ភ្នំពេញ ៖ ក្រសួងអប់រំ យុវជន និងកីឡា អង្គការ អេដ អេ អាក់ស្យុង អង្គការដៃគូជាតិ និង អន្តរជាតិចំនួន១៧បានផ្ដួចផ្ដើមបង្កើតឱ្យមានគម្រោងអប់រំមួយមានឈ្មោះថា «គម្រោងដៃគូរួមគ្នាផ្តល់ឱកាសអប់រំដល់កុមារបាត់បង់ឱកាសនៅកម្ពុជា» កាលពីព្រឹកថ្ងៃទី២៩ ខែមករា ឆ្នាំ២០១៥ នៅសណ្ឋាគារកាំបូឌីយ៉ាណា ក្រោមអធិបតីភាពលោកលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នេះបើយោងការផ្សាយរបស់ទីភ្ញាក់ងារសារព័ត៌មានកម្ពុជា។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា គម្រោងដៃគូរួមគ្នាផ្តល់ឱកាសអប់រំដល់កុមារបាត់បង់ឱកាសនៅកម្ពុជានេះ គឺធ្វើឡើងដើម្បីពិភាក្សា គ្នា ដោះស្រាយទៅលើបញ្ហា និងការផ្តល់ឱកាសដល់កុមារា-កុមារីកម្ពុជាចំនួន៥៧.០០០នាក់ ដើម្បីឱ្យអ្នកទាំងអស់នោះអាចមានឱកាសចូលរៀន ទទួលបាននូវសេវាអប់រំ និងទទួលបាននូវជំនាញសម្រាប់ពួកគេប្រចាំជីវិត។
លោករដ្ឋមន្ត្រីបន្តថា គម្រោងដៃគូរួមគ្នានេះមានវិសាលភាពគ្របដណ្ដប់ទាំង២៥រាជធានី-ខេត្ត និងមានរយៈពេលអនុវត្តន៍គម្រោងចំនួន៤២ខែ ដោយចំណាយថវិកាចំនួនប្រមាណជា២០លានដុល្លារ ចាប់តាំងពីខែមិថុនា ឆ្នាំ២០១៤ ដល់ខែវិច្ឆិកា ឆ្នាំ២០១៧។ ក្រុមគោលដៅរបស់គម្រោងនេះ គឺកុមារបាត់បង់ឱកាសទទួលបានការអប់រំនៅកម្ពុជាចំនួនជាង៥៧.០០០នាក់ និងក្រុមគ្រួសារគ្រូបង្រៀនចំនួនប្រហែល៤.០០០នាក់ ក្រុមប្រឹក្សាឃុំ-សង្កាត់ចំនួន១៥០នាក់ និងសមាជិកគណៈកម្មការទ្រទ្រង់សាលាចំនួនប្រហែល១.២០០នាក់។
លោក ជិន ច័ន្ទវាសនា នាយកប្រតិបត្តិភាពជាដៃគូអប់រំនៃអង្គការក្រៅរដ្ឋាភិបាល (NEP) បានថ្លែងថា នេះគឺជាគម្រោងមួយដ៏ល្អបំផុត ដែលជាឱកាសមាសមួយសម្រាប់កុមារមួយចំនួន ដោយសារតែស្ថានភាពរបស់គាត់មិនបានអំណោយផល និងមិនមានឱកាសបានចូលរួមនៅក្នុងការអប់រំ។ NEP នឹងកំណត់ចេញពីគម្រោងនេះថា តើអ្វីទៅគឺជាការអនុវត្តល្អ ហើយNEP នឹងមានតួនាទីមួយផ្លាស់ប្ដូរនូវបទពិសោធន៍ ដែលគម្រោងបានធ្វើជាមួយអង្គការដៃគូផ្សេងៗទៀត ទៅតាមក្រុមនីមួយៗ ដែលយើងជឿជាក់ថា ជាក្រុមដែលបាត់បង់ឱកាសក្នុងការទទួលបាននូវការអប់រំ មានដូចជាក្រុមកុមារពិការ ក្រុមកុមារនៅតាមចិញ្ចើមថ្នល់ ក្រុមកុមារដែលមកពីតំបន់ជនជាតិភាគតិច ក៏ដូច ជាក្រុមកុមារដែលមានភាពក្រីក្រ និងក្រុមកុមារដែលនៅតំបន់ឆ្ងាយដាច់ស្រយាល។
លោកបន្តថា យើងឃើញថា កុមារដែលបញ្ចូលទៅក្នុងគម្រោងធ្វើការរួមគ្នាជាដៃគូនេះ គឺឆ្លើយតបយ៉ាងប្រត្យក្សទៅនឹងអ្វីដែលអង្គការ NEP បានធ្វើការសិក្សាស្រាវជ្រាវទាក់ទងទៅនឹងសិទ្ធិទទួលបាននូវការអប់រំដែលយើងឃើញថាកុមារដែលនៅក្នុងក្រុមកុមារពិការ ទាំងពិការរូបរាងកាយ ទាំងពិការនូវសតិបញ្ញា ក៏ដូចជាកុមារដែលស្ថិតនៅតំបន់ជនជាតិភាគតិច គឺជាកុមារដែលមិនទាន់បានទទួលនូវសិទ្ធិការអប់រំបានពេញលេញនៅឡើយទេ ព្រោះពួកគាត់នៅជួបឧបសគ្គមួយចំនួន ដែលមិនអាចឱ្យពួកគាត់ទទួលបាននូវការអប់រំ ទោះបីជានាពេលបច្ចុប្បន្ននេះយើងឃើញថា មានការអភិវឌ្ឍសាលារៀននៅក្បែរពួកគាត់កាន់តែកៀកទៅៗក៏ដោយ។
លោកស្រី យ៉ាស្មីន អាឌីន ប្រធានក្រុមប្រឹក្សាភិបាលអង្គការ អេដ អេ អាក់ស្យុង ប្រចាំតំបន់បានថ្លែងថា កុមារដែលមានភាពងាយរងគ្រោះមិនមែនមានតែប្រទេសកម្ពុជាទេ គឺមាននៅប្រទេសដទៃទៀតក្នុងពិភពលោក ដែលក្នុងនោះមានកុមារក្រីក្រ កុមារជនជាតិភាគតិច កុមារនៅតំបន់ដាច់ស្រយាលជាដើម ដែលពួកគេសុទ្ធតែជាកុមារត្រូវទទួលបានការអប់រំ។ ការអប់រំគឺជាវិស័យមួយល្អសម្រាប់កុមារ ហើយយើងទាំងអស់គ្នាដែលជាអ្នកក្រីក្រអាចក្លាយទៅជាប្រធានាធិបតី ក្លាយទៅជាវេជ្ជបណ្ឌិតបានតាមរយៈការអប់រំ៕
ឌួងវិរះជ័យ
0 Comments