ភ្នំពេញ ៖ នៅសាលប្រជុំសាលាខណ្ឌដង្កោ កាលពីព្រឹកថ្ងៃទី៨ ខែមករា ឆ្នាំ២០១៥ បានរៀបចំពិធីចែកអត្តសញ្ញាណប័ណ្ណសញ្ជាតិខ្មែរគំរូថ្មីជូនដល់ប្រជាពលរដ្ឋ៣៩០៩នាក់រស់នៅសង្កាត់ដង្កោ ខណ្ឌដង្កោ ក្រោមវត្តមានលោក នុត ពុធដារ៉ា អភិបាលនៃគណៈអភិបាលខណ្ឌដង្កោ ដោយមានការចូលរួមពីមន្ត្រីក្រោមឱវាទជុំវិញសាលាខណ្ឌជាច្រើនរូបផងដែរ។
លោក នុត ពុធដារ៉ា បានលើកឡើងពីការអភិវឌ្ឍរីកចម្រើនរបស់មូលដ្ឋានខណ្ឌដង្កោ ទាំងផ្នែកហេដ្ឋារចនាសម្ព័ន្ធរូបវន្ត និងអរូបវន្ត ក្រោមការដឹកនាំរបស់រាជរដ្ឋាភិបាលដែលមានសម្ដេច តេជោ ហ៊ុន សែន ជានាយករដ្ឋមន្ត្រី។ លោកអភិបាលក៏បានណែនាំដល់បងប្អូនប្រជាពលរដ្ឋដែលបានមកទទួលយកអត្តសញ្ញាណប័ណ្ណសញ្ជាតិខ្មែរនាថ្ងៃនេះ រក្សាទុកអត្តសញ្ញាណប័ណ្ណឲ្យបានត្រឹមត្រូវ ជៀសវាងការខូចខាត ព្រោះអត្តសញ្ញាណប័ណ្ណនេះគឺមានសារៈប្រយោជន៍ណាស់សម្រាប់ការរស់នៅរបស់បងប្អូន ដើម្បីប្រើប្រាស់ក្នុងតម្រូវការចាំបាច់នានា ហើយប្រសិនបើមានការបាត់បង់ដោយប្រការផ្សេងៗ សូមទំនាក់ទំនងមកប៉ុស្តិ៍នគរបាលសង្កាត់ ដើម្បីរៀបចំបែបបទធ្វើអត្តសញ្ញាណប័ណ្ណឡើងវិញ។ លោកអភិបាលខណ្ឌដង្កោក៏បានធ្វើការប្រកាសដល់ប្អូនៗយុវវ័យដែលគ្រប់អាយុឲ្យធ្វើអត្តសញ្ញាណប័ណ្ណ ត្រូវមកធ្វើអត្តសញ្ញាណប័ណ្ណឲ្យបានគ្រប់ៗគ្នា តាមការអញ្ជើញរបស់អធិការដ្ឋាននគរបាលខណ្ឌ។ ក្នុងឱកាសនោះលោក នុត ពុធដារ៉ា ក៏បានសំណូមពរទៅដល់ប្រជាពលរដ្ឋ ត្រូវរាយការណ៍ជាបន្ទាន់ដល់សមត្ថកិច្ចទាំងនគរបាលប៉ុស្តិ៍ ប៉េអិមខណ្ឌដែលពាក់ព័ន្ធករណីបទល្មើសទាំងឡាយដែលបងប្អូនបានជួយប្រទះដូចជា ករណីគ្រឿងញៀន បញ្ហាក្មេងទំនើង ល្បែងស៊ីសងគ្រប់ប្រភេទ រួមទាំងកន្ទុយលេខផងដែរ។ ដើម្បីឲ្យសមត្ថកិច្ចចុះបង្ក្រាបទាន់ពេលវេលា ពីព្រោះថា ប្រសិនបើករណីបទល្មើសទាំងនេះកើតមានហើយ គឺប្រាកដជាបទល្មើស លួច ឆក់ ប្លន់ កើតមានជាក់ជាមិនខាន។ ដូច្នេះដើម្បីការពារបទល្មើសទាំងនេះកុំឲ្យកើតមានឡើងនៅក្នុងមូលដ្ឋាន សូមប្រជាពលរដ្ឋចូលរួមសហការជាមួយសមត្ថកិច្ចពាក់ព័ន្ធឲ្យបានជាប់ ហើយដំណឹងទាំងនេះគឺមិនអាចឲ្យអ្នកណាដឹងនោះទេ៕
រ៉ាវុទ្ធ
0 Comments