ភ្នំពេញ ៖ ជនសង្ស័យ២នាក់ ត្រូវបានសមត្ថកិច្ចប៉េអិមខណ្ឌទួលគោកធ្វើការឃាត់ខ្លួន ក្រោយពីសមត្ថកិច្ចបានឮសម្លេងផ្ទុះ ដោយអាវុធ ហើយនៅពេលឃាត់ខ្លួនជនសង្ស័យទាំង២នាក់និងធ្វើការឆែកឆេរឃើញអាវុធខ្លីមួយដើម ដែលមិនមានច្បាប់ទើបប៉េអិមធ្វើការនាំខ្លួនមកកាន់ទីបញ្ជាការប៉េអិមខណ្ឌតែម្តង។
ជនសង្ស័យទាំង២នាក់ត្រូវបានឃាត់ខ្លួន ដោយចោទប្រកាន់ថា បានបាញ់ បោះ ដោយសេរីនៅតាមផ្លូវសាធារណៈ ហើយកងកម្លាំងមានសមត្ថកិច្ចស្ទាក់ចាប់បាននៅចំណុចស្ពាន អាកាស៧ មករា សង្កាត់ទឹកល្អក់ទី១ ខណ្ឌ ទួលគោក កាលពីវេលាម៉ោង១និង២៥នាទី យប់ថ្ងៃទី០១ ខែមករា ឆ្នាំ២០១៥ ពោលគឺនៅក្បែរទីស្នាក់ការប៉ុស្តិ៍ទឹកល្អក់ទី១ តែម្តង។
ជនសង្ស័យទាំង២នាក់ ទី១ ត្រូវបានគេស្គាល់ឈ្មោះ លី ម៉េងហុក អាយុ២១ឆ្នាំ មុខ របរលក់ឥដ្ឋ ស្នាក់នៅផ្ទះលេខ ១៣៣៩ ផ្លូវ ជាតិលេខ២ សង្កាត់ចាក់អង្រែលើ ខណ្ឌមានជ័យ ជាម្ចាស់កាំភ្លើង និងជាម្ចាស់រថយន្ដ ទី២ ឈ្មោះឡូយ ឈាងលី អាយុ២១ឆ្នាំ មុខ របរនិស្សិត នៅសាកលវិទ្យាល័យពុទ្ធសាស្ដ្រ ស្នាក់នៅផ្ទះលេខ៨៦បេ ផ្លូវលំ ភូមិចំរើន ផល សង្កាត់បឹងទំពុន ខណ្ឌមានជ័យ។
មន្ដ្រីអាវុធហត្ថខណ្ឌទួលគោក បានឲ្យដឹងថា នៅមុនពេលកើតហេតុគេបាន ឮសំឡេងផ្ទុះអាវុធ នៅតាម បណ្ដោយ ផ្លូវម៉ៅ សេទុង សង្កាត់ផ្សារដើមគ ខណ្ឌទួលគោក ដែលបង្កឡើងដោយអ្នកបើករថយន្ដស៊េរី ទំនើប និងបក្ខពួក ពីរបីរថយន្ដទៀត ប៉ុន្ដែមិនដឹងថា ពួកគេបាញ់តាមដងផ្លូវសាធារណៈ ផ្ដើមចេញពីរឿងអ្វីនោះឡើយ។ មន្ត្រីដដែរក៏បានបញ្ជាក់បន្ថែមទៀតថា ក្រោយពីទទួលបានព័ត៌មាននៃការផ្ទុះអាវុធ តាមដងផ្លូវម៉ៅសេទុងនេះរួចមក កម្លាំងមានសមត្ថកិច្ចក៏បានដេញតាមពីក្រោយរហូត។ លុះមកដល់ចំណុចស្ពានអាកាស៧ មករា ទើបឃាត់បានជនសង្ស័យពីរនាក់ព្រមទាំងដកហូតបានកាំភ្លើងខ្លីមួយដើម និងរថយន្ដមួយ គ្រឿង ម៉ាកលុច្សស៊ីស Rx330 ពណ៌ស ពាក់ ស្លាកលេខ ភ្នំពេញ 2Z-9045 ទូរស័ព្ទដៃពីរ គ្រឿង និងលុយមួយចំនួនផងដែរ។
នៅចំពោះមុខមន្ដ្រីអាវុធហត្ថ ជនសង្ស័យ ទាំងពីរនាក់ បានបដិសេធថា ពួកគេមិនបាន បាញ់នោះទេ ហើយកាំភ្លើងដែលមាននេះ គឺបានទិញពីអ្នកដែលធ្វើដំណើរចេញចូល ប្រទេសថៃ ក្នុងគោលបំណងការពារខ្លួនតែម្ដង។ យ៉ាងណាក៏ដោយការប្រើប្រាស់អាវុធ របស់ពួកគេ ពុំមានលិខិតស្នាមត្រឹមត្រូវនោះឡើយ ហើយក្រោយបញ្ចប់ការសួរនាំ អាវុធ ហត្ថខណ្ឌទួលគោក បានបញ្ជូនខ្លួនទៅកាន់ ទីបញ្ជាការអាវុធហត្ថរាជធានីភ្នំពេញ ដើម្បីមានវិធានការតាមផ្លូវច្បាប់៕
0 Comments