បន្ទាយមានជ័យ ៖ ច្រកអន្តរជាតិប៉ោយប៉ែត គឺជាច្រកមួយផ្សារភ្ជាប់រវាងប្រទេសកម្ពុជា និង ប្រទេសថៃ ដែលពោរពេញទៅដោយភ្ញៀវទេសចរណ៍រាប់ពាន់នាក់ដែលបានចេញចូលតាមច្រកទ្វារនោះ តែបែរជាច្រកនេះពោរពេញទៅដោយធុងសំរាម ដោយមានផ្ទុកសំរាមគរនៅនិងចិញ្ចើមផ្លូវ ហាក់បីដូចជាយកសំរាមមកទទួលភ្ញៀវទេសចរណ៍អញ្ចឹង។
ដោយបានមើលឃើញពីកំណើនភ្ញៀវដែលចេញចូលច្រើនលើសលប់ រាជរដ្ឋាភិបាលបានយកចិត្តទុកដាក់យ៉ាងខ្លាំងចំពោះច្រកមួយនេះ តែបែរជាអាជ្ញាធរក្រុង និងសមត្ថកិច្ចដែលឈរជើងប្រចាំការនៅទីនោះ មិនយកចិត្តទុកដាក់ចំពោះមុខមាត់ប្រទេសជាតិទាល់តែសោះ ដោយទុកឲ្យមានគំនរសំរាមតាមដងផ្លូវចេញចូល ហាក់ដូចជាយកសំរាមមកទទួលភ្ញៀវទេសចរណ៍អញ្ចឹង ដែលធ្វើឲ្យជះក្លិនស្អុយលើភ្ញៀវទេសចរណ៍ទៅវិញ។ គំនរសំរាមទាំងអស់នោះត្រូវបានគេចោលរាយប៉ាយដោយគ្មានធុងសំរាមដាក់ត្រឹមត្រូវនោះទេ ហើយបើមានគឺមានតែធុងសំរាមដែលធ្វើពីសំបកកង់ឡានដែលមានសភាពចាស់ទ្រុឌទ្រោមមិនអាចផ្ទុកសំរាមបានឡើយ។ ចំណែកឯក្លិនស្អុយភាគច្រើនគឺចេញមកពីធុងសំរាមទាំងនោះ។
អុំស្រី លីណា មានមុខរបរជាអ្នករុញរទេះលក់គ្រឿងម្ជូរ ដែលលក់ក្បែរគំនរសំរាមបាននិយាយឲ្យដឹងថា ជារៀងរាល់ថ្ងៃសំរាមតែងតែមាននៅគរក្បែរគាត់លក់ ហើយមានក្លិនស្អុយណាស់ អ្នកធ្វើដំណើរទូទៅឲ្យតែមកដល់ទីនេះតែងយកដៃខ្ទប់មុខ និងបិទច្រមុះហើយ។
បងស្រី ដា ក៏បាននិយាយដូចគ្នានេះដែរថា មានតែធុងមិនបាច់មានសំរាមក៏មានក្លិនស្អុយដែរគឺស្អុយចេញពីធុងតែម្តង។ គាត់និយាយបន្តទៀតថា ធុងសំរាមចាស់ខូចចង់អស់ទៅហើយ ដូច្នេះសំរាមដែលដាក់កន្លងមកដែលហូរទឹកជាប់និងធុងនោះ ក៏បង្កជាក្លិនស្អុយដែរ។ ពួកលក់ដូរក្បែរនោះគឺទ្រាំណាស់ដើម្បីក្រពះ។ ពួកគាត់សួរថា តើអាជ្ញាធរអត់ដូរធុងសំរាមថ្មីទេអី?
ជួបតាមទូរស័ព្ទកាលពីរសៀលថ្ងៃទី០៧ ខែមករា លោក អាន វណ្ណះ ប្រធានស្នាក់ការត្រួតពិនិត្យច្រកទ្វារអន្តរជាតិប៉ោយប៉ែតបានឲ្យដឹងថា លោកអត់បានដឹងទេកន្លងមក ព្រោះការងារច្រើនដោយនេះជាការងាររបស់អាជ្ញាធរក្រុង និងខាងអ្នកប្រមូលសំរាម។
តែក្រោយពីមានការសួរនាំរួចមក លោកនឹងចាត់ការត្រួតពិនិត្យឡើងវិញហើយ៕
អ. ពៅ៨មករា២០១៥
0 Comments