថយន្តរបស់មន្ទីរពេទ្យ"ខេមម៉ា" មកដឹកពេលឡានមកដល់គ្រូពេទ្យប្រាប់ថា ជនរងគ្រោះស្លាប់បាត់ទៅហើយ ទើបរាយការណ៍ឲ្យសមត្ថកិច្ច។ សមត្ថកិច្ចបញ្ជាក់ថា ក្នុងការចុះពិនិត្យធ្វើកោសល្យវិច័យនៅបន្ទប់កើតហេតុឃើញមានរបស់ប្រើប្រាស់របស់ជនរងគ្រោះរួមមាន ម៉ាស៊ីនអេឡិចត្រូនិក០១គ្រឿង ទូរស័ព្ទដៃ២គ្រឿងលិខិតឆ្លងដែន០១ច្បាប់ កាតធានាគារ០២សន្លឹកកាតពិនិត្យសុខភាព០១សន្លឹក និងខោអាវមួយចំនួនទៀតផងដែរ។ ដោយឆ្លងតាមការសន្និដ្ឋានរបស់គ្រូពេទ្យកោសល្យវិច័យសាលាដំបូងរាជធានីភ្នំពេញ និងនគរបាលផ្នែកជំនាញការិយាល័យបច្ចេកទេសវិទ្យាសាស្ត្ររាជធានីភ្នំពេញបានសម្រេចបូមទឹកនោមរបស់សពជនរងគ្រោះយកទៅពិនិត្យព្រោះមានការសង្ស័យនោះ។
បច្ចុប្បន្នសពជនរងគ្រោះត្រូវបានបញ្ជូនទៅតម្កល់ទុកនៅមន្ទីរពេទ្យខ្មែរ-សូវៀត៕
រស្មី
![](https://www.pinterest.com/pin/create/button/?url=https://cambodia-breaking-news.blogspot.com/2015/01/blog-post_260.html&media=https://blogger.googleusercontent.com/img/b/R29vZ2xl/AVvXsEj6JV2mV0QVRzU3inWs1QZaWjHwc3RvpS79buBB0hUUBrcd5wDWObGwgWTUi7V5to7KJkerbMkrMpPktMSuhmbxkJNZj1hk_kANcN_zBGQGs-TBFQM8D3pdssLT2oirZKFeKZB5EihJV3E/s320/Pisey-26-01-2015-full-S-783929.jpg&description=ជនជាតិកាណាដាម្នាក់បានដេកស្លាប់នៅក្នុងផ្ទះសំណាក់ "ច័ន្ទសុដា" សង្ស័យដើរផឹកស៊ី និងប្រើប្រាស់គ្រឿងញៀនលើសកម្រិត){kind=link}
0 Comments