ភ្នំពេញ ៖ ដោយសារតែមានភាពស្រវឹង យុវជន០២នាក់បានរងរបួសធ្ងន់និងស្រាល បន្ទាប់ពីពួកគេជិះម៉ូតូលឿនចាប់ហ្វ្រាំងមិនទាន់ក៏ជ្រុលទៅបុករថយន្តចំពាក់កណ្ដាលពេញទំហឹង កាលពីវេលាម៉ោង១០នឹង៥០នាទីយប់ ថ្ងៃទី៧ ខែមករា ឆ្នាំ២០១៥ តាមបណ្តោយផ្លូវលេខ១០៦ កែងនឹងផ្លូវលេខ១០៨ ស្ថិតក្នុងសង្កាត់វត្តភ្នំ ខណ្ឌដូនពេញ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញនារីម្នាក់ជិះរថយន្តវីស្តូ ពណ៌ក្រហមមួយគ្រឿង ពាក់ស្លាកលេខភ្នំពេញ 2Z-5411 ធ្វើដំណើរតាមបណ្តោយផ្លូវលេខ១០៦ ក្នុងទិសដៅពីកើតទៅលិច ខណៈពេលមកដល់ចំណុចផ្លូវបំបែកជា៤ កែងនឹងផ្លូវលេខ១០៨ ស្រាប់តែមានយុវជន០២នាក់បានជិះម៉ូតូធូដេ ជិះឌុបគ្នាតាមបណ្តោយផ្លូវលេខ១០៨ ទិសដៅពីត្បូងទៅជើងក្នុងល្បឿនយ៉ាងលឿនចាប់ហ្វ្រាំងមិនទាន់ក៏ជ្រុលទៅបុកចំពាក់កណ្ដាលរថយន្តពេញទំហឹង បណ្ដាលឱ្យអ្នកឌុបផ្លោងទៅបោកក្បាលជាមួយនឹងកញ្ចក់រថយន្តរងរបួសធ្ងន់ ចំណែកម្នាក់ទៀតរងរបួសស្រាល។
ប្រភពព័ត៌មានបន្តទៀតថា ក្រោយពេលកើតហេតុភាគីទាំងសងខាងបានធ្វើការសម្របសម្រួលគ្នា ដោយភាគីខាងរថយន្តមិនចង់វែង ឆ្ងាយច្រើន ក៏ចេញថ្លៃព្យាបាលឱ្យទៅខាងភាគីម៉ូតូដើម្បីបញ្ចប់រឿង ព្រោះមិនចង់រំខានដល់សមត្ថកិច្ច៕
រស្មី
0 Comments