កំពង់ឆ្នាំង ៖ បុរសជាកម្មករអង្គការចៃការម្នាក់បានរងរបួសបែកប្រអប់ជើងខាងស្តាំ ក្នុងហេតុការណ៍ គ្រោះថ្នាក់ចរាចរណ៍មួយ ដែលបានកើតឡើងនៅវេលាម៉ោង៥និង១៥នាទីល្ងាច ថ្ងៃទី៣១ ខែធ្នូ ឆ្នាំ២០១៤ លើផ្លូវក្រាលកៅស៊ូក្នុងខេត្ត ស្ថិតក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំង ខណៈដែលជនរងគ្រោះកំពុងជិះម៉ូតូទៅយកប្រពន្ធនៅរោងចក្រM.V ត្រូវម៉ូតូមួយគ្រឿងទៀតបុកពីក្រោយ ហើយម៉ូតូបង្កនោះបានលើកម៉ូតូបើករត់គេចខ្លួនបាត់។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបាននិយាយថា ជនរងគ្រោះមានឈ្មោះ ឯម សុភាព អាយុ៣៣ឆ្នាំ មានទីលំនៅភូមិស្មែត ឃុំស្វាយជ្រំ ស្រុករលាប្អៀរ ជាកម្មករជួសជុលផ្លូវរបស់អង្គការចៃការ ជិះម៉ូតូម៉ាកឌ្រីម១២៥ ពណ៌ខ្មៅ ពាក់ស្លាកលេខកំពង់ឆ្នាំង1C. 9829 ចំណែកភាគីម្ខាងទៀតដែលបង្ក ក្រោយពេលកើតហេតុបានគេចខ្លួនបាត់ ប៉ុន្តែគេបានស្គាល់លេខម៉ូតូគឺ កំពង់ឆ្នាំង1D. 0891។ សមត្ថកិច្ចបានឲ្យដឹងទៀតថា មុនពេលកើតហេតុ ជនរងគ្រោះបានជិះម៉ូតូតាមផ្លូវក្រាលកៅស៊ូពីជើងទៅត្បូង លុះមកដល់ចំណុចកើតហេតុ ស្រាប់តែមានម៉ូតូបង្កបានជិះម៉ូតូមកបំរុងវ៉ា តែវ៉ាមិនផុតក៏បុកពីក្រោយបណ្ដាលឲ្យជនរងគ្រោះដួលម៉ូតូអូសជាង៥ម៉ែត្រ រងរបួសបែកលើប្រអប់ជើងស្តាំជាទម្ងន់ ចំណែកភាគបង្កបានលើកម៉ូតូហើយបើកគេចខ្លួនបាត់។
នៅកន្លែងកើតហេតុ មន្ត្រីនគរបាលបានយកម៉ូតូជនរងគ្រោះមករក្សាទុកនៅអធិការដ្ឋាននគរបាលក្រុងកំពង់ឆ្នាំង និងបានយកជនរងគ្រោះទៅមន្ទីរពេទ្យខេត្ត ដើម្បីព្យាបាលរបួស។ មន្ត្រីនគរបាល រើសបានទូរស័ព្ទដៃជនបង្កមួយគ្រឿង អាចថានិងស្រាវជ្រាវរកភាគីម្ខាងទៀតមកដោះស្រាយគ្នាតាមនីតិវិធីច្បាប់ជាមួយជនរងគ្រោះ៕
( ឈៀង ថារិទ្ធ )
0 Comments