សៀមរាប ៖ នៅសណ្ឋាគារសុខាល័យអង្គរ ខេត្តសៀមរាប នាថ្ងៃទី០៨ ខែមករា ឆ្នាំ២០១៥ មានបើកអង្គសិក្ខាសាលាភាពជាអ្នកដឹកនាំសម្រាប់ស្ត្រីក្នុងវិស័យកីឡានៅអាស៊ី ដោយមានមន្ត្រីថ្នាក់ដឹកនាំជាស្ត្រីចំនួន២៧ប្រទេសក្នុងទ្វីបអាស៊ីចូលរួម។ អង្គសិក្ខាសាលានេះបានប្រព្រឹត្តទៅក្រោមអធិបតីភាពលោក ថោង ខុនរដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ដោយមានការអញ្ជើញចូលរួមពីតំណាងគណៈកម្មាធិការអូឡាំពិកអន្តរជាតិ និងគណៈកម្មការស្ត្រីនៃក្រុមប្រឹក្សាអូឡាំពិកអាស៊ី ព្រមទាំងគណៈអភិបាលខេត្តសៀមរាប និងអគ្គលេខាធិការអូឡាំពិកកម្ពុជាផងដែរ។ បន្ទាប់ពីចំណាប់អារម្មណ៍របស់តំណាងទីប្រឹក្សាបណ្តុះបណ្តាលនៃគណៈកម្មាធិការអូឡាំពិកអន្តរជាតិ និងគណៈកម្មការស្ត្រីនៃក្រុមប្រឹក្សាអូឡាំពិកអាស៊ីរួចមកមានប្រសាសន៍នោះលោក ថោង ខុនក៏បានធ្វើការថ្លែងអំណរចំពោះតំណាងគណៈកម្មាធិការអូឡាំពិកអន្តរជាតិ ក្រុមប្រឹក្សាអូឡាំពិកអាស៊ី និងគណៈកម្មាធិការជាតិអូឡាំពិកនៃបណ្ដាប្រទេសជាសមាជិកដែលតែងបានសហប្រតិបត្តិការជួយឧបត្ថម្ភគាំទ្រកន្លងមក។ លោកក៏បានគូសបញ្ជាក់ថា អង្គសិក្ខាសាលានេះ ជាវេទិកាដ៏មានប្រសិទ្ធភាពក្នុងការចូលរួមចំណែកដល់កិច្ចខិតខំប្រឹងប្រែងលើឆាកអន្តរជាតិ ដើម្បីជំរុញលើកស្ទួយសមភាពយេនឌ័រ និងលើកកម្ពស់សមត្ថភាពរបស់ស្ត្រីក្នុងការបង្កើនការចូលរួមរបស់ស្ត្រីលើការងារដឹកនាំវិស័យកីឡាសាកល។ លោកក៏បានបន្តទៀតថា ក្នុងរយៈពេលប៉ុន្មានឆ្នាំចុងក្រោយ នេះ ការលើកកម្ពស់ស្ត្រីក្នុងតួនាទីជាអ្នកដឹកនាំមានការរីកចម្រើនគួរឲ្យកត់សម្គាល់តាមរយៈកម្មវិធីភាពជាអ្នកដឹកនាំសម្រាប់ស្ត្រីរបស់គណៈកម្មាធិការអូឡាំពិកអន្តរជាតិដែលផ្តល់កូតាឲ្យមានស្ត្រីជាអ្នកតំណាងនៅក្នុងអង្គការកីឡានានា។ លោក ថោង ខុនក៏បានឲ្យដឹងផងដែរថានៅកម្ពុជា ស្ត្រីក្នុងវិស័យកីឡាមានការកើនឡើង ទោះបីការចូលរួមរបស់ស្ត្រីក្នុងព្រឹត្តិការណ៍ប្រកួតកីឡានៅមានចំនួនតិចតូចដែលជាបញ្ហាដែលយើងកំពុងយកចិត្តទុកដាក់ខ្លាំង និងផ្តល់អាទិភាពដល់ស្ត្រីក្នុងវិស័យកីឡា។ ម្យ៉ាងទៀតឆាប់ៗនេះ នៅកម្ពុជានឹងមានស្ត្រីកាន់តែច្រើនដែលអាចអភិវឌ្ឍន៍បានល្អបំផុតនៅអាស៊ីនិងពិភពលោក។ លោកក៏បានរំលឹកផងដែរនូវបទពិសោធន៍ដែលមិនធ្លាប់មានក្នុងប្រវត្តិសាស្ត្រក្នុងការចូលរួមប្រកួតកីឡាអាស៊ីរបស់កម្ពុជា