ភ្នំពេញ ៖ បុរសម្នាក់ស្រវឹងស្រាជោគជាំបានជិះម៉ូតូជ្រុលបុកជាមួយម៉ូតូមួយគ្រឿងទៀតយ៉ាងពេញទំហឹងបណ្ដាលឲ្យផ្លោងខ្ទាតទៅបុកនឹងរថយន្តមួយគ្រឿងដែលគេស្ងៀមនៅនឹងចិញ្ចើមផ្លូវបណ្ដាលឱ្យរងរបួសសន្លប់ស្តូកស្តឹង ដោយរថយន្តរងការខូចខាតផ្នែកខាងមុខទាំងស្រុង។ ហេតុការណ៍នេះបានកើតឡើងកាលពីវេលាម៉ោង១២នឹង២៥នាទីរំលងអាធ្រាត្រ ឈានចូលថ្ងៃទី៨ ខែមករា ឆ្នាំ២០១៥ តាមបណ្តោយផ្លូវលេខ៤៨៨ ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
សាក្សីបានឱ្យដឹងថា នៅមុនពេលកើតហេតុគេបានឃើញយុវជនម្នាក់បានជិះម៉ូតូវ៉េសស្ប៉ាមួយគ្រឿង ពណ៌លឿង ពាក់ស្លាកលេខ1BY-7140 ទំនងជាស្រវឹងស្រាជោគជាំរេពេញផ្លូវ ក្នុងទិសដៅពីកើតទៅលិច លុះមកដល់ចំណុចកើតហេតុក៏បានបុកជាមួយនឹងម៉ូតូឌ្រីមសេ១២៥ ជិះឌុបគ្នា៣នាក់ក្នុងទិសដៅបញ្ច្រាសគ្នាយ៉ាងពេញទំហឹងបណ្ដាលឱ្យរងបួសសន្លប់ស្តូកស្តឹង ហើយម៉ូតូបានផ្លោងទៅបុកនឹងរថយន្តដែលម្ចាស់បានឈប់ចតស្ងៀមនៅនឹងចិញ្ចើមផ្លូវបណ្ដាលឱ្យរងការខូចខាតផ្នែកខាងមុខ រីឯអ្នកជិះម៉ូតូសេ១២៥ បានលើម៉ូតូជិះចេញទៅបាត់តែម្តង។
ក្រោយពេលកើតហេតុជនរងគ្រោះត្រូវបានអ្នកដំណើរទំនាក់ទំនងតាមទូរស័ព្ទទៅមិត្តភក្ដិឱ្យមកទទួលយកទៅព្យាបាល ចំណែករថយន្តដែលរងការខូចខាតភាគីបង្កបានយល់ព្រមយកទៅជួសជុលឱ្យវិញ ព្រោះដឹងពីកំហុសរបស់ខ្លួន៕
ឌួងវិរះជ័យ
0 Comments