កណ្ដាល ៖ នៅសៀលថ្ងៃទី២៩ ខែមករា ឆ្នាំ២០១៥ សាលាដំបូងខេត្តកណ្តាលបានធ្វើការប្រកាសលោក លឹម សុគន្ថា អតីតចៅក្រមសាលាដំបូងខេត្តកណ្តាលចូលកាន់តំណែងជាផ្លូវការជាព្រះរាជអាជ្ញានៃអយ្យការអមសាលាដំបូងខេត្តកណ្តាល។ ចំណែកលោក អ៊ុក គឹមសិទ្ឋិ អតីតព្រះរាជអាជ្ញាត្រូវបានផ្ទេរតួនាទីជាអគ្គព្រះរាជអាជ្ញារងនៃមហាអយ្យការអមតុលាការកំពូល។ ការប្រកាសនេះធ្វើឡើងក្រោមអធិបតេយ្យភាពលោក អង្គ វង្សវឌ្ឈនា រដ្ឋមន្ត្រីក្រសួងយុត្តិធម៌ និងមានការចូលរួមពីសំណាក់លោក លោកស្រី ជាមន្ត្រីរាជការ កងកម្លាំងប្រដាប់អាវុធ ជាច្រើនរូបទៀត។
លោក អ៊ុក គឹមសិទ្ឋិបានថ្លែងរាយការណ៍អំពីបេសកកម្មរបស់ខ្លួនមួយចំនួនដែលបានបំពេញក្នុងរយៈពេល៦ឆ្នាំកន្លងមកជូនអង្គពិធី។ លោកបានថ្លែងថា អយ្យការអមសាលាដំបូងខេត្តកណ្តាលមានក្របខណ្ឌចំនួន១៨រូបដែលក្នុងនោះមានព្រះរាជអាជ្ញាមួយរូប ព្រះរាជអាជ្ញារង៧រូប ដែលមានស្ត្រីមួយរូប ក្រឡាបញ្ជីមាន១០រូប ដែលក្នុងនោះមានក្រឡាបញ្ជីនាយកមួយរូប។ រឿងសល់ពីមុនចំនួន២០៧រឿង និងចូលក្នុងឆ្នាំ២០១៤ មានចំនួន១២៦២រឿងសរុប១៤៦៩។ បទល្មើសចូលក្នុងឆ្នាំ២០១៤មានចំនួន១២៦២រឿង ក្នុងនោះមានបទឧក្រិដ្ឋនិងបទមជ្ឈិមជាដើម។
លោក អង្គ វង្សវឌ្ឈនា រដ្ឋមន្ត្រីក្រសួងយុត្តិធម៌បានថ្លែងថា ក្នុងរយៈពេលកន្លងមកអយ្យការអមសាលាដំបូងខេត្តកណ្តាលក្រោមការដឹកនាំរបស់លោក អ៊ុក គឹមសិទ្ឋិក៏បានធ្វើឲ្យស្ថាប័នមួយនេះមានការរីកចម្រើនគួរឲ្យកត់សម្គាល់។ ជាពិសេសលើចំណាត់ការលើរដ្ឋបាលចំណាត់ការលើសំណុំរឿងក្តីនានាការដឹកនាំមន្ត្រីនគរបាលយុត្តិធម៌ក្រោមចំណុះខេត្តកណ្តាលប្រកបដោយលទ្ធផលគួរជាទីមោទនភាព។ លោករដ្ឋមន្ត្រីយុត្តិធម៌បន្តថា លោក អ៊ុក គឹមសិទ្ឋិមានស្នាដៃល្អក្នុងការបំពេញការងារនាពេលបច្ចុប្បន្ន ក៏ដូចជាពេលកន្លងមកប្រកបដោយការយកចិត្តទុកដាក់។ ឆ្លងតាមស្នាដៃនេះ លោក អ៊ុក គឹមសិទ្ឋិ ត្រូវបានក្រសួងយុត្តិធម៌ពិនិត្យលក្ខណៈសម្បត្តិស្នើតែងតាំងជាអគ្គព្រះរាជអាជ្ញារងនៃមហាអយ្យការអមតុលាការកំពូលតែម្តង។
ដោយឡែកលោក លឹម សុគន្ថា ដែលជាព្រះរាជអាជ្ញាទើបតែងតាំងថ្មីបានឡើងប្ដេជ្ញាចិត្តមួយចំនួន ទី១-គោរពនិងប្រតិបត្តិតាមរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា។
ទី២-គោរពនិងប្រតិបត្តិតួនាទីភារកិច្ចដែលច្បាប់និងថ្នាក់លើប្រគល់ឲ្យ។ ទី៣-ខិតខំឲ្យអស់ពីកម្លាំងកាយចិត្តនិងប្រាជ្ញាដោះស្រាយរឿក្តីជូនប្រជាពលរដ្ឋឲ្យបានលឿនមានប្រសិទ្ធភាពមានតម្លាភាពដោយឈរលើគោលការណ៍បម្រើផលប្រយោជន៍សាធារណៈជាធំ និងចូលរួមធានានូវការអនុវត្តនីតិវិធីត្រឹមត្រូវតាមច្បាប់ និងដំណើរប្រតិបត្តិទៅនៃតុលាព្រហ្មទណ្ឌ។ ទី៤-សហការជាមួយអាជ្ញាធរដែនដីមន្ត្រីនគរបាលយុត្តិធម៌ក្នុងសមត្ថកិច្ចដែនដី ព្រមទាំងមន្ត្រីរាជការទូទាំងប្រទេសធ្វើយ៉ាងណាស្វែងរកយុត្តិធម៌ការពារសន្តិសុខសណ្ដាប់ធ្នាប់របៀបរៀបរយជូនប្រជាពលរដ្ឋ។ ទី៥-ចូលរួមកាត់បន្ថយអំពើពុករលួយផ្សេងៗនៅក្នុងប្រព័ន្ធផ្តល់សេវាយុត្តិធម៌ជូនប្រជាពលរដ្ឋឲ្យបានជាអតិបរមា។
ទី៦-ខិតខំរៀនសូត្រដើម្បីយកចំណេះដឹងជាពុទ្ធិក្នុងការអនុវត្តការងារឲ្យមានប្រសិទ្ធភាពថែមទៀតយកតម្រូវតាមចំណុចដឹកនាំល្អៗរបស់លោកអតីតព្រះរាជអាជ្ញា និងរៀមច្បងផ្សេងៗទៀត៕
មុនី
0 Comments