ភ្នំពេញ ៖ បុរសជនជាតិអាមេរិកាំងម្នាក់ត្រូវគេសង្ស័យថា ប្រើប្រាស់ថ្នាំញៀនលើសកម្រិតបណ្ដាលឲ្យគាំងបេះដូងស្លាប់បង្កជាការភ្ញាក់ផ្អើលកាលពីវេលាម៉ោង១១និង៣០នាទីព្រឹកថ្ងៃទី០១ ខែមករា ឆ្នាំ២០១៥នៅលើឥដ្ឋក្បែរគ្រែក្នុងបន្ទប់លេខ៤០៧ ជាន់ទី៤ នៃសណ្ឋាគារណាណា ដែលមានទីតាំងលេខ១បេ,២បេ,៣បេស្ថិតក្នុងសង្កាត់ផ្សារថ្មី៣ខណ្ឌដូនពេញ។
យោងតាមលិខិតឆ្លងដែនរបស់ជនរងគ្រោះ សមត្ថកិច្ចបានឲ្យដឹងថា បុរសជនជាតិអាមេរិកាំងដែលដេកស្លាប់នោះឈ្មោះ HENNEBERRY WILLIAM. STANLEY អាយុ៧១ឆ្នាំមុខរបរទេសចរណ៍ កាន់លិខិតឆ្លងដែនលេខ៤២០៩៣៣២០៦ ចូលស្នាក់នៅសណ្ឋាគារណាណាកាលពីថ្ងៃទី៣០ខែធ្នូឆ្នាំ២០១៤។
ប្រភពព័ត៌មានពីកន្លែងកើតហេតុបានឲ្យដឹងថា ដោយសារតែមិនឃើញបុរសជនជាតិអាមេរិកាំងរូបនោះចេញចូលដូចសព្វដងនោះនៅព្រឹកថ្ងៃទីកើតហេតុ ទើបអ្នកទទួលខុសត្រូវសណ្ឋាគារណាណាឲ្យបុគ្គលិករបស់ខ្លួនឡើងទៅមើលបន្ទប់លេខ៤០៧ ហើយគោះទ្វាជាច្រើនដងតែគ្មានការឆ្លើយតបក៏សង្ស័យ រួចចាក់សោចូលមើលប្រទះឃើញបុរសនោះដេកស្លាប់នៅលើឥដ្ឋក្បែរគ្រែទាំងកាយអាក្រាត។ ភ្លាមៗនោះម្ចាស់សណ្ឋាគារបានរាយការណ៍ដល់សមត្ថកិច្ចមូលដ្ឋានហើយបង្កើតគណៈកម្មការចម្រុះ និងមានការចូលរួមពីតំណាងស្ថានទូតអាមេរិកប្រចាំនៅកម្ពុជា ចុះពិនិត្យផ្ទាល់នៅបន្ទប់កើតហេតុតែម្ដង។
ក្នុងការចុះពិនិត្យធ្វើកោសល្យវិច័យនោះដែរ គណៈកម្មការចម្រុះបានសម្រេចបូមទឹកនោមជនរងគ្រោះយកទៅពិនិត្យព្រោះមានការសង្ស័យ។ បច្ចុប្បន្នសពជនរងគ្រោះត្រូវបានបញ្ជូនទៅតម្កល់នៅវត្តស្ទឹងមានជ័យ៕
0 Comments