ភ្នំពេញ ៖ នៅរសៀលថ្ងៃទី៨ ខែមករា ឆ្នាំ២០១៥ សមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃដឹកនាំដោយលោក ខៀវ សាម៉ន ជានាយកមន្ទីរ និងលោក វ៉ាន់ កុសល នាយករងមន្ទីរ បានដឹកនាំកម្លាំងបង្ក្រាបមុខសញ្ញាជនសង្ស័យជួញដូរថ្នាំញៀនចំនួន៥នាក់ ជាជនជាតិនីហ្សេរីយ៉ា និងស្ត្រីខ្មែរម្នាក់ទៀតដែលជាភរិយារបស់ជនសង្ស័យ។ សម្ភារៈដកហូតបានរួមមាន ថ្នាំញៀនចំនួន៦កញ្ចប់ និងជញ្ជីងថ្លឹងថ្នាំញៀន១។ យោងតាមប្រសាសន៍របស់លោក វ៉ាន់ កុសល នាយករងមន្ទីរប្រឆាំងគ្រឿងញៀនក្រសួងមហាផ្ទៃបានឲ្យដឹងថា ជនសង្ស័យទាំង៥រូបនេះ គឺសមត្ថកិច្ចរបស់លោកបានឃាត់ខ្លួននៅចំនួន៣គោលដៅ គោលដៅទី១-ស្ថិតនៅផ្ទះលេខ១៨ ផ្លូវ២៤bt ក្រុមទី៦ ភូមិសន្សំកុសល២ សង្កាត់បឹងទំពុន។ ឃាត់ខ្លួនជនសង្ស័យចំនួន៣នាក់ ប្រុស២នាក់ និងស្រី១នាក់ ជាជនជាតិខ្មែរ។ និងជនសង្ស័យ២នាក់ទៀតឃាត់ខ្លួននៅភូមិចំរើនផល១ សង្កាត់បឹងទំពុន និង១គោលដៅទៀតចាប់ខ្លួនតាមផ្លូវលំក្នុងភូមិសន្សំកុសល២។
លោកបន្តថា ការឃាត់ខ្លួនជនសង្ស័យទាំង៥រូបនេះ គឺសមត្ថកិច្ចបានឃាត់ខ្លួនជនសង្ស័យម្នាក់ដែលកំពុងយកថ្នាំញៀនទៅលក់ឲ្យមុខសញ្ញាដែលចាំទិញស្របពេលសមត្ថកិច្ចទៅដល់ក៏បានធ្វើការឃាត់ខ្លួនរកឃើញថ្នាំញៀន២កញ្ចប់ធំលាក់ក្នុងម៉ូតូ ហើយសមត្ថកិច្ចក៏បានបន្តឃាត់ខ្លួន៤នាក់ទៀត នៅចំណុចភូមិសន្សំកុសល២ ចំនួន២គោលដៅ និងភូមិចំរើនផល១គោលដៅ។ លោកបន្តថា ជនសង្ស័យទាំង៥រូបនេះ សមត្ថកិច្ចពុំទាន់ធ្វើការសាកសួរអត្តសញ្ញាណនៅឡើយទេ រង់ចាំស្រាវជ្រាវស្វែងរកចាប់ខ្លួនជនសង្ស័យដទៃទៀតដែលកំពុងគេចខ្លួន ហើយសមត្ថកិច្ចនឹងធ្វើសន្និសីទកាសែតបង្ហាញមុខជនសង្ស័យទាំងអស់នៅមន្ទីរប្រឆាំងគ្រឿងញៀនក្រសួងមហាផ្ទៃ៕
នរា
0 Comments