ភ្នំពេញ ៖ ជនសង្ស័យម្នាក់ជាអ្នកបើកបររថយន្តដឹកសម្ភារៈឲ្យក្រុមហ៊ុនស៊ីហ៊ូហ៊ុយ ត្រូវបានចាប់ខ្លួន យកមកប្រគល់ឲ្យសមត្ថកិច្ចនគរបាលប៉ុស្តិ៍រដ្ឋបាលដង្កោ កាលពីវេលាម៉ោង១៨ និង៣០នាទីយប់ថ្ងៃទី២៧ ខែមករា ឆ្នាំ២០១៥ ដោយចោទប្រកាន់ករណីលួចបូមប្រេងពីរថយន្តលក់ គិតរហូតដល់បច្ចុប្បន្ននេះអស់ជាង១ពាន់លីត្រ។
លោក តុន មូនី នាយរងនគរបាលប៉ុស្តិ៍រដ្ឋបាលដង្កោប្រាប់ឲ្យដឹងថា ជនសង្ស័យមានឈ្មោះ សន រុន ភេទប្រុស អាយុ២៨ឆ្នាំ មុខរបរបើកបរ ស្នាក់នៅផ្ទះជួលភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។ ការឃាត់ខ្លួនជនសង្ស័យខាងលើ តាមរយៈពាក្យបណ្ដឹងពីឈ្មោះ ធឿន សុភារិទ្ធិ ភេទប្រុស អាយុ៤០ឆ្នាំ ជាប្រធានរដ្ឋបាលក្រុមហ៊ុនស៊ីហ៊ូហ៊ុយ។
លោកនាយរងប៉ុស្តិ៍តរដ្ឋបាលប្រាប់បន្តថា មុនពេលធ្វើការឃាត់ខ្លួនជនសង្ស័យខាងលើ គឺប្រធានរដ្ឋបាលក្រុមហ៊ុនលោក ធឿន សុភារិទ្ធិ កំពុងអង្គុយពិនិត្យរបាយការណ៍នៅក្នុងការិយាល័យហើយ ខណៈនោះកូនថៅកែក្រុមហ៊ុនម្នាក់ឈ្មោះ ស៊ី ប៉កុក ដែលជាអ្នកត្រួតពិនិត្យបុងប្រេងចាក់រថយន្តរបស់ក្រុមហ៊ុន បានរាយការណ៏ទៅប្រធានរដ្ឋបាលថា រថយន្តពាក់ ស្លាកលេខ៤៧២២ បើកបរដោយឈ្មោះ សន រុន(ជនសង្ស័យ) មានករណីបាត់ប្រេងច្រើនណាស់។ នៅពេលនោះប្រធានរដ្ឋបាលក៏បញ្ជាឲ្យឈ្មោះ ស៊ី ប៉កុក ឆែកមើលបុងប្រេងចាប់ពីថ្ងៃទី១ ខែមករា ឆ្នាំ២០១៥ ដល់ថ្ងៃទី២៧ ខែមករា ឆ្នាំ២០១៥ ពេលដែលឆែកពិនិត្យមើលទៅឃើញថា បាត់ប្រេងអស់ ៣៨២លីត្រ។ ដោយមានការសង្ស័យកាន់តែខ្លាំងឡើងៗប្រធានរដ្ឋបាលក៏ឲ្យឆែកមើលបន្តទៀត គឺគិតចាប់ពីខែតុលា រហូតដល់ខែធ្នូ ឆ្នាំ២០១៤ ពិនិត្យឃើញថា ប្រេងបាត់អស់១.៥៥១លីត្រ ហើយបូកនឹងខែមករា ឆ្នាំ២០១៥ថ្មីៗនេះ សរុបទាំងអស់១.៩៣៣លីត្រ។
ប្រភពពីនាយរងប៉ុស្តិ៍ដដែលប្រាប់បន្តឲ្យដឹងថា ក្រោយពីពិនិត្យឃើញថាប្រេងបានបាត់ច្រើនលើសលប់បែបនេះ ប្រធានរដ្ឋបាលក្រុមហ៊ុនលោក ធឿន សុភារិទ្ធិ ក៏បានហៅជនសង្ស័យមកសួរនាំ ហើយ ធ្វើកំណត់ហេតុក្រុមហ៊ុន ជនសង្ស័យក៏បានសារភាពចំពោះមុខក្រុមហ៊ុនថា រូបគេពិតជាបានបូមប្រេងរបស់ក្រុមហ៊ុនលក់ពិតប្រាកដមែន។ ជនសង្ស័យត្រូវបាននាំខ្លួនមកកាន់ទីស្នាក់ការប៉ុស្តិ៍រដ្ឋបាលដង្កោសាកសួរជំហ៊ានដំបូង និងបញ្ជូនបន្តទៅកាន់អធិការដ្ឋាននគរបាលខណ្ឌដង្កោ ដើម្បីមានវិធានការទៅតាមផ្លូវច្បាប់៕
រ៉ាវុទ្ធ
0 Comments