ក្នុងរយៈពេលជាង៦០កន្លងមក ហើយជាប្រវត្តិសាស្ត្រកីឡាការិនី២រូបដែលបានក្លាយជាយុវនារីគំរូគួរឲ្យយកតម្រាប់ចំពោះស្ត្រីនៅក្នុងវិស័យកីឡា សំខាន់យុវជននិងយុវនារី។ ក្រៅពីគំរូល្អតាមរយៈវិស័យកីឡាកីឡាក៏ជាវេទិកាដ៏មានប្រសិទ្ធភាព ក្នុងការផ្តល់ឱកាសសម្រាប់ភាពជាអ្នកដឹកនាំរបស់ស្ត្រីព្រមទាំងស្ត្រីអាចចែករំលែក បច្ចេកទេសបទពិសោធន៍ក្នុងការចូលរួមកិច្ចការពលរដ្ឋនិងការងារវិជ្ជាជីវៈអាជីព។
លោក ថោង ខុន បានលើកឡើងថា ក្នុងបរិបទនៃការអនុវត្តអភិបាលកិច្ចល្អក្នុងវិស័យកីឡាគណៈកម្មាធិការជាតិអូឡាំពិកកម្ពុជានិងរៀបចំកម្មវិធីសមស្រប ដើម្បីបន្តលើកកម្ពស់និងបង្កើនភាពជាអ្នកតំណាងដល់ស្ត្រីឲ្យកាន់តែប្រសើរឡើងនៅក្នុងក្រុមប្រឹក្សាប្រតិបត្តិ។ ដើម្បីសម្រេចបានអភិបាលកិច្ចល្អនៅក្នុងវិស័យកីឡាមិនអាចធ្វើទៅប្រកបជោគជ័យបើគ្មានការចូលរួមចំណែកប្រកបដោយសក្ដានុពលពីស្ត្រី។ លោកបានសង្កត់ធ្ងន់ថា ការលើកកម្ពស់តម្លៃស្ត្រីធ្វើទៅបានតាមរយៈគំរូស្នាដៃ ភាពជោគជ័យដែលស្ត្រីសម្រេចបាននិងវិសាលភាព សមត្ថភាពដ៏មានសក្ដានុពលរបស់ស្ត្រី ក្នុងការជំរុញទឹកចិត្តបុគ្គលដទៃទៀតឲ្យអភិវឌ្ឍខ្លួននៅក្នុងជីវិត និងសង្គមជាតិខ្លួន។
លោកក៏មានសង្ឃឹមជឿជាក់ថា ក្នុងការធ្វើជាម្ចាស់ផ្ទះរៀបចំព្រឹត្តិការណ៍កីឡាអន្តរជាតិនៃមហាសន្និបាតក្រុមប្រឹក្សាអូឡាំពិកអាស៊ី និងកីឡាស៊ីហ្គេមលើកទី២៣ ឆ្នាំ២០២៣នៅកម្ពុជា ហើយព្រឹត្តិការណ៍នៃគណៈកម្មការស្ត្រី និងកីឡា ថែមជួយដល់ស្ថាប័ន អង្គការកីឡាជាតិនានា ក្នុងកិច្ចគាំទ្រស្ត្រីក្នុងកម្មវិធីកីឡាទូទាំងប្រទេសទៀតផង៕
គឿនវេត
![](https://www.pinterest.com/pin/create/button/?url=https://cambodia-breaking-news.blogspot.com/2015/01/blog-post_284.html&media=https://blogger.googleusercontent.com/img/b/R29vZ2xl/AVvXsEhHvtMnTzi_EBxbsCVNnC3LvkWo1jsqVo589rt2hVdCJ_tfHmAg9mrDHL-sC4oyAayz2Slg7wcjMTevB-yDHBVqYFwT8su0qqVbYgQFS6Toz5oACK37220Fr3bj32iEuOhnAVcaoFDI8_8/s320/Pisey-08-01-2015-full-P-757492.jpg&description=សិក្ខាសាលា ស្ដីពី"ភាពជាអ្នកដឹកនាំសម្រាប់ស្ត្រីក្នុងវិស័យកីឡានៅអាស៊ី"){kind=link}
0 Comments