ភ្នំពេញ ៖ ករណីវិវាទរវាងកម្មករនិងក្រុមហ៊ុនកាត់ដេរយីហោ CWKH ដែលមានទីតាំងនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ ដែលបានអូសបន្លាយពេលប្រហែល៥ខែមកហើយនោះ នៅតែមិនទាន់រកដំណោះស្រាយចេញនៅឡើយទេ ជាហេតុនាំឲ្យក្រុមសហព័ន្ធសហជីពចំនួន៤ស្ថាប័នបានធ្វើសន្និសីទកាសែតមួយ កាលពីព្រឹកថ្ងៃទី៣០ ខែមករា ឆ្នាំ២០១៥ដោយបានគំរាមថា ប្រសិនបើអាជ្ញាធរពាក់ព័ន្ធមិនជួយរកដំណោះស្រាយឲ្យបានឆាប់ចប់ទេនោះពួកគេនឹងឈានទៅធ្វើបាតុកម្មធំមួយនៅពេលណាមួយមិនខានឡើយ។
សន្និសីទកាសែតនេះត្រូវបានរៀបចំធ្វើឡើងនៅទីស្នាក់ការសហព័ន្ធសហជីពស្មារតីកម្មករខ្មែរ ដែលមានទីតាំងនៅចំណុចផ្ទះលេខ៣៥៨ ក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ដឹកនាំធ្វើដោយលោក ហីង ប៊ុនធឿន អនុប្រធានសហព័ន្ធសហជីពស្មារតីកម្មករខ្មែរ និងមានការចូលរួមពីសហព័ន្ធសហជីពចំនួនបីស្ថាប័នទៀតដូចជា សហព័ន្ធសហជីពសម្លេងយុវជនខ្មែរ សហព័ន្ធសហជីពការងារដើម្បីកម្ពុជា និងសហព័ន្ធសហជីពកម្មករនិយោជិត។
លោក ហីង ប៊ុនធឿន បានលើកឡើងនៅក្នុងសន្និសីទកាសែតនាពេលនោះថា ការធ្វើសន្និសីទកាសែតនៅពេលនេះ ក្នុងគោលបំណងចង់ឲ្យថ្នាក់ដឹកនាំនៃរាជរដ្ឋាភិបាល ជាពិសេសក្រសួងមន្ទីរស្ថាប័នពាក់ព័ន្ធទាំងអស់ជួយរកដំណោះស្រាយឲ្យបានឆាប់ផង ពីព្រោះកូដកម្មនៅរោងចក្រកាត់ដេរមួយនេះបានអូសបន្លាយពេលវេលាប្រហែល៥ខែមកហើយ ដែលធ្វើឲ្យកម្មករមួយចំនួនគ្មានលុយកាក់សម្រាប់ជីវភាពនោះទេ។
លោកបន្ដថា បើសិនជាអាជ្ញាធរពាក់ព័ន្ធទាំងអស់មិនអើពើជួយរកដំណោះស្រាយទេនោះលោករួមទាំងបណ្ដាសហព័ន្ធសហជីពជាដៃគូមួយចំនួនទៀតនឹងឈានទៅធ្វើបាតុកម្មធំមួយនៅពេលណាមួយមិនខានឡើយ។ លោកបន្ដថា ក្នុងរយៈពេលចុងក្រោយនេះ ខាងក្រសួងការងារ និងបណ្ដុះបណ្ដាលវិជ្ជាជីវៈហាក់បានរឹតបន្តឹងដល់បណ្ដាសហជីពក្នុងការបំពេញឯកសារចុះបញ្ជីការឲ្យសមស្របទៅនឹងលក្ខខណ្ឌច្បាប់ ដោយបានរកលេសផ្សេងៗជាច្រើនក្នុងការធ្វើឲ្យមានភាពស្មុកស្មាញក្នុងការដំណើរការចុះបញ្ជីការនេះ។
លោកបានបន្ដថា រោងចក្រកាត់ដេរនេះមានកម្មករសរុបចំនួន៤៨០នាក់ ហើយកាលពីថ្ងៃទី១៥ ខែសីហា ឆ្នាំ២០១៤ កម្មករ-កម្មការិនីបាននាំគ្នាធ្វើកូដកម្មព្រមៗគ្នា បន្ទាប់ពីត្រូវមេការរោងចក្រនេះឈ្មោះ ឆិន ស៊ូភីងបានស្ដីជេរប្រមាថទៅលើកម្មការិនីមានផ្ទៃពោះម្នាក់នៅចំពោះមុខមនុស្សជាច្រើន ដោយគ្រាន់តែគាត់បានហូបផ្លែស្វាយមួយចំណិត ដោយសារគាត់ហូបបាយមិនកើតព្រោះចាញ់កូន។ ចាប់ពីពេលនោះមក កម្មករបានបន្ដធ្វើកូដកម្មជាប់ជាប្រចាំ ហើយការដោះស្រាយក៏ចេះតែមានជាបន្តបន្ទាប់ ប៉ុន្តែមិនដែលទទួលបានលទ្ធផលនោះទេ ជាពិសេសទៅដោះស្រាយនៅក្រសួងការចំនួន១៤លើក ក៏មិនអាចដោះស្រាយចេញដែរ។ រឿងនេះបានឆ្លងកាត់ដល់ក្រុមប្រឹក្សាអាជ្ញាកណ្ដាលដល់តុលាការក្រុងភ្នំពេញទៀត ប៉ុន្តែតុលាការបែរជាចេញដីការក្សាការពារដល់ភាគីរោងចក្រ និងបានចេញដីកាកោះឲ្យតំណាងសហជីពនិងកម្មករនិយោជិតចំនួន១៥នាក់ចូលបំភ្លឺនៅតុលាការពីបទព្រហ្មទណ្ឌទៅវិញ។
លោកបន្ដថា នៅពេលដំណើរវិវាទមិនទាន់ដោះស្រាយចប់ផង បែរជាភាគីរោងចក្របានយកកម្មករថ្មីមកឲ្យចូលធ្វើការជំនួសកន្លែងកម្មករចាស់ នៅពេលកម្មករចូលធ្វើការតាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាលហើយនោះ ខាងក្រុមហ៊ុនបានធ្វើកិច្ចសន្យាសាជាថ្មីដើម្បីលុបបំបាត់អតីតភាពការងាររបស់កម្មករចាស់ទៅវិញ។
ជាមួយគ្នានេះ លោកក៏បានលើកឡើងអំពីស្ថានភាពរោងចក្រកាត់ដេរយីហោជីងយី ខេបបូឌា ខូអិលធីឌី នៅឯខេត្តកំពង់ឆ្នាំង ក៏មានបញ្ហាវិវាទស្រដៀងគ្នានេះដែរ ហើយលោកក៏សំណូមពរដល់ស្ថាប័នពាក់ព័ន្ធទាំងអស់ មេត្តាជួយរកដំណោះស្រាយឲ្យបានសមស្របណាមួយសម្រាប់កម្មករនិយោជិតទាំងអស់នោះផង៕
វិទូ
0 Comments