បាត់ដំបង ៖ បុរសម្នាក់ដែលមានប្រវត្តិប្រើប្រាស់គ្រឿងញៀនត្រូវបានសមត្ថកិច្ចនៃអធិការដ្ឋាននគរបាលស្រុកភ្នំព្រឹកសហការជាមួយកម្លាំងប៉ុស្តិ៍ធ្វើការឃាត់ខ្លួននៅពេលព្រឹកឡើង បន្ទាប់ពីជននេះបានធ្វើសកម្មភាពយកកាំបិតទៅកាប់លើអ្នកភូមិកាលពីថ្ងៃទី១ ខែមករា ឆ្នាំ២០១៥ វេលាម៉ោង២រំលងអធ្រាត្រត្រង់ចំណុចភូមិអូរតាសុខ ឃុំពេជ្រចិន្តា ស្រុកភ្នំព្រឹក ខេត្តបាត់ដំបង បណ្ដាលឲ្យរងរបួសយ៉ាងធ្ងន់ធ្ងរក្នុងន័យគំរាមទារយកប្រាក់។
ពាក់ព័ន្ធនឹងអំពើគំរាមទារប្រាក់នេះលោក សារ៉េត វិសេដ្ឋ អធិការរងស្រុកភ្នំព្រឹកបានបញ្ជាក់ថា ស្ត្រីរងគ្រោះមានឈ្មោះ សេង អិត អាយុ៤២ឆ្នាំរស់នៅ ចំណុចកើតហេតុខាងលើ ដោយអ្នកស្រីបានរៀបរាប់ថានៅពេលរំលងអធ្រាត្រនាយប់ថ្ងៃកើតហេតុ គឺពេលដែលអ្នកស្រីកំពុងសម្រាកលង់លក់ទៅហើយនោះ ក៏ស្រាប់តែលឺសំឡេងប្រាវព្រោះតែមានមនុស្សសម្រុកបុកទម្លាយទ្វារផ្ទះដ៏តូចរបស់អ្នកស្រីចូលមក។
អ្នកស្រីបានបន្តថា ដោយសារតែយប់ងងឹតដូច្នេះអ្នកស្រីមិនអាចមើលបុរសនោះស្គាល់ឡើយ ប៉ុន្តែអ្នកស្រីអាចស្តាប់សំឡេងបាន គឺគេពិតជាឈ្មោះ សៀង ពូជ អាយុ៣៦ឆ្នាំរស់នៅក្នុងភូមិជាមួយគ្នា ហើយនៅពេលដែលគេចូលមកដល់ គេបានសម្លុតគំរាមទាររកប្រាក់ ដោយសារតែអ្នកស្រីជាអ្នកស៊ីឈ្នួលធ្វើចម្ការឲ្យគេ ទើបអ្នកស្រីពុំមានប្រាក់ឯណាឲ្យទៅវាឡើយ។ គ្រាន់តែលឺថាគ្មានប្រាក់ ស្រាប់តែបុរសនោះបានប្រើប្រាស់កាំបិតកាប់មកលើអ្នកស្រីចំកណ្ដាលថ្ងាសមួយកាំបិតបណ្ដាលឲ្យឈាមហូរជោកប្រាណ ទើបអ្នកស្រីស្រែកយ៉ាងខ្លាំងដើម្បីឲ្យអ្នកភូមិជួយ។ គ្រាន់តែលឺសម្រែកនេះភ្លាម ជនសង្ស័យបានរត់គេចខ្លួនបាត់ស្រមោលទាំងយប់តែម្ដង។
លោកអធិការរងបានសង្កត់ធ្ងន់ថា លុះនៅព្រឹកឡើងក្រោយពីទទួលបានព័ត៌មានពីស្ត្រី រងគ្រោះរួចមក លោកបានចាត់កម្លាំងជំនាញរួមនឹងកម្លាំងប៉ុស្តិ៍ចេញប្រតិបត្តិការតាមរកជនសង្ស័យ ព្រមទាំងបានឃាត់ខ្លួននៅវេលាម៉ោង៧ព្រឹកនាថ្ងៃដដែល ខណៈដែលមុខសញ្ញានេះកំពុងសម្ងំលាក់ខ្លួននៅក្នុងព្រៃចម្ងាយពីភូមិប្រហែល១៥០ម៉ែត្រដើម្បីបញ្ជូនខ្លួនទៅអធិការដ្ឋាន និងធ្វើការសាកសួរ។ ចំណែកស្ត្រីរងគ្រោះក៏ត្រូវបានបញ្ជូនទៅសង្គ្រោះនៅឯមន្ទីរពេទ្យដោយសារតែមុខរបួសដែលត្រូវនឹងផ្លែកាំបិតមានប្រវែង១២ស់ងទីម៉ែត្រ ព្រមទាំងមានជម្រៅដល់ឆ្អឹងក្បាល។ ជនសង្ស័យនេះត្រូវបានសមត្ថកិច្ចបង្ហើបឲ្យដឹងថា គឺជាមុខសញ្ញាប្រើប្រាស់គ្រឿងញៀនយ៉ាងខ្លាំងផងដែរ ហើយនៅពេលនេះទំនងជាបែកថ្នាំផងបានជាសាហាវបែបនេះ៕
0 Comments