ខេត្តក្រចេះ ៖ បើយោងតាមរបាយការណ៍របស់ការិយាល័យចរាចរណ៍ផ្លូវគោក ខេត្តក្រចេះបានឲ្យដឹងកាលពីថ្ងៃទី២ ខែមករាឆ្នាំ២០១៥ថា គ្រោះថ្នាក់ចរាចរណ៍ នៅទូទាំងខេត្តក្រចេះក្នុងឆ្នាំ២០១៤ បានកើត ឡើង ១៨៥លើក បានបណ្តាលឲ្យមានមនុស្សស្លាប់ចំនួន១២២នាក់ និងរងរបួសធ្ងន់ស្រាល២៣៧នាក់។
ចំនួននេះបើធៀបនឹងឆ្នាំ២០១៣កន្លងមកឃើញថាមានការកើនឡើងចំនួន១លើកនិងមនុស្សស្លាប់មានការកើនឡើងដល់ទៅ ៣៣នាក់។
របាយការណ៍របស់ការិយាល័យចរាចរណ៍ផ្លូវគោកខេត្ត ដដែលបានឲ្យដឹងទៀតថាក្នុងចំណោម ករណីគ្រោះថ្នាក់ចរាចរណ៍ទាំង ១៨៥លើក ក្នុងនោះបង្កដោយខ្លួនឯង ២៦លើក ហើយក្នុងចំណោមស្រុកទាំង៥ និង ក្រុង១ នៅទូទាំងខេត្ត ក្នុងនោះដែរ ស្រុកស្នួលគឺត្រូវបានគេរកឃើញថា មានអត្រាកើតឡើងច្រើនជាងគេរហូតដល់ ទៅ៧៨លើកក៏បានបង្កឲ្យខូចខាតរថយន្ត១០២គ្រឿង,ម៉ូតូ១៧៥គ្រឿង។ មូលហេតុដែលបង្កឲ្យមានគ្រោះថ្នាក់ចរាចរណ៍ទាំងនេះ គឺត្រូវបានមន្ត្រីជំនាញបានធ្វើការសន្និដ្ឋានវាយតម្លៃថា បណ្តាលមកពីបើកបរលើសល្បឿន៥០% បើកបរមិនគោរពសិទ្ធិអាទិភាពជាង២០% បើកបរដោយស្រវឹង១៥% និង ប្រជែង៤%។
រាល់ករណីគ្រោះថ្នាក់ចរាចរណ៍ទាំងនេះ គឺបានបង្កឲ្យមានមនុស្ស ១២២នាក់ បានស្លាប់ក្នុងនោះស្រី ៤៦នាក់ ដែលចំនួននេះបើប្រៀបធៀបទៅនិងឆ្នាំ២០១៣គឺមាន ចំនួនកើនឡើង ៣៣នាក់ ស្មើនិងជាង៣០%។ ជនរងគ្រោះទាំងនេះបានស្លាប់នៅនឹងកន្លែងកើតហេតុផ្លូវសាធារណៈ ៩០នាក់ ស្លាប់ពេលបញ្ជូនតាមផ្លូវ ១នាក់ និងស្លាប់នៅមន្ទីរពេទ្យ ៣១នាក់។
ជាមួយគ្នានេះក៏បានបង្កឲ្យមានមនុស្សរងរបួសធ្ងន់និងស្រាល ២៣៧នាក់ ស្រី៧០នាក់លោកវរសេនីយ៍ទោ យីវ សុមន្ថានាយការិយាល័យ ចរាចរណ៏ខេត្តក្រចេះ បានអះអាងថា រាល់ករណីទាំងនេះ គឺមានសំណុំរឿង ៣៤ករណី ដែលកើតឡើងនៅតាមស្រុក-ក្រុង គឺមន្ត្រីជំនាញកំពុងតែធ្វើការស្រាវជ្រាវកសាងសំណុំរឿង និងមាន៤ករណីក៏ កំពុងតែ សម្រុះសម្រួលដោះស្រាយ ក៏បានសម្រុះសម្រួលបញ្ចប់បាន ៩២ករណី និងបាន បញ្ចូនកសាងសំណុំរឿង ទៅកាន់ស្ថាប័នអយ្យការ ២៩ករណី និងអ្នកបើកបរ ៥នាក់ផងដែរ។
ពាក់ព័ន្ធ និងអត្រានៃគ្រោះថ្នាក់ចរាចរណ៍សម្រាប់ខេត្តក្រចេះ ដែលកំពុងតែមានកំណើនកើនឡើងចំនួនមនុស្សស្លាប់ និងរងរបួសកើនឡើងដែរនោះ លោកវរសេនីយ៍ឯក ហន ប៉ូច ស្នងការរងកណ្តាលសណ្តាប់ធ្នាប់ខេត្តក្រចេះ បានបញ្ជាក់ឲ្យដឹងថា នៅថ្ងៃទី២ ខែមករា ក្នុងឆ្នាំ២០១៥នេះ នគរបាលចរាចរណ៍ នឹងចុះធ្វើការរឹតបន្តឹង ការអនុវត្តច្បាប់ចរាចរណ៍ និងការបន្តចុះផ្សព្វផ្សាយច្បាប់នៅតាមបណ្តាគ្រឹះស្ថានសិក្សា និងសាលារៀន។ លោកស្នងការរងបានបញ្ជាក់ទៀតថា តាមរយៈការអនុវត្តនិងរឹតបន្តឹងច្បាប់នេះ គឺរាល់គ្រោះថ្នាក់ចរាចរណ៍ ដែលកើតមាននិងត្រូវកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់៕
0 Comments