ភ្នំពេញ ៖ តាមច្បាប់អាពាហ៍ពិពាហ៍នៅកម្ពុជា បុរសត្រូវមានអាយុចាប់ពី២០ឆ្នាំ ចំណែកឯស្ត្រីត្រូវមានអាយុចាប់ពី១៨ឆ្នាំឡើងទៅ តែលក្ខខណ្ឌពិសេសរបស់វា ប្រសិនបើស្ត្រីនោះមានផ្ទៃពោះមុនអាយុនោះ គេអាចអនុញ្ញាតឲ្យស្ត្រីនោះរៀបអាពាហ៍ពិពាហ៍មុនអាយុ១៨ឆ្នាំបានដែរ។ ប៉ុន្តែនៅស្រុកស្រែចំការឬទីជនបទដាច់ការរៀបអាពាហ៍ពិពាហ៍ភាគច្រើនគឺអាយុក្រោម១៨ឆ្នាំទាំងបុរស និងស្ត្រី ហើយការរៀបអាពាហ៍ពិពាហ៍ទាំងវ័យក្មេងបែបនេះប្រឈមនឹងបញ្ហាលែងលះច្រើនណាស់ ហើយកត្តាអ្វីខ្លះដែលបណ្ដាលឱ្យគូស្វាមីភរិយាអាចសុំផ្តាច់សង្វាសឬលែងលះគ្នាទៅបាន ហើយដើម្បីលែងលះស្របតាមច្បាប់ តើត្រូវធ្វើដូចម្ដេចខ្លះដែរ? បញ្ហាសំខាន់ដែលគូស្វាមីភរិយាអាចសុំផ្តាច់មគ្គសង្វាសឬលែងលះគ្នានោះ គឺការរស់នៅមិនចុះសម្រុងគ្នា។ ឯមូលហេតុសំខាន់ៗ គឺដោយសារតែទី១- ប្ដី ឬប្រពន្ធនោះចុះចោលគ្នាយូរពេក ទី២-ប្ដី ឬប្រពន្ធនោះលេងល្បែងស៊ីសង ពាលាអាវ៉ាសែ ការជេរប្រមាថដល់ញាតិបុព្វជិត ទី៣-អសមត្ថភាព ផ្លូវភេទ(បុរសឬ ស្ត្រី) ទី៤-ការវាយដំឬធ្វើទុក្ខបុកម្នេញដល់ប្ដីឬប្រពន្ធ ទី៥-មានចរិតផ្ទុយពីសីលធម៌ ប្រព្រឹត្តអំពើអាស ឬ អនាចារ ទី៦-ប្ដី ឬប្រពន្ធមានគម្លាតចំណេះដឹងនិងការងារ ពោលគឺអាងរៀងៗខ្លួន ជាពិសេសខាងស្ត្រីមានការងារល្អប្រាប់ខែខ្ពស់ឬក្រុមគ្រួសារមានទ្រព្យសម្បត្តិច្រើនជាងខាងប្ដី។
តាមការស្រាវជ្រាវ គេសង្កេតឃើញការលែងលះគ្នា៧០ភាគគឺផ្ដើមចេញពីស្ត្រីជាអ្នកផ្ដើមគំនិតមុន ហើយគេដឹងទៀតថា ស្ត្រីដែលអាងលែងលះហើយលែងគ្នាដាច់ស្រលះនោះក៏ដោយសារស្ត្រីភាគច្រើនមានសម្អាងអ្វីមួយ ដោយមិនរណបបុរសមួយទៀតឱ្យពុកម្តាយចាប់បង្ខំកូនដែលនៅក្មេងៗឱ្យដែលកូនៗមិនស្រលាញ់គ្នាឬកូនមានសង្សាររួចហើយ។ ប្រការនេះគេសង្កេតឃើញអត្រានៃការលែងលះមានកម្រិតខ្ពស់ផងដែរ។
ដើម្បីលែងលះគ្នាពីដើមគេតម្រូវឲ្យគូភាគីប្ដឹងទៅគណៈកម្មការ ឃុំឬសង្កាត់ ក៏ប៉ុន្តែបច្ចុប្បន្នគេពុំធ្វើដូច្នោះទេ គឺគេប្ដឹងទៅតុលាការ។ បច្ចុប្បន្នការលែងលះគ្នា វាមាន៣ប្រភេទ ទី១-គឺជាការលែងលះគ្នាមែនទែន រវាងខ្មែរ និងខ្មែរ ទី២-គឺការលែងលះគ្នារវាងខ្មែរនិងបរទេស និងទី៣-គឺការលែងលះគ្នាក្លែងក្លាយ ដើម្បីបានវង្សត្រកូលល្អឬការងារល្អ ឬបានទៅរស់នៅក្រៅប្រទេស ក៏ប៉ុន្តែ ពួកគេនៅតែមានការរួមមេត្រីឬនៅជាមួយគ្នាដដែល៕
ឌីរៀ
0 Comments