សៀមរាប ៖ នៅគ្រាដែលមានជនខិលខូចមួយក្រុមបានលួចចូលទៅថតរូបភាពអាសអាភាសនៅក្នុងប្រាង្គប្រាសាទរបស់ខ្មែរ រួចបង្ហោះរូបភាពនៅក្នុងបណ្ដាញសង្គម facebook ត្រូវបានអាជ្ញាធរជាតិអប្សរាចេញសេចក្តីប្រកាសព័ត៌មានមួយថ្កោលទោសចំពោះរូបថតអាក្រាតពាក់កណ្ដាលខ្លួនរបស់ស្ត្រីម្នាក់ឈរនៅមុខប្រាសាទខ្មែរ កាលពីថ្ងៃទី២៤ ខែមករា ឆ្នាំ២០១៥នេះ ដោយពិពណ៌នាថា ការថតបង្ហាញកាយអាក្រាតបែបនោះជាអំពើដែលប្រាសចាកផ្ទុយទាំងស្រុងពីសីលធម៌ និងវប្បធម៌ខ្មែរ ព្រមទាំងនាំឲ្យមានការអាប់ឱនយ៉ាងធ្ងន់ធ្ងរដល់បេតិកភណ្ឌជាតិ និងកិត្តិយសដ៏ថ្លៃថ្នូររបស់ខ្មែរ ដែលមានភាពល្បីល្បាញពេញពិភពលោក។
សេចក្តីប្រកាសព័ត៌មាននេះបានធ្វើឡើងបន្ទាប់ពីមានការបង្ហោះរូបភាពបែបអាសអាភាសរបស់ស្ត្រីម្នាក់នោះបានថតនៅមុខប្រាសាទតាមរយៈបណ្ដាញទំនាក់ទំនងសង្គមហ្វេសប៊ុក ក្នុងរយៈពេលប៉ុន្មានថ្ងៃកន្លងមកនេះ។ រូបថតស្ត្រីអាក្រាតកាយឈរនៅមុខប្រាសាទនោះធ្វើឲ្យមានរិះគន់ យ៉ាងខ្លាំងពីសំណាក់ប្រិយមិត្តបណ្ដាញសង្គមហ្វេសប៊ុក បានលើកជាសំណួរអំពីតួនាទីនិងកាតព្វកិច្ចរបស់អាជ្ញាធរអប្សរាផងដែរ។ នៅក្នុងសេចក្តីប្រកាសព័ត៌មានដដែលនោះក្រៅអំពីការបង្ហាញនូវការថ្កោលទោសយ៉ាងខ្លាំងចំពោះរូបភាពនោះ អាជ្ញាធរជាតិអប្សរាក៏បានប្ដេជ្ញាថា នឹងធ្វើការស្រាវជ្រាវរកការពិត ព្រមទាំងប្ដេជ្ញាអនុវត្តនីតិវិធីច្បាប់តាមគ្រប់រូបភាពដើម្បីធ្វើការផ្ដន្ទាទោសចំពោះការប្រព្រឹត្តបែបអាសអាភាស និងខ្វះការពិចារណាបែបនេះ។ នៅក្នុងសេចក្តីប្រកាសព័ត៌មាននោះ អាជ្ញាធរជាតិអប្សរាក៏បានធ្វើការអំពាវនាវដល់ជនរួមជាតិទាំងអស់ឲ្យចូលរួមសហការក្នុងការផ្តល់ព័ត៌មានជា តម្រុយដែលអាចនាំឲ្យរកឃើញការពិតក្នុងករណីរូបភាពនោះ ដើម្បីលើកកម្ពស់កិត្យានុភាពនៃវប្បធម៌ខ្មែរដ៏រុងរឿងនៃយើង។
មន្ត្រីអាជ្ញាធរអប្សរាបានឲ្យដឹងថា វេបសាយនោះជាវេបសាយអាសអាភាសមួយដែលមានមូលដ្ឋាននៅប្រទេសចិន ហើយជាទូទៅក្រុមនេះតែងតែថតរូបអាសអាភាសនៅកន្លែងល្បីៗនៅលើសកលលោក រួមទាំងមហាកំពែងចិនផងដែរ ហើយរូបភាពស្រី្តស្រាតផ្នែកល្វែងខាងលើថតនៅប្រាសាទកម្ពុជាមានតាំងពីខែមករា ឆ្នាំ២០១៤ មកម្ល៉េះ។
ទាក់ទងនឹងបញ្ហាខាងលើនេះ អ្នកនាំពាក្យអាជ្ញាធរអប្សរាលោកស្រី ចៅស៊ុន កិរិយា ប្រាប់ថា ខាងអាជ្ញាធរអប្សរាកំពុងធ្វើការស្រាវជ្រាវពីបញ្ហានេះដែរ។ លោកស្រីបានបន្តថា រូបភាពអាសអាភាសនេះពិតជាថតនៅកម្ពុជាពិតមែន ប៉ុន្តែអ្នកស្រីមិនទាន់បញ្ជាក់ថា ប្រាសាទនោះមានឈ្មោះអ្វីហើយស្ត្រីម្នាក់នោះជាជនជាតិណានោះទេ។ លោកស្រីអំពាវនាវឲ្យប្រជាពលរដ្ឋផ្តល់ព័ត៌មានជាតម្រុយមកអាជ្ញាធរដើម្បីនាំទៅរកឃើញការពិតក្នុងករណីនេះ។
ជុំវិញករណីខាងលើនេះ ត្រូវបានមហាជននិងសង្គមហ្វេសបុក បាននាំគ្នារិះគន់យ៉ាងធ្ងន់ៗទៅលើអាជ្ញាធរពាក់ព័ន្ធមួយចំនួនដែលមានតួនាទីថែរក្សា និងអភិរក្សប្រាង្គប្រាសាទទាំងនោះថា មិនបានធ្វើការយាមកាមឲ្យបានល្អិតល្អន់បណ្តែតបណ្តោយឲ្យមានករណីនេះកើតឡើង ហើយកន្លងទៅក៏គ្មានអ្នកទទួលខុសត្រូវចំពោះករណីស្ត្រីជនជាតិហូឡង់ម្នាក់បានវាយកម្ទេចរូបបដិមាករមួយអង្គនៅប្រាសាទបាយ័នផងដែរ។
ទន្ទឹមគ្នានោះដែរ មហាជននិងសង្គមហ្វេសបុកបានលើកឡើងបន្តថា អាជ្ញាធរពាក់ព័ន្ធទាំងអស់ដែលមានតួនាទីថែរក្សាប្រាង្គប្រាសាទ គួរតែមានវិធានការរឹតបន្តឹងធ្វើយ៉ាងណាកុំឲ្យមានហេតុការណ៍យ៉ាងដូច្នេះបន្តទៅទៀត៕
កុសល
0 Comments