អ្នកប្រដាល់ជើងខ្លាំងទម្ងន់៦៣,៥០០គីឡូក្រាម៤រូប នឹងឡើងជួបគ្នាលើសង្វៀនស្ទឹងមានជ័យ នាល្ងាចថ្ងៃទី០៤ ខែមករា ឆ្នាំ២០១៥នេះ ដើម្បីប្រកួតគ្នាដណ្តើមពានអនុស្សាវរីយ៍បាយ័នឆ្នាំ២០១៥។
អ្នកប្រដាល់ជើងខ្លាំងទាំង៤រូបនោះ គឺឯម លីថូ អ្នកប្រដាល់ក្លឹបឫទ្ធីពោធិសែនជ័យ ដែលត្រូវគេផ្គូឲ្យជួបជាមួយសុខ សុវណ្ណ អ្នកប្រដាល់ក្លឹបកងពលតូចលេខ៣១ ហើយវី សេរីចាន់ឌីន អ្នកប្រដាល់ក្លឹបខ្លារខិនមានរិទ្ធ ជួបជាមួយ ឱម សំរេច អ្នកប្រដាល់ក្លឹបកងពលតូចទ័ពឆត្រយោង៩១១។
ការប្រកួតចែកចេញជាពីរដំណាក់កាល ដែលដំណាក់កាលទី១ប្រកួតជម្រុះ ដើម្បីជម្រុះចោលពីរនាក់ដែលចាញ់ៗ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្ដាច់ព្រ័ត្រដណ្តើមពានអនុស្សាវរីយ៍របស់ស្ថានីយទូរទស្សន៍បាយ័ន។
គួរបញ្ជាក់ថា ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្ដាច់ព្រ័ត្រ គឺវាយ៥ទឹកតែមួយទឹកវាយតែ២នាទីទេ។
រវាងឯម លីថូ និងសុខ សុវណ្ណ ពួកគេធ្លាប់ជួបគ្នាចំនួន៦លើកហើយ ប៉ុន្តែសុវណ្ណមិនដែលវាយឈ្នះលីថូទេ គឺបានត្រឹមស្មើម្តង និងចាញ់លីថូដោយពិន្ទុ៥ដង។ ពួកគេជួបគ្នាលើកដំបូងក្នុងឆ្នាំ២០០៧ បន្ទាប់មកនៅឆ្នាំ២០០៨និង២០១០។
តាមប្រវត្តិប្រកួតនេះ គេមិនរំពឹងថាសុខ សុវណ្ណ អាចវាយឈ្នះឯម លីថូនោះទេ សម្រាប់ការជួបគ្នាលើកនេះ។
ចំពោះអ្នកប្រដាល់ វី សេរីចាន់ឌីន និង ឱម សំរេចវិញ ពួកគេទាំងពីរពុំធ្លាប់ដែលជួបគ្នាទេ ព្រោះថាសេរីចាន់ឌីនគេទើបតែបង្ហាញមុខលើសង្វៀនក្នុងឆ្នាំ២០១៤ប៉ុណ្ណោះ។
វី សេរីចាន់ឌីន គេថ្មីមែន ប៉ុន្តែគេមានស្នៀតប្រដាល់ល្អ និងវាយមានផ្លែល្អទៀតផង។ អ្វីដែលធ្វើឲ្យគេប្រកួតឈ្នះដៃគូនោះ គឺដោយសារកម្លាំងកាយសម្បទារបស់គេរឹងមាំ និងខ្លាំងតែម្តង។ ប្រកួតចុងក្រោយនេះ សេរីចាន់ឌីន វាយឈ្នះផាន់ ចំណាន អ្នកប្រដាល់ក្លឹបគុជសាកីឡាដោយពិន្ទុ។
ឱម សំរេច គេមិនជាខ្លាំងប៉ុន្មាននោះទេ។ ការប្រកួតរបស់គេភាគច្រើនវាយចាញ់ច្រើនជាងឈ្នះ។ ប្រកួតចុងក្រោយនេះ សំរេចវាយចាញ់យស់ សំអាល់ អ្នកប្រដាល់ក្លឹបឃ្លាំងមឿងកីឡាដោយពិន្ទុ។
ទោះជាយ៉ាងណា សម្រាប់ការជួបប្រកួតគ្នារបស់អ្នកប្រដាល់ទាំង៤រូបនេះ មិនដឹងថាអ្នកណាជ្រុះធ្លាក់ អ្នកណានឹងបានឡើងទៅដល់វគ្គផ្តាច់ព្រ័ត្រនោះទេ ?
កីឡាការិនី វី ស្រីខួច ក្លឹបនាគមានជ័យ នឹងជួបប្រកួតជាមួយកីឡាការិនីសម សំណា ង ក្លឹបពន្លឺសាមគ្គីខេត្តបាត់ដំបង។ ពួកនាងទាំងពីរនេះ ធ្លាប់ប្រកួតគ្នាចំនួន៧លើកហើយ ដោយស្រីខួចវាយចាញ់សំណាង៥លើក និងឈ្នះបាន២លើក។
ស្រីខួច មានស្នៀតប្រដាល់ល្អ តែចាញ់កម្លាំងវាយបុករបស់សម សំណាង ទើបបរាជ័យច្រើនជាងឈ្នះបែបនេះ។ ដូច្នេះ ចាំមើលការជួបគ្នាលើកទី៨នេះ តើនរណាជាអ្នកឈ្នះនោះ?៕
0 Comments