ភ្នំពេញ ៖ បុរសម្នាក់ផឹកស្រាស្រវឹងរួចបង្កទំនាស់វាយតប់ជាមួយអ្នកជិតខាងបង្កឱ្យមានរបួសស្នាម ត្រូវបានសមត្ថកិច្ចនគរបាលចាប់ខ្លួនភ្លាមៗ ក្រោយពេលកើតហេតុបានបន្តិច កាលពីវេលាម៉ោង៧កន្លះយប់ ថ្ងៃទី៣១ ខែធ្នូ ឆ្នាំ២០១៤ នៅក្នុងភូមិភ្នំពេញថ្មី ខណ្ឌសែនសុខ។
ជនដៃដល់ប្រើហិង្សាត្រូវបានឃាត់ខ្លួនខាងលើឈ្មោះ អឿន ភារិទ្ឋ អាយុ២៦ឆ្នាំ មុខរបរជាកម្មករសំណង់ មានទីលំនៅភូមិគោកឃ្លៀង ក្រុមទី៨ សង្កាត់ភ្នំពេញថ្មី។ បើតាមការបំភ្លឺពីភាគីខាងជនរងគ្រោះឈ្មោះ ហេង បាប៊ី ភេទប្រុសអាយុ២៨ឆ្នាំ មានទីលំនៅផ្ទះក្បែរគ្នាជាមួយជនបង្កបាន ប្រាប់សមត្ថកិច្ចថា នៅមុនពេលកើតហេតុជនបង្កឈ្មោះ អឿន ភារិទ្ឋ បានកំពុងអង្គុយផឹកស្រាមុខផ្ទះជាមួយមិត្តភក្ដិ ក្រោយមកក៏ងើបដើរមកមុខផ្ទះ ពេលនោះប្រពន្ធរបស់ជនរងគ្រោះកំពុងសាសំលៀកបំពាក់ដែលហាលនៅមុខផ្ទះក៏រលាស់សារុងចំក្បែរជនបង្កដោយសារពុំបានដឹងគាត់ដើរមកក្បែរ ហើយក៏បានទំនាស់គ្នាដោយពាក្យសំដី ពេលនោះជនរងគ្រោះឃើញចេញមកសួរនាំក៏ឈានទៅប្រតាយប្រតប់គ្នាបណ្ដាលឲ្យឈ្មោះ ហេង បាប៊ី រងរបួសធ្ងន់ធ្ងរត្រង់បរិវេណក្បាលដេរចំនួន២០ថ្នេរ ដោយសារជនដៃដល់វាយនិងដុំឥដ្ឋក្នុងពេលវាយតប់គ្នានោះ។
ក្រោយកើតហេតុក្រុមគ្រួសារជនរងគ្រោះបានមកប្ដឹងសមត្ថកិច្ចនគរបាលមូលដ្ឋានឲ្យជួយអន្តរាគមន៍ក៏ឃាត់ខ្លួនជនបង្កបានភ្លាមៗនៅក្បែរផ្ទះលក់ចាប់ហួយមួយដែលគេព្យាយាមប៉ងរត់គេចខ្លួន៕ សឿន
0 Comments