ករណីដែលមិនអនុញ្ញាតឲ្យចេញសាលក្រមកំបាំងមុខ
ទោះជាដើមចោទ ឬចុងចម្លើយមិនបានបង្ហាញខ្លួននៅកាលបរិច្ឆេទក៏ដោយក្នុងករណីណាមួយខាងក្រោមនេះ តុលាការមិនចេញសាលក្រមកំបាំងមុខបានឡើយ។
១-ភាគីដែលមិនបានបង្ហាញខ្លួន មិនបានទទួលការកោះហៅស្របច្បាប់
២-ភាគីដែលមិនបានបង្ហាញខ្លួនមានមូលហេតុដែលអាចទទួលស្គាល់ថា ពិតជាមិនអាចបង្ហាញខ្លួនបានមែន ដោយសារគ្រោះថ្នាក់មហន្ដរាយធម្មជាតិ ឬកាលៈទេសៈផ្សេងទៀតដែលមិនអាចចៀសវាងបាន
៣-ក្នុងករណីដែលជាបណ្ដឹងមិនស្របច្បាប់
ម្យ៉ាងទៀតក្នុងករណីដែលខ្លឹមសារនៃសេចក្ដីថ្លែងការណ៍ដែលដើមចោទបានធ្វើនៅកាលបរិច្ឆេទនៃការទាញហេតុផលដោយផ្ទាល់មាត់ដែលចុងចម្លើយមិនបានបង្ហាញខ្លួន មិនត្រូវបានជូនដំណឹងទៅចុងចម្លើយមុនកាលបរិច្ឆេទនោះទេ ក៏តុលាការមិនអាចចេញសាលក្រមកំបាំងមុខបានឡើយ។
ប្រសិនបើចេញសាលក្រមកំបាំងមុខដោយចាត់ទុកថា ចុងចម្លើយបានសារភាពអំពីសេចក្ដីថ្លែងការណ៍របស់ដើមចោទនៅកាលបរិច្ឆេទនោះ ទៅចំពោះចុងចម្លើយគឺដូចជាការវាយឆ្មក់មួយដែរ ហេតុនេះហើយដើម្បីចៀសវាងនូវការវាយឆ្មក់នេះមិនអាចអនុញ្ញាតឲ្យតុលាការចេញសាលក្រមកំបាំងមុខទេ។ ឧទាហរណ៍ ចំពោះបណ្ដឹងដែលចំណុចនីមួយៗដែលត្រូវបានសរសេរក្នុងពាក្យបណ្ដឹងគ្មានភាពសីុសង្វាក់គ្នា ទោះបីជាដើមចោទអះអាងអង្គហេតុដែលមិនត្រូវបានសរសេរនៅក្នុងឯកសារត្រៀមនៅកាលបរិច្ឆេទនៃការទាញហេតុផលដោយផ្ទាល់មាត់ដែលដើមចោទបានចូលរួម តែចុងចម្លើយមិនបានបង្ហាញខ្លួន ហើយបណ្ដឹងនេះមានភាពសីុសង្វាក់គ្នាវិញដោយសារការអះអាងអង្គហេតុថ្មីនោះក៏ដោយក៏តុលាការមិនអាចចេញសាលក្រមកំបាំងមុខដែលទទួលស្គាល់ការទាមទាររបស់ដើមចោទ ឡើយដោយសារការណ៍ដែលដោមចោទនឹងអះអាងអង្គហេតុនោះមិនត្រូវបានជូនដំណឹងជាមុនទៅចុងចម្លើយ។ ក្នុងករណីនេះដោយសារបណ្ដឹងរបស់ដើមចោទមានភាពសីុសង្វាក់គ្នាវិញ ដោយការអះអាងអង្គហេតុថ្មី តុលាការមិនអាចចេញសាលក្រមដែលច្រានចោលការទាមទារបានឡើយ ហេតុដូច្នេះតុលាការត្រូវបន្ដនីតិវិធីនៃការវិនិច្ឆ័យ។
ការពន្យារកាលបរិច្ឆេទ
ទោះបីក្នុងករណីដែលដើមចោទ ឬចុងចម្លើយមិនបានបង្ហាញខ្លួននៅកាលបរិច្ឆេទក៏ដោយ ប្រសិនបើយល់ឃើញថា អំឡុងពេលរវាងកាលបរិច្ឆេទ និងពេលដែលបានកោះហៅនោះខ្លីពេកឬយល់ឃើញថា ភាគីមិនអាចបង្ហាញខ្លួនដោយគ្មានកំហុសទេ តុលាការអាចពន្យារពេលកាលបរិច្ឆេទ ហើយកំណត់នូវកាលបរិច្ឆេទថ្មីដោយមិនចេញសាលក្រមកំបាំងមុខដើម្បីធ្វើការវិនិច្ឆ័យបន្ដទៀត៕
ក្រមនីតិវិធី រដ្ឋប្បវេណី
អង្គកុលបុត្រ
និស្សិតសាកលវិទ្យាល័យភូមិន្ទនីតិសាស្ដ្រនិងវិទ្យាសាស្ដ្រសេដ្ឋកិច្ច
0 Comments